મહિલા T20 એશિયા કપ 2026માં ભારતીય ટીમ સામે ગ્રુપ સ્ટેજની મેચમાં શરમજનક હારનો સામનો કરવા છતાં પાકિસ્તાની મહિલા ટીમનો અહંકાર ઓછો થઈ રહ્યો નથી. ટીમના મેન્ટર વાહબ રિયાઝ હજુ પણ એશિયા કપની ટ્રોફી જીતવાનું સ્વપ્ન જોઈ રહ્યા છે.
દુબઈ ઈન્ટરનેશનલ ક્રિકેટ સ્ટેડિયમમાં રમાયેલી આ મેચમાં પાકિસ્તાની ટીમ માત્ર 55 રનમાં ઓલઆઉટ થઈ ગઈ હતી, જેને ભારતીય ટીમે માત્ર 3 વિકેટ ગુમાવીને સરળતાથી જીતી લીધી હતી. આ હાર બાદ પાકિસ્તાને સેમિફાઇનલમાં પહોંચવા માટે ગ્રુપ સ્ટેજની પોતાની છેલ્લી મેચ કોઈપણ સંજોગોમાં જીતવી પડશે. આટલી ખરાબ હાર છતાં ભૂતપૂર્વ ખેલાડી અને મેન્ટર વાહબ રિયાઝે પ્રેસ કોન્ફરન્સમાં દાવો કર્યો હતો કે તેમની ટીમ હજુ પણ એશિયા કપ જીતી શકે છે.
“એશિયા કપ જીતવા માટે પાકિસ્તાન સૌથી શ્રેષ્ઠ ટીમ”
પ્રેસ કોન્ફરન્સમાં વાહબ રિયાઝે સ્વીકાર્યું કે ટીમ ખરાબ રીતે હારી છે, પરંતુ સેમિફાઇનલમાં પહોંચવાની તક હજુ બાકી છે. તેમણે જણાવ્યું:
“મને હજુ પણ લાગે છે કે આ એશિયા કપની ટ્રોફી જીતવા માટે પાકિસ્તાન સૌથી શ્રેષ્ઠ ટીમ છે. મેચની પીચ બેટિંગ માટે સારી હતી અને ટોસ જીતીને પહેલા બેટિંગ કરવાનો નિર્ણય સાચો હતો, પરંતુ અમારા ખેલાડીઓ આ મોટા મુકાબલાનું દબાણ સહન કરી શક્યા નહીં.”
માનસિક મજબૂતી પર કામ કરવાની જરૂરિયાત
ભારત સામેની મેચમાં પાકિસ્તાની ખેલાડીઓ પર દબાણ સ્પષ્ટપણે દેખાઈ રહ્યું હતું. વાહબ રિયાઝે ઉમેર્યું કે તેઓ ખેલાડીઓની માનસિક મજબૂતી પર કામ કરશે અને તેમણે ક્યાં ભૂલો કરી તે અંગે ચર્ચા કરશે. પાકિસ્તાનની હવે પછીની મેચ હોંગકોંગ સામે છે.
