નીતિશ કુમારે રાજ્યસભા માટે ઉમેદવારી નોંધાવી:નીતિશે કહ્યું- નવી સરકારને મારો સહયોગ રહેશે, JDU કાર્યાલયમાં તોડફોડ; તેજસ્વીએ કહ્યું- હાઇજેક કર્યા

બિહારના મુખ્યમંત્રી નીતિશ કુમારે ગુરુવારે રાજ્યસભા માટે ઉમેદવારી નોંધાવી છે. મુખ્યમંત્રી નીતિશ સાથે ભાજપ અધ્યક્ષ નીતિન નબીન, રામનાથ ઠાકુર, ઉપેન્દ્ર કુશવાહા અને શિવેશ કુમારે પણ પોતાની ઉમેદવારી નોંધાવી. આ દરમિયાન કેન્દ્રીય ગૃહમંત્રી અમિત શાહ પણ હાજર રહ્યા હતા.
બિહારના CM નીતિશ કુમારે એક્સ પર આ જાહેરાત કરતા લખ્યું, “જ્યારથી મેં મારી સંસદીય કારકિર્દી શરૂ કરી હતી, ત્યારથી મને બિહાર વિધાનસભાના બંને ગૃહો અને સંસદના બંને ગૃહોના સભ્ય બનવાની ઇચ્છા હતી. આ મુજબ, હું આ ચૂંટણીમાં રાજ્યસભાના સભ્ય બનવાની ઇચ્છા રાખું છું.” તેમણે વધુમાં કહ્યું- બિહારની નવી સરકારને મારો પૂર્ણ સહયોગ રહેશે.

આ તરફ તેજસ્વી યાદવે કહ્યું કે ભાજપે બિહારમાં મહારાષ્ટ્ર મોડેલ લાગુ કર્યું છે. ભાજપે નીતીશ કુમાર પર એટલો બધા ટોર્ચર કર્યા કે તેમને રાજીનામું આપવું પડી રહ્યું છે. ભાજપ પોતાના જ સાથી પક્ષોને ખતમ કરે છે.
આ દરમિયાન, અમિત શાહ મુખ્યમંત્રીના નિવાસસ્થાને પહોંચ્યા હતા. ત્યારબાદ નીતિશ કુમાર, નીતિન નવીન અને શાહ એક જ કારમાં બેસીને વિધાનસભા પહોંચ્યા હતા. અહીં નીતિન નવીન અને નીતિશ કુમાર સહિત NDA ઉમેદવારોએ પોતાના ઉમેદવારી ફોર્મ ભર્યા છે.
રાજ્યસભા માટે તેમની ઉમેદવારી નોંધાવવાના અહેવાલો વચ્ચે, JDU કાર્યકરો મુખ્યમંત્રી CM હાઉસ પહોંચ્યા હતા. તેઓ કહે છે, “નીતીશ કુમાર બિહારના છે. અમે તેમને ક્યાંય જવા દઈશું નહીં. અમે અમારા જીવ આપી દઈશું.” CM હાઉસની બહાર કાર્યકરો રડી રહ્યા હતા.

મહત્વપુર્ણ અપડેટ્સ:-
• બેગુસરાય અને નાલંદા સહિત અનેક જિલ્લાઓમાં નીતિશ કુમારની રાજ્યસભાની ઉમેદવારીનો વિરોધ થઈ રહ્યો છે.
• નીતિશ કુમારની રાજ્યસભાની ઉમેદવારીથી નારાજ કાર્યકરોએ જેડીયુ કાર્યાલયમાં તોડફોડ કરી.
• કાર્યકરોએ જેડીયુ કાર્યાલયમાં હંગામો મચાવ્યો, લલન સિંહ વિરુદ્ધ સૂત્રોચ્ચાર કર્યા.
• કાર્યકરોના ગુસ્સાને ધ્યાનમાં રાખીને જેડીયુ કાર્યાલયનો દરવાજો બંધ કરી દેવામાં આવ્યો છે.
• મંત્રી મદન સહની સવારે CM હાઉસ પહોંચ્યા, પરંતુ તેમને મુખ્યમંત્રીને મળવાનો સમય ન મળ્યો.
• CM હાઉસ પહોંચેલા JDU ધારાસભ્ય પ્રેમ મુખિયાનો કાર્યકર્તાઓએ વિરોધ કર્યો. ગાડીને આગળ જવા દીધી નહીં.
• મુખ્યમંત્રી આવાસની બહાર JDU કાર્યકર્તાઓએ લલન સિંહ, વિજય ચૌધરી, સંજય ઝા મુર્દાબાદના નારા લગાવ્યા.
• બિહારના DGP વિનય કુમાર મુખ્યમંત્રી આવાસ પહોંચ્યા હતા.
• લલન સિંહે કહ્યું, CMનો જે નિર્ણય હશે, તે બધાએ માનવો પડશે.
• JDUના કાર્યકરો પણ વિધાનસભાની બહાર ભેગા થવા લાગ્યા છે.
તેમના પુત્ર નિશાંત કુમારના નામની પણ ચર્ચા થઈ રહી છે. પાર્ટીએ હજુ સુધી આ ચર્ચાઓનું ખંડન કર્યું નથી. ઉમેશ કુશવાહા ફરીથી JDUના પ્રદેશ અધ્યક્ષ બનશે. મીટિંગમાં નીતિશ કુમારે તેમના નામ પર મહોર લગાવી છે.