તમિલનાડુ વેંટ્રી કઝગમ (TVK) ના વડા અને તમિલનાડુના મુખ્યમંત્રી સી. જોસેફ વિજયે પોતાના મુખ્ય ચૂંટણી વચનો પૈકીનું એક મોટું વચન પૂરું કર્યું છે. મુખ્યમંત્રીએ રાજ્યના નવજાત શિશુઓ માટે મહત્વાકાંક્ષી ‘થાઈમામન થંગા મોધિરમ’ (મામા તરફથી સોનાની વીંટી) યોજનાનો વિધિવત શુભારંભ કરાવ્યો છે.
મુખ્યમંત્રી વિજય ખાસ વિમાન મારફતે મદુરઈ પહોંચ્યા હતા અને ત્યાં આવેલી સરકારી રાજાજી હોસ્પિટલ ખાતેથી આ કલ્યાણકારી યોજના લોન્ચ કરી હતી. આ પ્રસંગે તેમણે ૨૫ નવજાત શિશુઓને ૧ ગ્રામ વજનની ૨૨ કેરેટ સોનાની વીંટી અર્પણ કરી હતી. આ દરમિયાન મુખ્યમંત્રીએ શિશુઓને પોતાના ખોળામાં રમાડ્યા હતા અને માતાઓની વિનંતી પર કેટલાક બાળકોના કાનમાં નામ બોલીને નામકરણ પણ કર્યું હતું.
પરંપરા અને વાયદો: ‘બહેનોના ભાઈ’ તરીકે મામાની ભેટ
તમિલનાડુની પ્રાચીન પરંપરા મુજબ બાળકના જન્મ સમયે મોસાળ પક્ષ તરફથી એટલે કે ‘મામા’ દ્વારા ભેટ આપવાનો વિશેષ રિવાજ છે:
-
ચૂંટણી વચન: વિધાનસભા ચૂંટણી પ્રચાર દરમિયાન વિજયે પોતાને રાજ્યની તમામ મહિલાઓના ‘ભાઈ’ ગણાવ્યા હતા અને વચન આપ્યું હતું કે તેમની સરકાર બન્યા બાદ સરકારી હોસ્પિટલમાં જન્મ લેનારા દરેક બાળકને ‘મામા’ તરફથી ૧ ગ્રામ સોનાની વીંટી આપવામાં આવશે.
-
પ્રથમ તબક્કામાં ૧.૨૮ લાખ વીંટીઓ: યોજનાના સુચારુ અમલીકરણ માટે સરકારે પ્રથમ તબક્કામાં ૧.૨૮ લાખ સોનાની વીંટીઓની ખરીદી કરી છે.
-
પારદર્શકતા માટે યુનિક સીરિયલ નંબર: યોજનામાં કોઈપણ પ્રકારનો ભ્રષ્ટાચાર કે ગેરરીતિ ન થાય તે માટે દરેક વીંટી પર ખાસ ‘યુનિક સીરિયલ નંબર’ અંકિત કરવામાં આવ્યો છે અને તેને સુરક્ષિત બોક્સમાં પેક કરવામાં આવી છે.
-
વાર્ષિક બજેટ: રાજ્ય સરકારે આ લોકકલ્યાણકારી યોજના માટે વાર્ષિક ₹૭૫૫.૮૩ કરોડનું બજેટ નિર્ધારિત કર્યું છે.
કોને મળશે યોજનાનો લાભ? (પાત્રતાના નિયમો)
સરકારી જાહેરાત મુજબ આ યોજના હેઠળ લાભ મેળવવા માટે નીચેની શરતો નક્કી કરવામાં આવી છે:
-
કાયમી નિવાસી: બાળકની માતા તમિલનાડુની કાયમી નિવાસી હોવી અનિવાર્ય છે.
-
જન્મ તારીખ: ૨૨ જૂન ૨૦૨૬ કે ત્યારપછી સરકારી હોસ્પિટલ કે સરકારી આરોગ્ય કેન્દ્રમાં જન્મેલા બાળકોને જ આ લાભ મળવાપાત્ર રહેશે.
-
સરકારી નોંધણી: માતાનું ‘પ્રેગ્નન્સી એન્ડ ઇન્ફન્ટ કોહોર્ટ મોનિટરિંગ એન્ડ ઇવેલ્યુએશન’ (PICME) હેઠળ રજિસ્ટ્રેશન થયેલું હોવું જોઈએ અને રિપ્રોડક્ટિવ એન્ડ ચાઇલ્ડ હેલ્થ (RCH) ID હોવું જરૂરી છે.
સમગ્ર રાજ્યમાં ૧૦૭ સેન્ટર કાર્યરત
મૂળ આ યોજના ૧૫ સપ્ટેમ્બરે શરૂ થવાની હતી, પરંતુ વહીવટી કારણોસર તારીખ લંબાવીને ૨૮ સપ્ટેમ્બર કરવામાં આવી હતી:
-
સોમવારથી સમગ્ર રાજ્યમાં સરકારી આરોગ્ય કેન્દ્રો અને હોસ્પિટલોમાં આ વિતરણ કામગીરી સત્તાવાર રીતે શરૂ કરી દેવામાં આવી છે.
-
યોજનાના સુવ્યવસ્થિત સંચાલન માટે સમગ્ર તમિલનાડુમાં ૧૦૭ સ્પેશિયલ સેન્ટર્સ ઊભા કરવામાં આવ્યા છે.
-
દરેક કેન્દ્ર પર દરરોજ સરેરાશ ૧૦૦ નવજાત શિશુઓને ગોલ્ડ રિંગ ભેટ આપવાનું દૈનિક લક્ષ્યાંક નક્કી કરવામાં આવ્યું છે.
