કેન્દ્ર સરકારે પેટ્રોલ અને ડીઝલના સપ્લાયને લઈને એક મોટો નિર્ણય લીધો છે. પેટ્રોલિયમ અને પ્રાકૃતિક ગેસ મંત્રાલયે પેટ્રોલ પંપ પરથી ઈંધણ ખરીદવા પર કેટલાક પ્રતિબંધો લગાવ્યા છે. નવા આદેશ મુજબ, હવે ફેક્ટરીઓ અને મોટી કંપનીઓ પેટ્રોલ પંપ પરથી સીધું તેલ ખરીદી શકશે નહીં. આ સાથે જ, એક ગ્રાહકને એક દિવસમાં ૨૦૦ લીટરથી વધુ ડીઝલ આપવામાં આવશે નહીં. આ નવો નિયમ તાત્કાલિક અસરથી લાગુ કરી દેવામાં આવ્યો છે.
સામાન્ય પેટ્રોલ પંપ પરથી મોટા ગ્રાહકો માટે રસ્તો બંધ
સરકારના નવા આદેશ અનુસાર, હવે ઔદ્યોગિક, કોમર્શિયલ અને સંસ્થાકીય ગ્રાહકો સામાન્ય પેટ્રોલ પંપ પરથી પેટ્રોલ કે ડીઝલ ખરીદી શકશે નહીં. આ મોટા ગ્રાહકોએ પોતાની જરૂરિયાતનું ઈંધણ માત્ર ‘કન્ઝ્યુમર પંપ’ પરથી જ લેવું પડશે. એટલે કે મોટા ખરીદદારો માટે હવે સામાન્ય પેટ્રોલ પંપના દરવાજા બંધ થઈ ગયા છે.
પેટ્રોલ પંપ માટે શું છે નવા નિયમો?
નવા નિયમો હેઠળ પેટ્રોલ પંપ સંચાલકો માટે પણ કડક સૂચનાઓ જાહેર કરવામાં આવી છે:
-
પેટ્રોલ પંપ હવે ડીઝલ માત્ર વાહનની ટાંકીમાં અથવા PESO (પેસો) દ્વારા માન્ય કન્ટેનરમાં જ આપી શકશે.
-
એક ગ્રાહક અથવા એક વાહનને એક દિવસમાં મહત્તમ ૨૦૦ લીટર જ ડીઝલ મળશે.
-
આ રીતે ખરીદેલા ડીઝલને આગળ અન્ય કોઈને વેચવાની મંજૂરી મળશે નહીં.
આ પ્રતિબંધો હાલ પૂરતા કામચલાઉ છે. શરૂઆતમાં આ નિયમો વધુમાં વધુ ૯૦ દિવસ માટે લાગુ રહેશે. જરૂર પડ્યે સરકાર આ સમયગાળો લંબાવી શકે છે.
સરકારે કેમ લેવો પડ્યો આ નિર્ણય?
આ મોટા નિર્ણય પાછળ બે મુખ્ય કારણો જવાબદાર છે:
૧. આંતરરાષ્ટ્રીય તણાવ: વૈશ્વિક સ્તરે ચાલી રહેલા ભૌગોલિક-રાજકીય તણાવના કારણે પેટ્રોલિયમની સપ્લાય ચેઈન અને શિપિંગ પર ખરાબ અસર પડી છે. તેથી ઉપલબ્ધ સ્ટોકનો સમજદારીપૂર્વક ઉપયોગ કરવો જરૂરી બન્યો છે. ૨. ભાવમાં તફાવત અને કાળાબજારી: રીટેલ અને બલ્ક (જથ્થાબંધ) કિંમતોમાં તફાવત હોવાને કારણે મોટી ફેક્ટરીઓ સીધી પેટ્રોલ પંપથી સસ્તું તેલ ખરીદતી હતી. આના કારણે સામાન્ય માણસ માટે રાખેલો સ્ટોક ખૂટવા લાગ્યો હતો. જમાખોરી અને કાળાબજારી રોકવા માટે આ આદેશ લાવવામાં આવ્યો છે.
નિયમ તોડવા બદલ શું સજા થશે?
આ સરકારી આદેશનું ઉલ્લંઘન કરનારાઓ સામે કડક કાયદાકીય કાર્યવાહી કરવામાં આવશે. નિયમ તોડવા બદલ ‘આવશ્યક વસ્તુ અધિનિયમ ૧૯૫૫’ (Essential Commodities Act) અને અન્ય કાયદા હેઠળ સજાની જોગવાઈ છે.
આ નિયમોની દેખરેખ માટે કેન્દ્ર કે રાજ્ય સરકારના ગેઝેટેડ અધિકારીઓ, DSP રેન્ક કે તેથી ઉપરના પોલીસ અધિકારીઓ અને તેલ કંપનીઓના સેલ્સ ઓફિસરોને સર્ચ અને જપ્તીની સત્તા આપવામાં આવી છે.
સામાન્ય જનતા પર શું અસર થશે?
જો તમે તમારી કાર કે બાઇકમાં તેલ પુરાવો છો, તો તમારા માટે કંઈ જ બદલાયું નથી. સામાન્ય ગ્રાહકો પર આ નિયમથી કોઈ રોક લાગશે નહીં.
રોજની ૨૦૦ લીટરની મર્યાદા સામાન્ય વાહન ચાલકો માટે ખૂબ મોટી છે, કારણ કે સામાન્ય ગાડીઓની ટાંકી આટલી મોટી હોતી નથી. આ આદેશ માત્ર એવા મોટા ખરીદદારોને રોકવા માટે છે જેઓ સસ્તા દરનો ફાયદો ઉઠાવીને પંપ પરથી ભારે માત્રામાં ઈંધણ ઉપાડી જતા હતા. સરકારનો હેતુ સામાન્ય લોકોને સરળતાથી તેલ મળતું રહે તે સુનિશ્ચિત કરવાનો છે.
< /p>
