મુંબઈ અને આસપાસના વિસ્તારોમાં સતત થઈ રહેલા મુસળધાર વરસાદને કારણે જનજીવન અસ્તવ્યસ્ત થઈ ગયું છે. આ ભારે વરસાદની સૌથી મોટી અસર હવે હવાઈ મુસાફરી પર જોવા મળી રહી છે. મુંબઈના છત્રપતિ શિવાજી મહારાજ ઇન્ટરનેશનલ એરપોર્ટ પર સોમવારે ફ્લાઇટ્સનું શેડ્યૂલ ખોરવાઈ ગયું છે.
૧૭ ફ્લાઇટ્સ રદ, ૫ ડાયવર્ટ કરાઈ
ખરાબ હવામાન અને ઓછી વિઝિબિલિટીના કારણે સોમવારે સાંજ સુધીમાં ૧૭ સ્થાનિક અને આંતરરાષ્ટ્રીય ફ્લાઇટ્સ રદ કરવી પડી છે. આ ઉપરાંત ૫ વિમાનોને મુંબઈમાં લેન્ડિંગ ન મળતા અમદાવાદ, વડોદરા અને હૈદરાબાદ તરફ ડાયવર્ટ કરવામાં આવ્યા છે.
૩૬૫થી વધુ ફ્લાઇટ્સ કલાકો મોડી
વરસાદના કારણે એરપોર્ટ પર વિમાનોની અવરજવર ખૂબ ધીમી પડી ગઈ છે. લગભગ ૩૬૫થી વધુ ફ્લાઇટ્સ તેના નિયત સમય કરતાં કલાકો મોડી ચાલી રહી છે. એરપોર્ટ પરથી ઉપડતી ૮૯% ફ્લાઇટ્સ અને આવતી ૮૪% ફ્લાઇટ્સ મોડી થતાં હજારો મુસાફરો અટવાઈ પડ્યા છે. ઈન્ડિગો અને આકાસા એરે મુસાફરો માટે એડવાઈઝરી જાહેર કરીને એરપોર્ટ આવતા પહેલા ફ્લાઇટ સ્ટેટસ ચેક કરવા અપીલ કરી છે.
પાડોશી શહેર પૂણેમાં પણ આકાશી આફત
મુંબઈની સાથે સાથે પાડોશી શહેર પૂણેમાં પણ મેઘરાજાએ તોફાની બેટિંગ શરૂ કરી છે. પૂણે અને તેની આસપાસના વિસ્તારોમાં ભારે વરસાદના કારણે રસ્તાઓ પર પાણી ભરાઈ ગયા છે. ટ્રાફિક જામની સમસ્યાના કારણે લોકોને મુશ્કેલી પડી રહી છે. હવામાન વિભાગે પૂણેમાં પણ ભારે વરસાદનું એલર્ટ આપ્યું છે. પૂણેના ખરાબ હવામાનને કારણે ત્યાંની ફ્લાઇટ્સના સંચાલન પર પણ તેની માઠી અસર પડી શકે છે.
મુસાફરો માટે મહત્વની સલાહ
હવામાન વિભાગે આગામી સમયમાં મુંબઈ, પૂણે અને ગોવા સહિતના વિસ્તારોમાં ભારે વરસાદની આગાહી કરી છે. જો તમે પણ આગામી કલાકોમાં હવાઈ મુસાફરી કરવાના હોવ, તો એરપોર્ટ જવા નીકળતા પહેલા તમારી એરલાઇનની વેબસાઇટ કે એપ પર જઈને ફ્લાઇટનું લાઈવ સ્ટેટસ ચોક્કસ ચેક કરી લો.
