પંજાબના પટિયાલામાં થોડા દિવસો પહેલા એક વાદળી રંગના ડ્રમમાંથી યુવતીની લાશ મળવાના સનસનીખેજ મામલામાં પોલીસે મોટો ખુલાસો કર્યો છે. આ રહસ્યમય હત્યાનો ભેદ ઉકેલતા પોલીસે યુવતીના બોયફ્રેન્ડની ધરપકડ કરી લીધી છે. લગ્નના દબાણના કારણે જ બોયફ્રેન્ડે પ્રેમિકાની ગળું દબાવીને હત્યા કરી હતી અને પુરાવા નાશ કરવા માટે લાશને ડ્રમમાં ભરીને ફેંકી દીધી હતી.
કચરો વીણનાર વ્યક્તિને મળી હતી લાશ
આ ચકચારી ઘટના 26 મે 2026 ની સવારે સામે આવી હતી. પટિયાલાના ડીસીડબલ્યુ (DCW) પુલ પાસે સવારે આશરે 6 વાગ્યે કચરો વીણતા એક વ્યક્તિની નજર રોડ કિનારે પડેલા વાદળી રંગના પ્લાસ્ટિકના ડ્રમ પર પડી હતી. તેણે ડ્રમની અંદર જોતા જ તેના હોશ ઉડી ગયા હતા, કારણ કે તેમાં એક યુવતીની લાશ પડી હતી. આ અંગે તાત્કાલિક પોલીસને જાણ કરવામાં આવી હતી.
હાથ પર બનેલા ટેટૂથી થઈ ઓળખ
પોલીસ માટે શરૂઆતમાં યુવતીની ઓળખ કરવી મુશ્કેલ હતી. પરંતુ યુવતીના હાથ પર “નેહા” નામનું ટેટૂ બનેલું હતું. આ ટેટૂ અને સોશિયલ મીડિયાની મદદથી તેના ભાઈએ લાશની ઓળખ નેહા તરીકે કરી હતી. પોલીસે કેસની ગંભીરતા જોઈને સીસીટીવી (CCTV) ફૂટેજ, કોલ ડિટેલ્સ અને મોબાઈલ ટાવર લોકેશનના આધારે તપાસ શરૂ કરી હતી.
તકનીકી તપાસના આધારે પોલીસે 29 મેના રોજ વિરાટ કશ્યપ નામના યુવકની ધરપકડ કરી હતી. જ્યારે પોલીસે તેની કડક પૂછપરછ કરી, ત્યારે તેણે પોતાનો ગુનો કબૂલી લીધો હતો.
લગ્નનું દબાણ બન્યું મોતનું કારણ
પોલીસ પૂછપરછમાં સામે આવ્યું કે નેહા અને વિરાટ છેલ્લા દોઢ વર્ષથી રિલેશનશિપમાં હતા. નેહા સતત વિરાટ પર લગ્ન કરવા માટે દબાણ કરી રહી હતી.
“25 મેની રાત્રે પણ બંને વચ્ચે આ જ બાબતે જોરદાર ઝઘડો થયો હતો. ગુસ્સામાં આવીને વિરાટે નેહાનું ગળું દબાવી દીધું, જેના કારણે તેનું ઘટનાસ્થળે જ મોત નીપજ્યું હતું.”
હત્યા કર્યા બાદ વિરાટે ગુનો છુપાવવા માટે એક પ્લાન બનાવ્યો. તેણે નેહાની લાશને વાદળી ડ્રમમાં પેક કરી અને રાતના અંધારામાં વાહન દ્વારા ડીસીડબલ્યુ પુલ પાસે ફેંકીને ફરાર થઈ ગયો. હાલ પોલીસે આરોપીને કોર્ટમાં રજૂ કરી રિમાન્ડ મેળવવાની પ્રક્રિયા શરૂ કરી છે. આ હત્યામાં અન્ય કોઈની મદદ લેવાઈ હતી કે નહીં, તે અંગે પણ પોલીસ તપાસ કરી રહી છે.
