કાનપુર બિઝનેસમેન હત્યાકાંડ: “પપ્પા ચરિત્રહીન હતા અને ઐયાશી કરતા હતા”, બદનામી અને સંપત્તિના ડરે પુત્રે જ નોકરને સોપારી આપી પિતાનું કાસળ કઢાવ્યું

kanpur : ઉત્તર પ્રદેશના કાનપુરમાં બનેલા ચકચારભર્યા દવા વેપારી હત્યાકાંડમાં પોલીસે સનસનીખેજ ખુલાસો કર્યો છે. કરોડોપતિ બિઝનેસમેન વિનીત મિનોચાની ઘાતકી હત્યાની સોપારી અન્ય કોઈએ નહીં પરંતુ તેમના પોતાના સગા પુત્ર સુબ્રત મિનોચા એ જ પોતાના નોકરને આપી હોવાનું બહાર આવ્યું છે. પોલીસે સુબ્રતની ધરપકડ કર્યા બાદ તેણે મીડિયા અને પોલીસ સમક્ષ હત્યાનું ચોંકાવનારું કારણ કબૂલ્યું છે.

સુબ્રતે દાવો કર્યો છે કે તેના પિતા ચરિત્રહીન હતા, અનેક મહિલાઓ સાથે અનૈતિક સંબંધો ધરાવતા હતા અને તેમના કારણે સમાજમાં પરિવારની ભારે બદનામી થઈ રહી હતી, જેનાથી કંટાળીને તેણે પિતાની હત્યાનું કાવતરું ઘડ્યું હતું.

શું હતો સમગ્ર હત્યાકાંડ?

ગત 5 સપ્ટેમ્બરના રોજ કાનપુરના કેશવપુરમ સ્થિત રતન ઓર્બિટ એપાર્ટમેન્ટના ફ્લેટ નંબર C-104 માં દવા વેપારી વિનીત મિનોચાની તેમના જ બેડરૂમમાં હત્યા કરી દેવામાં આવી હતી:

• પ્રારંભિક ધરપકડ: પોલીસે અગાઉ વેપારીની પુત્રવધૂ શાલુ, પૂર્વ નોકર વિશાલ ગૌતમ અને તેના સાથી રાજકિશોરની ધરપકડ કરી હતી.

• પુત્ર પર શંકા: જોકે, સમગ્ર મામલે પુત્ર સુબ્રતની ભૂમિકા શંકાના દાયરામાં હતી. રિમાન્ડ દરમિયાન જ્યારે સુબ્રતનો સામનો નોકર વિશાલ સાથે કરાવવામાં આવ્યો, ત્યારે તેણે ભાંગી પડીને પોતાનો ગુનો કબૂલી લીધો હતો.

• પત્નીને નિર્દોષ ગણાવી: સુબ્રતે જણાવ્યું કે હત્યાની સોપારી તેણે પોતે આપી હતી અને તેની પત્ની શાલુ આ કાવતરામાં સંપૂર્ણપણે નિર્દોષ છે.

હત્યા પાછળના મુખ્ય કારણો: બદનામી, પ્રોપર્ટી અને દેવું

પોલીસ કમિશનર રઘુબીર લાલ સમક્ષ સુબ્રતે હત્યા પાછળ નીચે મુજબના કારણો રજૂ કર્યા હતા:

• મહિલાઓ પાછળ લાખોનો ધુમાડો: પિતાના અનેક મહિલાઓ સાથે સંબંધો હતા અને તેઓ તેમની પાછળ લાખો રૂપિયા ઉડાવતા હતા. પિતા ઘણીવાર મહિલા મિત્રોની તસવીરો બતાવીને તેને ઉશ્કેરતા હતા. આ કારણોસર તેની માતા પણ પિતાથી અલગ ગાઝિયાબાદમાં રહેતી હતી.

• સંપત્તિ છીનવાઈ જવાનો ડર: સુબ્રતને ભય હતો કે પિતા કોઈ અન્ય મહિલા સાથે લગ્ન કરી લેશે અને કરોડોની પૈતૃક સંપત્તિમાંથી તેને બેદખલ કરી દેશે.

• આર્થિક તંગી અને દેવું: પિતા તેને દર મહિને માત્ર ₹40,000 આપતા હતા, જ્યારે તેના માથે મોટું દેવું હતું. ખર્ચા અને લોનના હપ્તા ભરવા માટે સુબ્રતે પોતાની જ દવાની દુકાનમાંથી 7 થી 8 વાર ચોરી પણ કરી હતી.

નોકર વિશાલ પણ પિતાથી ખફા હતો

સુબ્રત દુકાનમાંથી મોંઘી દવાઓ ચોરીને ગાડીમાં મૂકી દેતો હતો, જે નોકર વિશાલ બહાર વેચી દેતો હતો. એકવાર પકડાઈ જતાં પિતાએ વિશાલને ખૂબ ખખડાવ્યો હતો, જેના કારણે વિશાલ પણ મનોમન વિનીત મિનોચા સામે દાઝ રાખતો હતો. સુબ્રતે વિશાલની આ નારાજગીનો ફાયદો ઉઠાવી તેને હત્યા માટે રાજી કર્યો હતો.

3 મહિના પહેલાં ઘડાયો હતો હત્યાનો પ્લાન

• અકસ્માતનો પ્લાન રદ કર્યો: વિશાલે અગાઉ રોડ અકસ્માત કરાવીને પિતાને મારી નાખવાની યોજના બનાવી હતી, પરંતુ જોખમ વધુ હોવાથી સુબ્રતે તે નકારી કાઢી હતી.

• ઘરમાં જ હત્યાની યોજના: આખરે ફ્લેટમાં જ હત્યા કરવાનું નક્કી થયું. સુબ્રતે વિશાલને ફ્લેટની બહાર લાગેલા સીસીટીવી (CCTV) કેમેરાનો વાયર કાપવાની સૂચના આપી હતી.

• તકિયાથી મોં દબાવીને હત્યા: યોજના મુજબ, વિશાલ તેના સાથી રાજકિશોર સાથે ફ્લેટમાં ઘૂસીને સુબ્રતના રૂમમાં છુપાઈ ગયો હતો. રાત્રે વિનીત મિનોચા ઊંઘી ગયા ત્યારે એક શખ્સે તેમના હાથ-પગ પકડી રાખ્યા અને બીજાએ તકિયાથી મોં દબાવીને શ્વાસ રુંધી તેમની હત્યા કરી નાખી હતી.

પોલીસે આ સમગ્ર સોપારી કિલિંગનો પર્દાફાશ કરી પુત્ર સુબ્રત સહિત તમામ સાથીદારો સામે હત્યા અને કાવતરાની કલમો હેઠળ જેલભેગા કરવાની કાયદેસરની કાર્યવાહી હાથ ધરી છે.