‘સેવા, સુરક્ષા અને શાંતિ’નું સૂત્ર લઈને ફરતી ગુજરાત પોલીસની કાર્યપ્રણાલી સામે ગંભીર સવાલો ઊભા થયા છે. રાજ્યમાં સામાન્ય નાગરિકો જ્યારે ચોરી કે અસામાજિક તત્વોના ત્રાસ સામે રક્ષણ માગે છે ત્યારે સ્ટાફની અછતના બહાના ધરવામાં આવે છે, પરંતુ બીજી તરફ ખાનગી કંપનીઓ માટે ગૃહ વિભાગ દ્વારા ‘ઓન પેમેન્ટ પોલીસ બંદોબસ્ત નીતિ’ હેઠળ પોલીસ જવાનોને બંદોબસ્ત માટે મોકલવામાં આવી રહ્યા છે.
વિધાનસભા સત્ર દરમિયાન રજૂ થયેલા એક લેખિત પ્રશ્નના જવાબમાં રાજ્ય સરકારે પોતે કબૂલાત કરી છે કે માત્ર બે જિલ્લાઓમાં જ ખાનગી પક્ષકારો પાસેથી પોલીસ બંદોબસ્ત પેટે ₹2.59 કરોડથી વધુની રકમ વસૂલવાની બાકી છે.
1999 ના જૂના ઠરાવ હેઠળ ચાલે છે નીતિ
સરકાર 1 ઓક્ટોબર 1999ના જૂનાપુરાણા ઠરાવનો આધાર લઈને આજે પણ ખાનગી પક્ષકારોને પોલીસ ફોર્સ પૂરી પાડી રહી છે:
-
પ્રાથમિકતા સામે સવાલ: પોલીસની મૂળ ફરજ સામાન્ય જનતાનું રક્ષણ કરવાની અને કાયદો-વ્યવસ્થા જાળવવાની છે, તેને બદલે ખાનગી પ્રોજેક્ટ્સની ચોકીદારી કરાવવામાં આવી રહી હોવાના આક્ષેપો થઈ રહ્યા છે.
-
બેવડા ધોરણો: સામાન્ય માણસ પોતાની નાની ફરિયાદ માટે પોલીસ સ્ટેશનના ધક્કા ખાતો રહે છે, ત્યારે ખાનગી હિતો માટે પોલીસ દળ ભાડે આપી દેવામાં આવે છે.
સુરેન્દ્રનગર અને કચ્છમાં કરોડો રૂપિયા અટવાયા
સરકારી તંત્ર ખાનગી કંપનીઓ માટે સુરક્ષા તો ખડકી દે છે, પરંતુ તેમની પાસેથી નિયત ચાર્જ વસૂલવામાં તદ્દન ઢીલું સાબિત થયું છે:
-
સુરેન્દ્રનગર જિલ્લો: જિલ્લામાં ખાનગી કંપનીઓ અને પક્ષકારો પાસેથી પોલીસ બંદોબસ્ત પેટે સૌથી વધુ ₹2.02 કરોડથી વધુ ની જંગી વસૂલાત હજુ સુધી બાકી છે.
-
કચ્છ જિલ્લો: સંવેદનશીલ સરહદી જિલ્લો હોવા છતાં ખાનગી બાબતોમાં પોલીસ તહેનાત કરાઈ હતી, જ્યાંથી સરકારના ₹57,50,596 (આશરે ₹57.50 લાખ) અટવાયેલા બોલે છે.
-
કુલ બાકી રકમ: માત્ર આ બે જિલ્લામાં જ સરકારી તિજોરીના ₹2.59 કરોડથી વધુ રૂપિયા ખાનગી પક્ષો પાસે દબાયેલા છે.
સામાન્ય જનતા પર કડકાઈ, ખાનગી કંપનીઓ સામે રહેમનજર?
જો સામાન્ય નાગરિકનો વેરો કે સામાન્ય ફી બાકી રહી જાય તો સરકારી તંત્ર મિલકતો સીલ કરવા કે દંડ ફટકારવા તત્કાલ પહોંચી જાય છે. તેની સામે કરોડો રૂપિયા દબાવીને બેઠેલી ખાનગી કંપનીઓ સામે કોઈ કડક પગલાં ન લેવાતા વિપક્ષ અને સામાન્ય જનતામાં ભારે નારાજગી જોવા મળી રહી છે. આ આંકડા દર્શાવે છે કે સરકારી નાણાંની વસૂલાતમાં ગૃહ વિભાગ અત્યંત નિષ્કાળજી દાખવી રહ્યું છે.
