આઈપીએલ 2026 (IPL 2026) માં મુંબઈ ઈન્ડિયન્સ (MI) નું પ્રદર્શન ખૂબ જ નિરાશાજનક રહ્યું છે. રોહિત શર્મા અને હાર્દિક પંડ્યા જેવા સ્ટાર ખેલાડીઓ હોવા છતાં ટીમ પ્લેઓફની રેસમાંથી બહાર થઈ ગઈ છે. મુંબઈ ઈન્ડિયન્સે આ સીઝનમાં અત્યાર સુધી 13 મેચ રમી છે, જેમાંથી ટીમ માત્ર 4 મેચ જીતી શકી છે. હાલમાં ટીમ 8 પોઈન્ટ સાથે પોઈન્ટ ટેબલમાં નવમા સ્થાને છે.
બેટ્સમેનો હિટ, બોલર્સ ફ્લોપ: ચોંકાવનારો રેકોર્ડ
આ સીઝનમાં મુંબઈ ઈન્ડિયન્સનો એક એવો રેકોર્ડ સામે આવ્યો છે જે બધાને ચોંકાવી દે તેવો છે. મુંબઈના બેટ્સમેનોએ 13 મેચમાં કુલ 130 સિક્સર ફટકારી છે. પરંતુ આશ્ચર્યની વાત એ છે કે મુંબઈના બોલરોએ પણ વિરોધી ટીમો સામે 130 સિક્સર ખાધી છે. જસપ્રિત બુમરાહ, ટ્રેન્ટ બોલ્ટ અને દીપક ચાહર જેવા દિગ્ગજ બોલર્સ હોવા છતાં મુંબઈની બોલિંગ લાઇન-અપ ફ્લોપ સાબિત થઈ છે. બેટ્સમેનોની મહેનત પર બોલરોએ પાણી ફેરવી દીધું છે.
રોહિત અને હાર્દિક ઈજાથી રહ્યા પરેશાન
મુંબઈ ઈન્ડિયન્સના ખરાબ પ્રદર્શન પાછળ ખેલાડીઓની ઈજા પણ એક મોટું કારણ છે. સ્ટાર ઓપનર રોહિત શર્મા હેમસ્ટ્રિંગની ઈજાના કારણે 4 મેચ રમી શક્યો નહોતો. જ્યારે કેપ્ટન હાર્દિક પંડ્યા પણ પીઠના દુખાવાના કારણે ઘણી મેચોમાંથી બહાર રહ્યો હતો. ટીમે સીઝનની શરૂઆત KKR સામે જીત સાથે કરી હતી, પરંતુ તે પછી પ્રદર્શન કથળતું ગયું. મુંબઈ ઈન્ડિયન્સ પોતાની છેલ્લી લીગ મેચ 24 મેના રોજ રાજસ્થાન રોયલ્સ સામે રમશે. ટીમ આ મેચ જીતીને સીઝનનો અંત કરવા ઈચ્છશે. તમને જણાવી દઈએ કે મુંબઈએ છેલ્લે વર્ષ 2020માં આઈપીએલ ટ્રોફી જીતી હતી.
