બેંગલુરુ: કર્ણાટક વિધાન પરિષદ (MLC) ચૂંટણીમાં મોટો ઉલટફેર જોવા મળ્યો છે. ચૂંટણીમાં થયેલા ક્રોસ વોટિંગને કારણે ભારતીય જનતા પાર્ટી (BJP) કડક મૂડમાં છે. ભાજપના કેન્દ્રીય નેતૃત્વએ આ સમગ્ર મામલાને ગંભીરતાથી લીધો છે.
ભાજપના રાષ્ટ્રીય પ્રમુખ નિતિન નવીને કર્ણાટક ભાજપના અધ્યક્ષ બી.વાય. વિજયેન્દ્ર સહિતના મોટા નેતાઓને દિલ્હી તેડાવ્યા છે. બીજી તરફ, કોંગ્રેસના નેતા ડી.કે. શિવકુમારે પોતાની રણનીતિથી કોંગ્રેસને અપેક્ષા કરતા 11 મતો વધારે અપાવ્યા છે.
ભાજપ હાઈકમાન્ડ નારાજ, 23 જૂને બેઠક
સૂત્રોના જણાવ્યા અનુસાર, ભાજપ અધ્યક્ષ નિતિન નવીને ક્રોસ વોટિંગ પર ભારે નારાજગી વ્યક્ત કરી છે. તેમણે કર્ણાટક ભાજપના પ્રદેશ અધ્યક્ષ વિજયેન્દ્ર યેદિયુરપ્પા અને અન્ય વરિષ્ઠ નેતાઓને આગામી 23 જૂને દિલ્હી બોલાવ્યા છે. દિલ્હીમાં આ મામલે મોટી સમીક્ષા બેઠક યોજાશે.
કોંગ્રેસે 7માંથી 5 બેઠકો જીતી
કર્ણાટકમાં સત્તાધારી કોંગ્રેસ પક્ષે શાનદાર પ્રદર્શન કર્યું છે. વિધાન પરિષદની 7 બેઠકોમાંથી કોંગ્રેસે 5 બેઠકો પર જીત મેળવી છે. જ્યારે વિરોધ પક્ષ ભાજપને માત્ર 2 બેઠકો મળી છે. જેડીએસ (JDS) ના ઉમેદવારને આ ચૂંટણીમાં હારનો સામનો કરવો પડ્યો છે. કોંગ્રેસને કુલ 151 વોટ મળ્યા છે, જે તેમની અપેક્ષા (140 વોટ) કરતા 11 વધારે છે.
કોંગ્રેસના ક્યા ઉમેદવારો જીત્યા?
-
થિપ્પનપ્પા કામકનૂર
-
પી. વી. મોહન
-
બી. કે. હરિપ્રસાદ
-
શિવન્ના બી. એસ.
-
વિનય કાર્તિક પ્રકાશ
ભાજપ તરફથી લિંગરાજ પાટીલ અને રઘુ આર. ચૂંટણી જીતવામાં સફળ રહ્યા છે. જ્યારે જેડીએસના એકમાત્ર ઉમેદવાર ગોવિંદરાજુ હારી ગયા છે.
11 ધારાસભ્યોએ કર્યું ક્રોસ વોટિંગ
મળતી માહિતી મુજબ, ભાજપના 3 અને જેડીએસના 8 ધારાસભ્યોએ કોંગ્રેસના ઉમેદવારોની તરફેણમાં મતદાન કર્યું છે. આ ઉપરાંત ભાજપના એક ધારાસભ્યનો વોટ અમાન્ય (Invalid) જાહેર થયો હતો. ભાજપના વરિષ્ઠ નેતા આર. અશોકે જણાવ્યું કે, પાર્ટી સાથે ગદ્દારી કરનારાઓની ઓળખ કરવામાં આવશે અને તેમની સામે કડક પગલાં લેવાશે.
વિજયેન્દ્રએ કહ્યું- ‘અમે ડરીને ભાગનારા નથી’
આ હાર અને ક્રોસ વોટિંગ બાદ ભાજપ બેકફૂટ પર હોવાની ચર્ચાઓ શરૂ થઈ છે. જોકે, પ્રદેશ અધ્યક્ષ બી.વાય. વિજયેન્દ્રએ આ વાતોને ફગાવી દીધી છે. તેમણે બેંગલુરુમાં પત્રકારોને કહ્યું કે, “પાર્ટી આ પરિણામોને ગંભીરતાથી લઈ રહી છે. અમારી પાસે સ્થિતિનો સામનો કરવાની પૂરી તાકાત છે. ડરીને મેદાન છોડવાનો કોઈ સવાલ જ નથી. ભાજપનું સંગઠન મજબૂત છે અને અમે કોંગ્રેસ સરકારને પડકાર આપતા રહીશું.”
< /p>
