અમદાવાદ શહેરમાં આગામી દિવસોમાં સર્જાનારી સંભવિત પાણીની કટોકટીને પહોંચી વળવા માટે અમદાવાદ મ્યુનિસિપલ કોર્પોરેશન (AMC) દ્વારા સઘન આયોજન હાથ ધરવામાં આવ્યું છે. ઉચ્ચ અધિકારીઓ સ્થિતિ નિયંત્રણમાં હોવાનો દાવો કરી રહ્યા હોવા છતાં, ઉનાળા પૂર્વે જળ સંકટ ન સર્જાય તે માટે તંત્રે અંદરખાને યુદ્ધના ધોરણે તૈયારીઓ શરૂ કરી દીધી છે.
આ આયોજન અંતર્ગત મહાનગરપાલિકા દ્વારા શહેરના ચાર મુખ્ય ઝોનમાં ૧,૦૦૦ ફૂટ (૩૧૦ મીટર) ની ઊંડાઈ ધરાવતા કુલ ૧૨ નવા બોરવેલ બનાવવાની કવાયત તેજ કરવામાં આવી છે.
વોટર કમિટીમાં ₹૩.૯૯ કરોડના ખર્ચની દરખાસ્ત
-
કમિટીની મંજૂરી: મ્યુનિસિપલ કોર્પોરેશનની વોટર સપ્લાય એન્ડ સુઅરેજ કમિટીની બેઠકમાં ૪ અલગ-અલગ એજન્સીઓને આ કામગીરી સોંપવા અંગે ₹૩.૯૯ કરોડની દરખાસ્ત મંજૂરી અર્થે મૂકવામાં આવી છે.
-
એક બોરવેલ પાછળ ₹૩૩.૩૦ લાખનો ખર્ચ: ૩૫૦ x ૨૫૦ એમએમ ડાયા અને ૩૧૦ મીટર ઊંડાઈવાળા પ્રત્યેક બોરવેલનો અંદાજિત ખર્ચ ₹૩૩.૩૦ લાખ નક્કી કરાયો છે, જેમાં ડ્રિલિંગ, ડેવલપિંગ, પાઇપ એસેમ્બલી અને ગુણવત્તાયુક્ત મટિરિયલનો સમાવેશ થાય છે.
-
અન્ય ઝોનમાં પણ થશે કામગીરી: પ્રથમ તબક્કા બાદ શહેરના બાકી રહેતા અન્ય ત્રણ ઝોનમાં પણ જરૂરિયાત મુજબ આ જ પ્રકારે ઊંડા બોરવેલ તૈયાર કરવામાં આવશે.
કયા ૪ ઝોન અને વિસ્તારોમાં બનશે આ બોરવેલ?
આ ૧૨ બોરવેલ મુખ્યત્વે પશ્ચિમ ઝોન, મધ્ય ઝોન, ઉત્તર-પશ્ચિમ ઝોન અને દક્ષિણ-પશ્ચિમ ઝોન માં જરૂરિયાતવાળા સ્થળોએ બનાવવામાં આવશે:
૧. છેવાડાના વિસ્તારો: વોટર ડિસ્ટ્રિબ્યુશન સ્ટેશન (WDS) ના નેટવર્કથી દૂર આવેલા અને જ્યાં નિયમિત લાઈનથી પાણી પહોંચતું ન હોય તેવા છેવાડાના પોકેટ્સ.
૨. બોરવેલ વગરના WDS: જે વોટર ડિસ્ટ્રિબ્યુશન સ્ટેશનના કમ્પાઉન્ડમાં હાલ કોઈ સપોર્ટિંગ બોરવેલ કાર્યરત નથી તેવા સ્થળો.
૩. બંધ પડેલા બોરવેલ: જ્યાં વર્ષો જૂના હયાત બોરવેલ ફેલ થઈ ગયા હોય અથવા ટેકનિકલ ખામીને લીધે બંધ પડ્યા હોય.
૪. નવી આયોજિત જગ્યાઓ: તંત્ર દ્વારા ભૌગોલિક સર્વેના આધારે નક્કી કરવામાં આવેલા નવા લોકેશન્સ પર આ બોરવેલ ખોદવામાં આવશે.
