દિલ્હીના જંતર-મંતર પર પેપર લીક અને શિક્ષણ મંત્રી ધર્મેન્દ્ર પ્રધાનના રાજીનામાની માંગ સાથે થઈ રહેલા વિરોધ પ્રદર્શન વચ્ચે મોટા સમાચાર સામે આવ્યા છે. શુક્રવારે દિલ્હીના કન્સ્ટીટ્યુશન ક્લબ ખાતે સરકાર અને કોકરોચ જનતા પાર્ટી (CJP) વચ્ચે મહત્વની બેઠક યોજાઈ હતી.
બીજી તરફ, એક્ટિવિસ્ટ સોનમ વાંગચુકે લેખિત આશ્વાસન મળ્યા બાદ કેન્દ્રીય મંત્રી જે.પી. નડ્ડાના હાથે પારણા કરીને પોતાના ઉપવાસ પૂરા કર્યા છે.
સરકાર અને CJP વચ્ચે 2 કલાક ચાલી બેઠક
કેન્દ્રીય મંત્રી જે.પી. નડ્ડા અને જિતેન્દ્ર સિંહે CJP ના પ્રતિનિધિઓ સૌરભ દાસ અને આશુતોષ રાંકા સાથે ચર્ચા કરી હતી. આ બેઠક લગભગ 2 કલાક સુધી ચાલી હતી.
બેઠક બાદ કેન્દ્રીય મંત્રી જે.પી. નડ્ડાએ જણાવ્યું કે CJP ના નેતાઓ સાથે સકારાત્મક ચર્ચા થઈ છે. તેમણે 3 મુખ્ય માંગણીઓ અને પરીક્ષાઓમાં સુધારા માટે 5 સૂચનો મૂક્યા છે. શુક્રવારે બપોરે ફરી એકવાર બેઠક યોજાશે.
CJP ની મુખ્ય 3 માંગણીઓ
CJP દ્વારા સરકાર સામે નીચે મુજબની મુખ્ય માંગણીઓ રાખવામાં આવી છે:
-
કેસ પાછા ખેંચવા: વિરોધ કરી રહેલા વિદ્યાર્થીઓ પર દાખલ કરાયેલી એફઆઈઆર (FIR) રદ કરવામાં આવે.
-
રાજીનામું: શિક્ષણ મંત્રી ધર્મેન્દ્ર પ્રધાન તાત્કાલિક ધોરણે રાજીનામું આપે.
-
વળતર: પીડિત પરિવારને ₹1-1 કરોડનું વળતર આપવામાં આવે.
2 શરતો પર સરકારની સૈદ્ધાંતિક મંજૂરી
CJP ના રાષ્ટ્રીય પ્રવક્તા આશુતોષ રાંકાએ જણાવ્યું કે સરકારે 2 માંગણીઓ સ્વીકારી લીધી છે:
-
આત્મહત્યા કરનાર વિદ્યાર્થીઓના પરિવારને વળતર આપવું.
-
વિદ્યાર્થીઓ પર થયેલા કાનૂની કેસ અને FIR પાછા ખેંચવા.
જોકે, શિક્ષણ મંત્રીના રાજીનામા અંગે સરકારે નિર્ણય લેવા માટે સમય માગ્યો છે. CJP નું કહેવું છે કે જ્યાં સુધી શિક્ષણ મંત્રી રાજીનામું નહીં આપે ત્યાં સુધી જંતર-મંતર પર આંદોલન ચાલુ રહેશે.
પેપર લીક સામે સરકાર લાવશે કડક કાયદો
દેશમાં પેપર લીકની ઘટનાઓ રોકવા માટે સરકાર કડક કાયદો લાવવાની તૈયારી કરી રહી છે. કેબિનેટ બેઠકમાં આ અંગેના મુસદ્દા પર ચર્ચા થઈ છે.
-
ઝડપી સુનાવણી: ફાસ્ટ ટ્રેક કોર્ટ દ્વારા 3 મહિનાની અંદર નિર્ણય લેવાશે.
-
કડક સજા: નવા કાયદામાં 10 વર્ષ સુધીની જેલની જોગવાઈ હશે.
-
ભારે દંડ: દોષિતો પર ₹10 કરોડ સુધીનો દંડ ફટકારાઈ શકે છે.
સોમવારે આ બિલ સંસદના પટલ પર રજૂ કરવામાં આવે તેવી શક્યતા છે.
