કૉકપિટમાં હુમલા બાદ ફ્લાઇટમાં મચી ભારે અફરાતફરી: કેપ્ટન સ્મિત મચ્છાર લોહીલુહાણ હાલતમાં દેખાયા, અંદરનો ભયાનક વીડિયો સામે આવ્યો

fly dubai : દુબઈથી તેલ અવીવ જઈ રહેલી ફ્લાયદુબઈ (Flydubai) ની ફ્લાઇટ FZ1073 માં ભારતીય મૂળના જાંબાઝ પાયલટ કેપ્ટન સ્મિત મચ્છાર પર થયેલા જીવલેણ હુમલા બાદ પ્લેનની અંદર સર્જાયેલી અંધાધૂંધી અને ચીસાચીસનો કંપાવી દેતો વીડિયો સામે આવ્યો છે. આ વીડિયો કૉકપિટની નજીકની સીટ પર બેઠેલા એક મુસાફરે પોતાના મોબાઈલ કેમેરામાં કેદ કર્યો હતો, જે હવે સોશિયલ મીડિયા અને આંતરરાષ્ટ્રીય સ્તરે ભારે વાયરલ થઈ રહ્યો છે.

વીડિયો ફૂટેજમાં સ્પષ્ટ દેખાય છે કે કઈ રીતે મુસાફરો અને કેબિન ક્રૂએ જીવના જોખમે ઓમાનના આતંકી કો-પાઇલટને કાબૂમાં રાખીને વિમાનને ક્રેશ થતું અટકાવ્યું હતું.

વીડિયોમાં શું જોવા મળ્યું? ‘તેણે વિમાન ક્રેશ કરવાનો પ્રયાસ કર્યો’

ઈઝરાયલના અગ્રણી ટીવી બ્રોડકાસ્ટર પર પ્રસારિત થયેલા આ ક્લિપમાં મુસાફરો હિબ્રૂ અને અંગ્રેજીમાં ગભરાયેલા અવાજે બૂમો પાડતા સંભળાય છે:

• મુસાફરોનો આક્રોશ: એક મુસાફર ચીસ પાડીને કહે છે, “આ વ્યક્તિએ પ્લેન ક્રેશ કરવાનો પ્રયાસ કર્યો છે!” જ્યારે અન્ય એક વ્યક્તિ સ્થિતિ કાબૂમાં લેવા માટે લોકોને શાંત રહેવા અને પોતાની સીટ પર બેસી જવા વિનંતી કરતો સંભળાય છે.

• ડૉક્ટરની શોધ: કેબિનમાં હાજર ક્રૂ મેમ્બર ગભરાટમાં પૂછે છે, “શું ફ્લાઇટમાં કોઈ ડૉક્ટર છે?” વારંવાર પૂછ્યા બાદ મુસાફરી કરી રહેલા એક ડેન્ટિસ્ટ ડૉ. શોતા મુસાયેવ તાત્કાલિક કૉકપિટ તરફ દોડી જાય છે.

• લોહીલુહાણ કેપ્ટન મચ્છાર: ફૂટેજમાં કેપ્ટન સ્મિત મચ્છાર કૉકપિટના દરવાજા બહાર ફ્લોર પર પોતાના જ લોહીના ખાબોચિયામાં પડેલા જોવા મળે છે. તેઓ અત્યંત પીડા સાથે જણાવતા સંભળાય છે કે સહ-ચાલકે તેમના પર “વારંવાર ચપ્પુના ઘા ઝીંક્યા છે.” તેઓ એવું પણ કહે છે કે તેઓ હાથ હલાવી શકે છે પરંતુ આંગળીઓની મુઠ્ઠી વાળી શકતા નથી.

હુમલાખોર કો-પાઇલટને ફ્લોર પર બાંધી દેવાયો

વીડિયોમાં આગળની ક્ષણોમાં આતંકી કો-પાઇલટની સ્થિતિ પણ સ્પષ્ટ દેખાય છે:

• વિમાનના ફ્લોર પર દીવાલ તરફ મોં રાખીને ઘૂંટણિયે બેસાડેલા હુમલાખોરના હાથ પાછળની તરફ મજબૂતીથી બાંધેલા જોવા મળે છે.

• તેનો યુનિફોર્મ પણ લોહીથી ખરડાયેલો હતો અને કેબિન ક્રૂ તેમજ મુસાફરો તેને ચારેય તરફથી ઘેરીને ઊભા હતા.

• એક ક્રૂ મેમ્બરે અંગ્રેજીમાં કહ્યું, “આ એક આતંકવાદી છે, તમે સમજો છો ને? આપણને તાત્કાલિક પોલીસની જરૂર છે.” સામે મુસાફરોએ ખાતરી આપી હતી કે જ્યાં સુધી પોલીસ અંદર ન આવે ત્યાં સુધી કોઈ તેને ભાગવા નહીં દે.

લેન્ડિંગ બાદ પ્રાથમિક સારવાર અને તપાસ તેજ

વીડિયોના અંતિમ ભાગમાં સાઉદી અરેબિયાના તબુક એરપોર્ટ પર ઈમરજન્સી લેન્ડિંગ પછીના દ્રશ્યો છે:

• વિમાનના ગેટ બહાર એક ઊંચા પ્લેટફોર્મ પર સાઉદી મેડિકલ ટીમ કેપ્ટન મચ્છારને પટ્ટીઓ લગાવીને તાત્કાલિક સ્ટ્રેચર પર હોસ્પિટલ લઈ જતી જોવા મળે છે.

• દરમિયાન, હુમલાખોર કો-પાઇલટને સાઉદી કસ્ટડીમાંથી યુએઈ (UAE) સત્તાવાળાઓને સોંપી દેવામાં આવ્યો છે.

અબુ ધાબી સુરક્ષા એજન્સીઓએ સત્તાવાર જાહેરાત કરી છે કે તેઓ એ બાબતની ઊંડાણપૂર્વક તપાસ કરી રહ્યા છે કે શું આ ઘટના કોઈ મોટા આંતરરાષ્ટ્રીય આતંકવાદી સંગઠનનું પૂર્વઆયોજિત ષડયંત્ર હતું કે પછી કોઈ વિદેશી નિર્દેશોના આધારે આ હિચકારો હુમલો કરવામાં આવ્યો હતો.