ગુજરાતમાં ચોમાસાનો માહોલ જામ્યો છે. રાજ્યના 57થી વધુ તાલુકામાં ભારે વરસાદ નોંધાયો છે. ખાસ કરીને દક્ષિણ ગુજરાતમાં મેઘરાજા ધમાકેદાર બેટિંગ કરી રહ્યા છે. શુક્રવારે સુરત અને વલસાડ સહિતના જિલ્લાઓમાં મુશળધાર વરસાદ વરસ્યો છે.
સુરતમાં ધોધમાર વરસાદ થી રસ્તાઓ પાણી-પાણી
સુરત શહેરમાં સાંજના સમયે અચાનક ધોધમાર વરસાદ તૂટી પડ્યો હતો. ઉધના, સચિન રોડ, વેસુ અને અડાજણમાં ભારે વરસાદ થયો હતો. આ સિવાય કતારગામ, અમરોલી અને વરાછા રોડ પર પણ પાણી ભરાઈ ગયા હતા.
રસ્તાઓ પર પાણી ફરી વળતાં ટ્રાફિક જામની સ્થિતિ સર્જાઈ હતી. ઓફિસેથી ઘરે પરત ફરતા વાહનચાલકો અને સ્થાનિક લોકો ભારે હાલાકીમાં મુકાયા હતા.
કપરાડામાં 3 ઇંચ અને ખેરગામમાં 2 ઇંચ વરસાદ
વલસાડ જિલ્લાના કપરાડામાં માત્ર 4 કલાકમાં 3 ઇંચથી વધુ વરસાદ ખાબક્યો છે. આ તરફ નવસારીના ખેરગામમાં પણ 2 કલાકમાં 2 ઇંચ જેટલો વરસાદ નોંધાયો છે.
ભાવનગર, ડાંગનું વઘઈ, વલસાડનું ધરમપુર અને પારડીમાં પણ 1-1 ઇંચ વરસાદ વરસ્યો છે. આ વરસાદના કારણે નદી-નાળાઓમાં નવા પાણીની આવક થઈ છે.
આગામી 6 દિવસ ભારે વરસાદની આગાહી
હવામાન વિભાગે ગુજરાતના ખેડૂતો અને નાગરિકો માટે મહત્વની આગાહી કરી છે. રાજ્યમાં આગામી 23 જુલાઈ સુધી વરસાદી માહોલ સક્રિય રહેશે. તમામ જિલ્લાઓમાં છૂટાછવાયા સ્થળોએ ગાજવીજ સાથે હળવોથી મધ્યમ વરસાદ પડી શકે છે. દક્ષિણ ગુજરાતમાં હજુ પણ ભારે વરસાદની સંભાવના છે.
