ઈન્ડિયન પ્રીમિયર લીગ (IPL 2027) ની આગામી સિઝન પહેલાં પાંચ વખતની ચેમ્પિયન ફ્રેન્ચાઈઝી મુંબઈ ઈન્ડિયન્સ (Mumbai Indians) ના સપોર્ટ સ્ટાફમાં વ્યાપક ફેરફારો જોવા મળ્યા છે. ભારતીય ટીમના ભૂતપૂર્વ વિસ્ફોટક બેટ્સમેન રોબિન ઉથપ્પા (Robin Uthappa) ની શુક્રવારે ટીમના નવા બેટિંગ કોચ તરીકે નિમણૂક કરવામાં આવી છે.
૨૦૦૭ ના પ્રથમ મેન્સ T20 વર્લ્ડ કપ વિજેતા ભારતીય ટીમના સભ્ય રહેલા ૪૦ વર્ષીય ઉથપ્પા ૨૦૦૮ ની પ્રથમ આઈપીએલ સિઝનમાં મુંબઈ ઈન્ડિયન્સ તરફથી ખેલાડી તરીકે રમી ચૂક્યા છે. હવે ૧૮ વર્ષ બાદ તેઓ એક નવી અને મહત્વની ભૂમિકામાં ‘પલટન’ સાથે પુનઃ જોડાયા છે.
મુંબઈ ઈન્ડિયન્સ કોચિંગ સ્ટાફમાં ફેરબદલ એક નજરે
‘રોબી ટીમમાં પાછો ફર્યો’: ફ્રેન્ચાઈઝીએ કર્યું ભવ્ય સ્વાગત
રોબિન ઉથપ્પાની નિમણૂકની જાહેરાત કરતાં મુંબઈ ઈન્ડિયન્સે પોતાના સત્તાવાર સોશિયલ મીડિયા એકાઉન્ટ X પર લખ્યું:
“અમારી પ્રથમ સીઝનનો હિસ્સો બનવાથી લઈને વિરાટ અનુભવ સાથે પરત ફરવા સુધી! રોબી રમતની ઊંડી સમજ, ઉત્કૃષ્ટ સંવાદ કૌશલ્ય અને યુવા ખેલાડીઓને યોગ્ય માર્ગદર્શન આપવાની સ્પષ્ટતા લાવે છે. પલટનમાં પુનઃ સ્વાગત છે, રોબિન!”
કિરોન પોલાર્ડનું પ્રમોશન અને સપોર્ટ સ્ટાફમાં ઓવરહોલ
મુંબઈ ઈન્ડિયન્સ ફ્રેન્ચાઈઝીએ આગામી સિઝન માટે પોતાના સમગ્ર સપોર્ટ સ્ટાફની પુનઃરચના શરૂ કરી છે:
-
પોલાર્ડને હેડ કોચની કમાન: ગયા અઠવાડિયે જ ટીમના લાંબા સમયના મુખ્ય કોચ મહેલા જયવર્દનેની જગ્યાએ બેટિંગ કોચ કિરોન પોલાર્ડને હેડ કોચ તરીકે પ્રમોટ કરવામાં આવ્યા હતા.
-
ત્રણ દિગ્ગજ કોચ છૂટા થયા: ગુરુવારે ફ્રેન્ચાઈઝીએ બોલિંગ કોચ લસિથ મલિંગા, પારસ મ્હામ્બ્રે તેમજ ફીલ્ડિંગ કોચ કાર્લ હોપકિન્સન સાથેનો કરાર પૂર્ણ કરી તેમને વિદાય આપી હતી.
આઈપીએલ ૨૦૨૭ પૂર્વે થયેલા આ ધરખમ ફેરફારો બાદ હવે મુંબઈ ઈન્ડિયન્સ નવી રણનીતિ અને નવા વિચાર સાથે મેદાનમાં ઉતરવાની તૈયારી કરી રહ્યું છે. ઉથપ્પાના અનુભવનો લાભ ખાસ કરીને ટીમના યુવા બેટ્સમેનોને મળશે.
