ઇંગ્લેન્ડના દિગ્ગજ ઓલરાઉન્ડર બેન સ્ટોક્સે આંતરરાષ્ટ્રીય ક્રિકેટમાંથી નિવૃત્તિ જાહેર કરી દીધી છે. સ્ટોક્સના સંન્યાસ બાદ આખી દુનિયામાંથી તેને શુભેચ્છાઓ મળી રહી છે, ત્યારે ઓસ્ટ્રેલિયાના પૂર્વ હેડ કોચ જસ્ટિન લેંગરે એક ખુબ જ ભાવુક અને રસપ્રદ કિસ્સો શેર કર્યો છે.
૨૦૧૯ની એશિઝ શ્રેણીનો એ દર્દનાક ઘા
જસ્ટિન લેંગરે સોશિયલ મીડિયા પર બેન સ્ટોક્સને ભવિષ્ય માટે શુભકામનાઓ પાઠવી છે. આ સાથે જ તેમણે સ્વીકાર્યું કે ૨૦૧૯ની એશિઝ શ્રેણી દરમિયાન હેડિંગ્લે ટેસ્ટમાં સ્ટોક્સે રમેલી ૧૩૫ રનની અણનમ ઇનિંગ આજે પણ તેમને ચેનથી જીવવા દેતી નથી. લેંગર તે સમયે ઓસ્ટ્રેલિયાની ટીમના હેડ કોચ હતા અને સ્ટોક્સે ઓસ્ટ્રેલિયાના મોઢામાંથી જીત છીનવી લીધી હતી.
‘ટીવી પર એ ઇનિંગ જોઈને મારો આખો દિવસ બગડી ગયો’
લેંગરે લખ્યું કે, “તાજેતરમાં જ હું રાત્રે આરામથી ટીવી જોઈ રહ્યો હતો. ત્યારે ચેનલ બદલતા જ સ્ક્રીન પર ૨૦૧૯ની એ મેચ હાઈલાઈટ્સ તરીકે બતાવવામાં આવી રહી હતી. તે જોઈને મારી આખી શાંત સાંજ બગડી ગઈ. નાથન લાયનથી મિસ થયેલો રનઆઉટ અને રિવ્યુ ન હોવાના કારણે અમ્પાયરની ભૂલ બધું મારી નજર સામે આવી ગયું. અમે જીતથી માત્ર એક વિકેટ દૂર હતા, પણ સ્ટોક્સે મેચ પલટી નાખી.”
એ રાત્રે પત્ની પણ ચોંકી ગઈ હતી
તે મેચ હાર્યા બાદ પોતાની માનસિક સ્થિતિ વિશે લેંગરે જણાવ્યું કે, “તે રાત્રે હું રૂમમાં એકલો બેસીને સ્કોચ પી રહ્યો હતો. મારી પત્નીએ આવીને પૂછ્યું કે તું શું કરે છે? મેં કહ્યું હું સ્કોચ પીઉં છું. તે ચોંકી ગઈ કારણ કે હું ક્યારેય સ્કોચ પીતો નથી. મારા કોચિંગ કરિયરનો એ સૌથી ખરાબ અને પીડાદાયક દિવસ હતો.”
બેન સ્ટોક્સની મહાનતાને સલામ કરી
જસ્ટિન લેંગરે સ્વીકાર્યું કે બેન સ્ટોક્સ એક એવો ખેલાડી હતો, જેની સામે રણનીતિ બનાવવી એ કોઈ ડરામણા સપના જેવું હતું. તે ક્રિકેટ ઈતિહાસના સૌથી લડાયક, પ્રેરણાદાયક અને મહાન હરીફોમાંથી એક છે. લેંગરે સ્ટોક્સના શાનદાર આંતરરાષ્ટ્રીય કરિયરને દિલથી સલામ કરી છે.
