26 વર્ષની અનિશ્ચિતતા બાદ ક્લેમેન્ટ વાનડેનકેરખોવ (Clement Vandenkerckhove) ને કાનૂની રીતે શાહી ઓળખ મળી ગઈ છે અને બેલ્જિયમના રાજવી પરિવારમાં સ્થાન પ્રાપ્ત થયું છે. બેલ્જિયમના કિંગ ફિલિપના નાના ભાઈ પ્રિન્સ લોરેન્ટે 26 વર્ષીય ક્લેમેન્ટને કાનૂની રીતે પોતાના પુત્ર તરીકે સ્વીકારી લીધા છે. ક્લેમેન્ટ અગાઉ કાર સેલ્સમેન તરીકે કામ કરતા હતા, જ્યારે તેમની માતા જાણીતી બેલ્જિયન ગાયિકા વેન્ડી વાન વાન્ટેન છે.
મુખ્ય મુદ્દા (Highlights):
-
DNA ટેસ્ટમાં 99.5% મેચ બાદ પ્રિન્સ લોરેન્ટે ક્લેમેન્ટને કાનૂની પુત્ર સ્વીકાર્યો.
-
અગાઉ કાર સેલ્સમેન તરીકે કામ કરતા ક્લેમેન્ટ હવે પ્રિન્સની અંગત મિલકતના હિસ્સેદાર બન્યા.
-
ક્લેમેન્ટને સિંહાસનનો અધિકાર કે શાહી ભથ્થું (Royal Allowance) નહીં મળે.
DNA રિપોર્ટમાં 99.5 ટકા મેચ
રિપોર્ટ્સ અનુસાર, પ્રિન્સ લોરેન્ટે ક્લેમેન્ટને પોતાના પુત્ર તરીકે સ્વીકારતાં વર્ષોથી ચાલી આવતી અટકળોનો અંત આવ્યો છે. બંને વચ્ચે કરાવવામાં આવેલા DNA ટેસ્ટમાં 99.5 ટકા સમાનતા સામે આવી હતી. આ કાનૂની પ્રક્રિયા આશરે 6 મહિના પહેલાં એક ખાનગી સમારોહમાં પૂર્ણ થઈ હતી.
બે દાયકાથી વધુ સમય સુધી છુપાયેલું રહસ્ય
ક્લેમેન્ટનો જન્મ ઓગસ્ટ 2000 માં થયો હતો, જે પ્રિન્સ લોરેન્ટના 2003 માં ક્લેર કૂમ્બ્સ સાથે થયેલા લગ્ન પહેલાંનો સમયગાળો છે. 90 ના દાયકામાં ક્લેમેન્ટની માતા અને પ્રિન્સ લોરેન્ટ વચ્ચે સંબંધો હતા. એક ટીવી ડોક્યુમેન્ટ્રીમાં ક્લેમેન્ટે પોતાના પારિવારિક ઇતિહાસ અંગે વાત કર્યા બાદ આ રહસ્ય સામે આવ્યું હતું. કાર પ્રત્યેના સમાન રસને કારણે હવે પિતા-પુત્ર વચ્ચેના સંબંધો વધુ મજબૂત બની રહ્યા છે.
શું ક્લેમેન્ટ બનશે બેલ્જિયમના રાજા?
ના, પ્રિન્સના પુત્ર તરીકે કાનૂની માન્યતા મળવા છતાં ક્લેમેન્ટ બેલ્જિયમની ગાદીના ઉત્તરાધિકારી બની શકશે નહીં. તેમને કોઈ સત્તાવાર રોયલ એલાઉન્સ (શાહી ભથ્થું) મળશે નહીં અને તેમની પાસેથી કોઈ રાજવી જવાબદારીઓ નિભાવવાની અપેક્ષા પણ રાખવામાં આવશે નહીં.
અંગત મિલકતમાં મળશે સમાન હક
આ કાનૂની માન્યતાથી ક્લેમેન્ટ હવે પ્રિન્સ લોરેન્ટની અંગત મિલકતમાં સત્તાવાર વારસદાર બન્યા છે. તેઓ પ્રિન્સ લોરેન્ટના અન્ય 3 સંતાનો (રાજકુમારી લુઈસ, જોડિયા પુત્રો પ્રિન્સ નિકોલસ અને પ્રિન્સ એમરિક) સાથે સમાન હિસ્સો ધરાવશે. ક્લેમેન્ટે હજુ સુધી રાજવી પરિવારની અટક ‘સક્સે-કોબર્ગ’ અપનાવવા અંગે અંતિમ નિર્ણય લીધો નથી.
