અમદાવાદના રામોલ વિસ્તારમાંથી કાયદાને ગેરમાર્ગે દોરવાનો એક અજીબોગરીબ કિસ્સો પ્રકાશમાં આવ્યો છે. અહીં હત્યાની કોશિશના ગુનામાં પકડાયેલા પુત્રને કાયદાકીય રાહત (જુવેનાઇલ લાભ) અપાવવા માટે માતાએ હદ વટાવી દીધી હતી. પુત્ર સગીર વયનો દેખાય તે માટે માતાએ પોલીસ સમક્ષ શાળાનું નકલી લિવિંગ સર્ટિફિકેટ (LC) રજૂ કર્યું હતું. જોકે, પોલીસની સતર્કતાના કારણે આ સમગ્ર ભાંડો ફૂટી ગયો છે.
શું હતી સમગ્ર ઘટના?
રામોલના રામરાજ્યનગરમાં રહેતા એક યુવકે તારીખ 24 ઓક્ટોબર 2025ના રોજ તેના જ એક મિત્ર પર ચાકુથી જીવલેણ હુમલો કર્યો હતો. આ હુમલો એટલો ગંભીર હતો કે ભોગ બનનારનું આંતરડું બહાર આવી ગયું હતું.
-
આ ગુના બાદ આરોપી યુવક છેલ્લા એક વર્ષથી નાસતો ફરતો હતો.
-
રામોલ પોલીસે બાતમીના આધારે તેના ઘરે દરોડો પાડીને આરોપીને ઝડપી લીધો હતો.
-
ધરપકડ સમયે પૂછપરછ દરમિયાન યુવકે પોતાની ઉંમર 19 વર્ષ જણાવી હતી.
માતાએ રચ્યું નકલી સર્ટિફિકેટનું ષડયંત્ર
દીકરાની ધરપકડ થતાં જ બીજા દિવસે તેની માતા રામોલ પોલીસ સ્ટેશને પહોંચી હતી. તેણે પોલીસ સમક્ષ દીકરાની શાળાનું લિવિંગ સર્ટિફિકેટ રજૂ કર્યું અને દાવો કર્યો કે તેનો દીકરો સગીર (જુવેનાઇલ) છે.
પોલીસને આ રીતે ગઈ શંકા:
-
એલસી (LC) જોતાં જ પોલીસને જન્મતારીખના આંકડા અને શબ્દોમાં ચેડાં થયા હોવાની શંકા ગઈ હતી.
-
સર્ટિફિકેટમાં તેની ઉંમર અસલી ઉંમર કરતાં એક વર્ષ ઓછી દર્શાવવામાં આવી હતી.
-
શંકા દ્રઢ થતાં પોલીસની એક ટીમ તાત્કાલિક સંબંધિત શાળામાં તપાસ માટે પહોંચી હતી.
< /p>
શાળાની તપાસમાં ખુલી ગઈ પોલ
પોલીસે જ્યારે શાળાના અસલી રેકોર્ડ સાથે રજૂ કરાયેલા સર્ટિફિકેટની ખરાઈ કરી ત્યારે ચોંકાવનારો ખુલાસો થયો.
-
આરોપીની માતાએ અગાઉ શાળામાં ‘અસલી એલસી ખોવાઈ ગયું છે’ તેમ કહીને ડુપ્લીકેટ એલસી કઢાવ્યું હતું.
-
ત્યારબાદ તેણે આ ડુપ્લીકેટ સર્ટિફિકેટમાં જુલાઈ મહિનાની જન્મતારીખ અને વર્ષમાં પોતાના હાથે સુધારો (ચેડાં) કરી દીધો હતો.
બંને સામે નોંધાયો ગુનો દીકરાને કાયદાની નજરમાં સગીર બતાવીને સજામાંથી બચાવવાનો માતાનો આ પ્લાન ફ્લોપ રહ્યો છે. રામોલ પોલીસે સરકારી દસ્તાવેજમાં ચેડાં કરવા અને ખોટા પુરાવા રજૂ કરવા બદલ આરોપી પુત્રની સાથે તેની માતા સામે પણ ગુનો નોંધીને કાયદેસરની કાર્યવાહી હાથ ધરી છે.
