ગુજરાતમાં સાર્વત્રિક અને સારો વરસાદ થતાં વાવેતરને જબરદસ્ત વેગ મળ્યો છે. ચાલુ ખરીફ સિઝન (2026) માં ખેડૂતોએ મોટા પાયે વાવણી કરી છે. કૃષિ વિભાગના આંકડા મુજબ, રાજ્યના કુલ વિસ્તારમાંથી 59.26 લાખ હેક્ટરમાં વાવેતર થઈ ચૂક્યું છે. એટલે કે અત્યાર સુધીમાં અંદાજિત 70 ટકા જેટલું વાવેતર પૂર્ણ થઈ ગયું છે.
રોકડિયા પાકો અને તેલીબિયાંની બોલબાલા
ખેડૂતોનો સૌથી વધુ ઝુકાવ તેલીબિયાં અને રોકડિયા પાકો તરફ જોવા મળ્યો છે.
-
કપાસ અને મગફળી: કુલ વાવેતરમાં 63 ટકાથી વધુ હિસ્સો માત્ર આ બે પાકોનો છે.
-
કપાસ: રાજ્યમાં સૌથી વધુ 20 લાખ હેક્ટરમાં કપાસનું વાવેતર થયું છે.
-
મગફળી: કપાસ બાદ બીજા ક્રમે મગફળી છે, જેનું 17.50 લાખ હેક્ટરથી વધુ વિસ્તારમાં વાવેતર થયું છે.
સોયાબીન અને કઠોળના વાવેતરમાં પણ નોંધપાત્ર વધારો
ચાલુ સિઝનમાં સોયાબીન વાવવામાં ખેડૂતોએ ભારે ઉત્સાહ બતાવ્યો છે.
-
સોયાબીન: સામાન્ય વાવેતર વિસ્તારની સામે અત્યાર સુધીમાં 99 ટકા (2.79 લાખ હેક્ટર) વિસ્તારમાં સોયાબીનનું વાવેતર થયું છે.
-
સામાન્ય વાવેતરની ટકાવારી: મગફળીનું 91%, મકાઈનું 90%, અડદનું 86% અને કપાસનું 84% વાવેતર પૂર્ણ થઈ ચૂક્યું છે.
-
કઠોળ પાકો: ગત વર્ષના 2.52 લાખ હેક્ટરની સામે આ વર્ષે કઠોળનું વાવેતર વધીને 2.85 લાખ હેક્ટર થયું છે. જેમાં તુવેર (1.94 લાખ) અને અડદ (70,772 હેક્ટર) મુખ્ય છે.
ધાન્ય પાકો અને અન્ય પાકોની સ્થિતિ
રાજ્યમાં ધાન્ય પાકોનું કુલ 8.39 લાખ હેક્ટરમાં વાવેતર કરવામાં આવ્યું છે.
-
ડાંગર અને મકાઈ: 4.63 લાખ હેક્ટર સાથે ડાંગર પ્રથમ અને 2.54 લાખ હેક્ટર સાથે મકાઈ બીજા ક્રમે છે. આગામી દિવસોમાં ડાંગરના વાવેતરમાં હજુ વધારો થવાની સંભાવના છે.
-
જુવાર: આ વર્ષે જુવારનું વાવેતર 10,301 હેક્ટર થયું છે, જે ગત વર્ષની સરખામણીમાં બમણાથી પણ વધુ છે.
-
દિવેલા (એરંડા): દિવેલાનું વાવેતર 52,655 હેક્ટર અને તલનું 7,597 હેક્ટરમાં થયું છે. ઓગસ્ટમાં દિવેલાનું વાવેતર વધવાની પુરેપુરી શક્યતા છે.
અન્ય પાકોની વાત કરીએ તો, રાજ્યમાં ઘાસચારાનું 5.21 લાખ હેક્ટરમાં, શાકભાજીનું 1.71 લાખ હેક્ટરમાં અને બાજરાનું 1.06 લાખ હેક્ટરમાં વાવેતર પૂર્ણ થયું છે.
