ગ્રીન કાર્ડ મુદ્દે ટ્રમ્પ પ્રશાસન લાલઘૂમ: ૮ મોટી ટેક કંપનીઓ સામે લાલ આંખ, અમેરિકામાં ભારતીય પ્રોફેશનલ્સ માટે કાયમી વસવાટનો રસ્તો વધુ કપરો બન્યો!

Green card : અમેરિકામાં ઉચ્ચ શિક્ષણ મેળવવું, નોકરી કરવી અને કાયમી ધોરણે સ્થાયી થવાનું સપનું જોતા વિદેશી નાગરિકો અને ખાસ કરીને ભારતીય પ્રોફેશનલ્સ માટે સ્થિતિ દિવસેને દિવસે મુશ્કેલ બની રહી છે. અમેરિકી સરકારે ૮ ઓક્ટોબર ૨૦૨૬ના રોજ આઠ મોટી આઈટી અને ટેક કંપનીઓને ગ્રીન કાર્ડ પ્રક્રિયા સાથે સંકળાયેલા PERM (પરમેનન્ટ લેબર સર્ટિફિકેશન) પ્રોગ્રામમાંથી સસ્પેન્ડ કરી દીધી છે.

આ કડક કાર્યવાહીને પગલે આ કંપનીઓ મારફતે ગ્રીન કાર્ડ મેળવવાની પ્રક્રિયામાં સામેલ હજારો વિદેશી અને ભારતીય કર્મચારીઓની ચિંતામાં મોટો વધારો થયો છે.

કઈ ૮ દિગ્ગજ કંપનીઓ પર તવાઈ આવી?

અમેરિકન શ્રમ વિભાગ દ્વારા PERM પ્રોગ્રામમાંથી સસ્પેન્ડ કરાયેલી કંપનીઓમાં ભારત અને વિશ્વની ટોચની ટેક જાયન્ટ્સ સામેલ છે:

• ભારતીય આઈટી કંપનીઓ: ટાટા કન્સલ્ટન્સી સર્વિસીસ (TCS), ઇન્ફોસિસ (Infosys), વિપ્રો (Wipro) અને એચસીએલ ટેક (HCLTech).

• વૈશ્વિક કંપનીઓ: માઇક્રોસોફ્ટ (Microsoft), એડોબ (Adobe), કોગ્નિઝન્ટ (Cognizant) અને કેપજેમિની (Capgemini).

નોંધ: PERM સસ્પેન્શનનો અર્થ એ નથી કે આ કંપનીઓના તમામ કર્મચારીઓના H-1B વિઝા રદ્દ થઈ ગયા છે. H-1B વિઝા (કામચલાઉ વર્ક પરમિટ) અને ગ્રીન કાર્ડ (કાયમી નિવાસ) બંને સંપૂર્ણપણે અલગ પ્રક્રિયાઓ છે.

અમેરિકી સરકારે શું આક્ષેપ મૂક્યો?

યુએસ ડિપાર્ટમેન્ટ ઓફ લેબરના જણાવ્યા અનુસાર, આ કંપનીઓએ વર્ષ ૨૦૦૯થી અત્યાર સુધીમાં આશરે ૩૦ લાખ વિદેશી કર્મચારીઓ માટે અરજીઓ કરી હતી. તેમને ૨.૩૦ લાખથી વધુ H-1B વિઝા અને ૧ લાખથી વધુ પરમેનન્ટ લેબર સર્ટિફિકેશન મળ્યા હતા.

ફેડરલ તપાસ એજન્સીઓનો આરોપ છે કે કેટલીક કંપનીઓએ વિદેશી કર્મચારીઓની ભરતી પ્રણાલીનો દુરુપયોગ કર્યો છે અને અમેરિકન નાગરિકોના ભોગે ઓછા વેતને વિદેશી વર્કર્સ રાખ્યા છે.

• માઇક્રોસોફ્ટ પર વાઇસ પ્રેસિડેન્ટના આક્ષેપો: અમેરિકી ઉપરાષ્ટ્રપતિ જેડી વેન્સે આરોપ મૂક્યો હતો કે માઇક્રોસોફ્ટે ગત વર્ષે આશરે ૬,૦૦૦ સ્થાનિક અમેરિકન કર્મચારીઓની છટણી કરી, જ્યારે કંપનીને ૬,૩૦૦ H-1B વિઝા મંજૂરીઓ અને લગભગ ૩,૦૦૦ ગ્રીન કાર્ડ મળ્યા હતા.

• માઇક્રોસોફ્ટનો ખુલાસો: કંપનીએ સ્પષ્ટતા કરી હતી કે તેની ૮૦% H-1B અરજીઓ હાલના કર્મચારીઓના વિઝા એક્સટેન્શન કે સ્ટેટસ બદલવા માટે હતી, નવી ભરતી માટે નહીં. તેમજ તેઓ વિદેશી કર્મચારીઓને પણ સ્થાનિક કર્મચારીઓ જેટલો જ સમાન પગાર આપે છે.

ગ્રીન કાર્ડ શું છે અને PERM શા માટે મહત્વનું છે?

• ગ્રીન કાર્ડ: તે અમેરિકામાં કાયદેસર કાયમી નિવાસી (Permanent Resident) હોવાનો પુરાવો છે. તે ધારકને યુએસમાં કાયમ રહેવા અને નોકરી કરવાની મંજૂરી આપે છે. સામાન્ય રીતે તેની માન્યતા ૧૦ વર્ષની હોય છે.

• PERM પ્રક્રિયા: રોજગાર આધારિત ગ્રીન કાર્ડ મેળવવા માટે કંપનીએ સાબિત કરવું પડે છે કે જે-તે પોસ્ટ માટે યોગ્ય અને લાયક સ્થાનિક અમેરિકન ઉમેદવાર ઉપલબ્ધ નથી, અને વિદેશી કર્મચારીની ભરતીથી અમેરિકન કામદારોના વેતન કે કામના સંજોગો પર કોઈ નકારાત્મક અસર નહીં પડે.

H-1B વિઝા અને વિદ્યાર્થીઓ માટેના નિયમોમાં શું બદલાયું?

1. વેતન આધારિત પ્રાથમિકતા: નાણાકીય વર્ષ ૨૦૨૭ થી H-1B કેપ પ્રોસેસમાં ઊંચા પગારવાળા પદોને વધુ પ્રાથમિકતા આપવાનો નવો નિયમ લાગુ કરાયો છે.

2. ભારે ફીનો પ્રસ્તાવ: નવી H-1B અરજીઓ પર ૧ લાખ ડૉલર સુધીની તોતિંગ ફી વસૂલવાની જોગવાઈ વિચારણા હેઠળ છે.

3. છટણીની તપાસ: જે કંપનીઓ અમેરિકન વર્કર્સને છૂટા કરીને વિદેશી વર્કર્સ રાખે છે તેમની સામે એક્ઝિક્યુટિવ ઓર્ડર હેઠળ સઘન તપાસ શરૂ કરાઈ છે.

4. વિદ્યાર્થીઓ પર નજર: ડિસેમ્બર ૨૦૨૫ થી વિદેશી વિદ્યાર્થીઓના સોશિયલ મીડિયા એકાઉન્ટ્સની કડક ચકાસણી કરવામાં આવી રહી છે.

ભારત અને ભારતીયો પર કેટલી અસર?

• વિદ્યાર્થીઓનો મોટો આંકડો: ઓપન ડોર્સ ૨૦૨૫ રિપોર્ટ મુજબ, અમેરિકામાં ૧૧.૭૭ લાખથી વધુ આંતરરાષ્ટ્રીય વિદ્યાર્થીઓ અભ્યાસ કરે છે, જેમાં ૩.૬૩ લાખથી વધુ માત્ર ભારતીય વિદ્યાર્થીઓ છે.

• IT સેક્ટરનું અર્થતંત્ર: GTRI અનુસાર, નાણાકીય વર્ષ ૨૦૨૫-૨૬માં ભારતના કુલ ૨૨૧.૪ અબજ ડૉલરના સોફ્ટવેર નિકાસમાં અમેરિકાનો હિસ્સો ૧૧૯.૭ અબજ ડૉલર (૫૪.૧%) રહ્યો હતો.

ટ્રમ્પ સરકારના આ આકરા વલણને કારણે જે ભારતીય ટેકીઝ વર્ષોથી ગ્રીન કાર્ડની લાઈનમાં ઊભા હતા, તેમના માટે કાયમી વસવાટ મેળવવાની રાહ હવે વધુ લાંબી અને અનિશ્ચિત બની ગઈ છે.