ટેલિવિઝન ઇન્ડસ્ટ્રીમાંથી એક અત્યંત ચોંકાવનારા સમાચાર સામે આવ્યા છે. જાણીતા ટીવી સિરિયલ અભિનેતા રોહિત ચંદેલ પર ૧૬ વર્ષની સગીર વયની છોકરીની છેડતી, પીછો કરવા અને મારપીટ કરવાનો ગંભીર આરોપ લાગ્યો છે. મુંબઈ પોલીસે આ મામલે કડક વલણ અપનાવીને ‘પ્રોટેક્શન ઓફ ચિલ્ડ્રન ફ્રોમ સેક્સ્યુઅલ ઓફેન્સ‘ (POCSO) એક્ટ હેઠળ ગુનો નોંધીને એક્ટરની ધરપકડ કરી લીધી છે. હાલ પોલીસ આ મામલે ખૂબ જ ઝડપથી તપાસ ચલાવી રહી છે.
પીછો કર્યો, ફોન કરીને ધમકાવી અને મારપીટ કરી પોલીસ અધિકારી પાસેથી મળતી માહિતી મુજબ, પૂર્વીય ઉપનગરમાં રહેતા સગીરાના પિતાએ આ મામલે ફરિયાદ નોંધાવી છે. ફરિયાદમાં આરોપ લગાવવામાં આવ્યો છે કે, ૨૯ વર્ષીય રોહિત ચંદેલ પીડિતાને તેના પોતાના તેમજ અન્ય જુદા-જુદા નંબરો પરથી વારંવાર ફોન કરીને પરેશાન કરતો હતો. એટલું જ નહીં, ગત ૫ જુલાઈના રોજ એક્ટરે સગીરાને તેની રહેણાંક ઇમારત (બિલ્ડિંગ) પાસે રોકીને તેનો પીછો કર્યો હતો. ત્યારબાદ કોઈ બાબતે ઝઘડો કરીને તેની સાથે ગાળાગાળી કરી અને મારપીટ પણ કરી હતી. પોલીસે જણાવ્યું કે સગીરા અને આરોપી એક્ટર બંને એકબીજાને પહેલાથી ઓળખતા હતા.
ઘરેથી થઈ ધરપકડ, પોલીસ કસ્ટડી મંજૂર આ ગંભીર ફરિયાદના આધારે પંત નગર પોલીસે કડક પોક્સો (POCSO) એક્ટ ઉપરાંત ભારતીય ન્યાય સંહિતા (BNS) ની કલમ ૭૮ (પીછો કરવો) અને કલમ ૧૧૫ (૨) (સ્વેચ્છાએ ઈજા પહોંચાડવી) હેઠળ ગુનો દાખલ કર્યો હતો. શુક્રવારે પોલીસે કાર્યવાહી કરીને રોહિત ચંદેલને દહિસર સ્થિત તેના ઘરેથી ધરપકડ કરી લીધી હતી. ત્યારબાદ તેને સ્પેશિયલ પોક્સો કોર્ટમાં રજૂ કરવામાં આવ્યો હતો, જ્યાંથી કોર્ટે આરોપી એક્ટરને પોલીસ કસ્ટડીમાં મોકલી આપવાનો આદેશ કર્યો છે.
‘પંડ્યા સ્ટોર’ થી મળી હતી મોટી ઓળખ રોહિત ચંદેલ ટીવી જગતનો એક જાણીતો ચહેરો છે. તેણે પ્રખ્યાત ટીવી સિરિયલ ‘પંડ્યા સ્ટોર’માં (Pandya Store) ધવલ મકવાણાનું મુખ્ય પાત્ર ભજવીને ઘર-ઘરમાં મોટી લોકપ્રિયતા મેળવી હતી. આ ઉપરાંત તે ‘કાશીબાઈ બાજીરાવ બલ્લાળ’માં બાજીરાવના પાત્રમાં પણ જોવા મળ્યો હતો અને હાલમાં તે ટીવી સિરિયલ ‘સૈરબ’માં કામ કરી રહ્યો છે. એક લોકપ્રિય કલાકાર પર આ પ્રકારના ગંભીર ફોજદારી અને જાતીય સતામણીના આરોપો લાગતા ટીવી ઇન્ડસ્ટ્રીમાં ભારે સનાટો વ્યાપી ગયો છે.
