તમિલનાડુની રાજનીતિમાં મોટો ઉલટફેર થયો છે. અભિનેતામાંથી નેતા બનેલા થલાપતિ વિજય ની પાર્ટી TVK એ શાનદાર પ્રદર્શન કર્યું છે. પ્રથમ ચૂંટણીમાં જ વિજયે દ્રવિડ પક્ષોના ગઢમાં ગાબડું પાડ્યું છે. તમિલનાડુની રાજનીતિમાં આ ચૂંટણી માત્ર સત્તા પરિવર્તનની વાર્તા નથી, પરંતુ સત્તાના સમીકરણો બદલાવાનો સંકેત પણ છે. અભિનેતામાંથી નેતા બનેલા થલાપતિ વિજયે પોતાની પ્રથમ ચૂંટણીમાં જ સ્થાપિત દ્રવિડ પક્ષોના વર્ચસ્વને પડકારીને પોતાની જાતને સૌથી મોટા ખેલાડી તરીકે સ્થાપિત કરી દીધી છે. તેમની પાર્ટી TVK (તમિલગ વેટ્રી કઝગમ) 108 બેઠકો પર જીત મેળવીને રાજ્યમાં પોતાનું સ્થાન જમાવી ચૂકી છે, પરંતુ 118ના બહુમતીના આંકડાથી હજુ પણ 10 ડગલાં દૂર હોવાથી સત્તા સુધી પહોંચવાની રાહ જટિલ બની છે.
આ પરિણામ એક સ્પષ્ટ સંદેશ આપે છે કે તમિલનાડુની જનતા બદલાવ ઈચ્છે છે, પરંતુ પૂર્ણ સત્તા કોઈ એકના હાથમાં સોંપવા હજુ તૈયાર નથી.
ચૂંટણી પરિણામોનું ગણિત
-
કુલ બેઠકો: 234
-
બહુમતીનો આંકડો: 118
-
TVK ની બેઠકો: 108
-
ખૂટતી બેઠકો: 10
થલાપતિ વિજયે 108 બેઠકો જીતીને સાબિત કર્યું કે જનતા બદલાવ ઈચ્છે છે. જોકે, સત્તા સુધી પહોંચવા માટે તેમને હજુ 10 બેઠકોની જરૂર છે.
વિજય સરકાર કેવી રીતે બનાવી શકે? (4 મોટા વિકલ્પો)
હવે તમિલનાડુમાં સરકાર બનાવવા માટે 4 શક્યતાઓ દેખાઈ રહી છે:
1. કોંગ્રેસ સાથે ગઠબંધન
કોંગ્રેસે વિજયને સમર્થન આપવાના સંકેત આપ્યા છે. જો કોંગ્રેસ સાથે હાથ મિલાવે, તો વિજય માટે મુખ્યમંત્રી બનવું સરળ બનશે. આ ગઠબંધનમાં વૈચારિક મતભેદો પણ ઓછા છે.
2. AIADMK સાથે જોડાણ
AIADMK માટે આ ચૂંટણી અસ્તિત્વની લડાઈ હતી. જો વિજય અને AIADMK સાથે આવે, તો તે એક મજબૂત સરકાર બની શકે છે. બંને પક્ષો માટે આ ‘રાજકીય ઓક્સિજન’ સમાન ગણાશે.
3. નાના પક્ષો અને અપક્ષોનો સાથ
PMK, DMDK અને VCK જેવા નાના પક્ષો નિર્ણાયક ભૂમિકા ભજવી શકે છે. જો વિજય આ પક્ષોને મનાવી લે, તો તેઓ કોઈ મોટા પક્ષ વગર પણ ‘થર્ડ ફ્રન્ટ’ સરકાર બનાવી શકે છે.
4. NDA (BJP) નો વિકલ્પ
ભાજપ પણ વિજય સાથે જોડાવા ઈચ્છુક હોઈ શકે છે. પરંતુ વિજયે અગાઉ ભાજપને પોતાના ‘વૈચારિક વિરોધી’ ગણાવ્યા છે. આ સ્થિતિમાં લઘુમતી મતો ગુમાવવાનો ડર તેમને આ નિર્ણય લેતા રોકી શકે છે.
કેમ વિજયને મળી આટલી સફળતા?
તમિલનાડુમાં અગાઉ રજનીકાંત અને કમલ હાસન જેવા સ્ટાર્સ ખાસ સફળ રહ્યા નહોતા. પરંતુ વિજયે ગ્રાઉન્ડ લેવલ પર કામ કર્યું છે.
-
યુવા મતદારો: વિજયની ફેન ફોલોઈંગ વોટમાં ફેરવાઈ છે.
-
એન્ટી-ઇન્કમ્બન્સી: લોકો DMK અને AIADMK થી કંઈક અલગ ઈચ્છતા હતા.
-
નવો વિકલ્પ: દલિત અને ખ્રિસ્તી વોટ બેંકમાં વિજયે મજબૂત પકડ બનાવી છે.
તમિલનાડુની જનતાએ વિજયને ‘કિંગ’ તો બનાવ્યા છે, પણ ‘કિંગમેકર’ અન્ય પક્ષો છે. હવે જોવાનું એ રહેશે કે વિજય સિસ્ટમ બદલવા માટે કયો માર્ગ પસંદ કરે છે.
શું વિજય 108 મિનિટની રાજકીય રમત રમીને સત્તા મેળવી શકશે? આ સવાલનો જવાબ હવે આવનારા દિવસોમાં જ મળશે.
