ટ્રેનમાં મુસાફરી કરતા લાખો મુસાફરો માટે ભારતીય રેલવે દ્વારા મહત્વના સુરક્ષા નિર્દેશો જારી કરવામાં આવ્યા છે. રાત્રિના સમયે ટ્રેનના ડબ્બાઓમાં મોબાઈલ અને લેપટોપ ચાર્જિંગ પોઈન્ટ બંધ રાખવાના જૂના નિયમને હવે અત્યંત કડકાઈથી લાગુ કરવાનો આદેશ આપવામાં આવ્યો છે. રેલવે બોર્ડે તમામ ઝોનલ રેલવેને સ્પષ્ટ સૂચના આપી છે કે રાત્રે ૧૧:૦૦ વાગ્યાથી સવારે ૫:૦૦ વાગ્યા સુધી કોચમાં તમામ ચાર્જિંગ સોકેટ્સ ફરજિયાતપણે બંધ રાખવામાં આવે.
આ સમયગાળા દરમિયાન મુસાફરોને કોઈ પણ પ્રકારની છૂટછાટ આપવામાં આવશે નહીં. મુસાફરોની સુરક્ષા સુનિશ્ચિત કરવા અને રાત્રિ દરમિયાન આગના જોખમો ટાળવા માટે આ પગલું લેવામાં આવ્યું છે.
રેલવે ચાર્જિંગ સમય અને નિયમો એક નજરે
પાવર બેંક ફાટવાની ઘટના બાદ તંત્રે લીધો કડક નિર્ણય
દક્ષિણ પૂર્વ રેલવે (South Eastern Railway) માં મુસાફરી દરમિયાન ચાર્જિંગમાં મુકેલી એક પાવર બેંક અચાનક ફાટવાની ગંભીર ઘટના સામે આવી હતી. પ્રાથમિક તપાસમાં ખુલાસો થયો હતો કે દુર્ઘટના સમયે રાત્રિના નિયત કલાકો હોવા છતાં કોચમાં ચાર્જિંગ પોઈન્ટ સ્વિચ ઓફ કરવામાં આવ્યા નહોતા.
આ ઘટનાને અત્યંત ગંભીરતાથી લઈને રેલવે બોર્ડે કડક વલણ અપનાવ્યું છે. ઉલ્લેખનીય છે કે રેલવે દ્વારા અગાઉ ૧૯ જૂન ૨૦૧૪ અને માર્ચ ૨૦૨૧ માં પણ આ સંદર્ભે પરિપત્રો જારી કરવામાં આવ્યા હતા, પરંતુ હવે તેનું પાલન ૧૦૦% સુનિશ્ચિત કરવામાં આવશે. રાત્રે ઊંઘ દરમિયાન મોબાઈલ કે પાવર બેંક ઓવરચાર્જ થવાથી ગરમ થઈને ફાટવાનું અને શોર્ટ સર્કિટથી ટ્રેનમાં આગ લાગવાનું જોખમ રહે છે.
સ્ટાફની જવાબદારી અને ટ્રેનોમાં સરપ્રાઈઝ ચેકિંગ
-
કર્મચારીઓ સામે કાર્યવાહી: રેલવે બોર્ડે ઓનબોર્ડ સ્ટાફ અને ઇલેક્ટ્રિકલ એટેન્ડન્ટ્સને નિર્ધારિત સમયે મેઈન સ્વિચથી જ સોકેટ્સ બંધ કરવા આદેશ આપ્યા છે. જો કોઈ સ્ટાફની બેદરકારી જણાશે તો તેમની સામે શિક્ષાત્મક પગલાં લેવાશે.
-
અચાનક તપાસ: નિયમોનું યોગ્ય પાલન થાય છે કે નહીં તે ચકાસવા માટે રેલવે અધિકારીઓ અને સુપરવાઈઝરો રાત્રિ દરમિયાન ટ્રેનોમાં અચાનક સરપ્રાઈઝ ચેકિંગ કરશે.
-
મુસાફરોને અપીલ: રેલવે પ્રશાસને યાત્રીઓને સલાહ આપી છે કે રાત્રિની મુસાફરી શરૂ કરતાં પહેલાં જ પોતાના ગેજેટ્સ પૂરતા પ્રમાણમાં ચાર્જ કરી લેવા જેથી રાત્રે અગવડ ન પડે.
