ઉનાળાની ઋતુમાં પેટને ઠંડક આપવા માટે દહીંનું સેવન ખૂબ જ ફાયદાકારક માનવામાં આવે છે. પરંતુ ઘરે બજાર જેવું ઘટ્ટ અને મલાઈદાર દહીં જમાવવું એ એક મોટો ટાસ્ક લાગે છે. મોટાભાગના લોકોની ફરિયાદ હોય છે કે તેમનું દહીં કાં તો પાણી છોડી દે છે અથવા બરાબર જામતું નથી. પરંતુ હવે ચિંતા કરવાની જરૂર નથી. તમે કૂકર અને મીઠા (Salt) ની મદદથી માત્ર એક જ કલાકમાં ડેરી જેવું જબરદસ્ત દહીં જમાવી શકો છો. આવો જાણીએ આ સરળ અને અદભુત કિચન ટ્રીક વિશે.
સ્ટેપ 1: દૂધને બરાબર ઉકાળો
જો તમારે એકદમ ઘટ્ટ દહીં જોઈતું હોય, તો દૂધની પસંદગી સૌથી મહત્વની છે:
-
ફુલ ક્રીમ દૂધ વાપરો: દહીં જમાવવા માટે હંમેશા ફુલ ક્રીમ દૂધનો જ ઉપયોગ કરો. દૂધને થોડું ઘટ્ટ થાય ત્યાં સુધી બરાબર ઉકાળો.
-
કોર્નફ્લોરની સ્માર્ટ ટ્રીક: જો તમારી પાસે ફુલ ક્રીમ દૂધ ન હોય, તો એક ચમચી કોર્નફ્લોર લો. તેને સામાન્ય દૂધમાં મિક્સ કરીને સ્મૂધ પેસ્ટ બનાવો. દૂધ ઉકળે ત્યારે આ મિશ્રણ તેમાં ઉમેરી દો. આનાથી દૂધ એકદમ ઘટ્ટ થઈ જશે.
સ્ટેપ 2: માટીના વાસણને ગ્રીસ કરો
દૂધ ઉકળી ગયા પછી તેને થોડું ઠંડું થવા દો. દૂધ એટલું જ ગરમ હોવું જોઈએ કે જેમાં તમે તમારી આંગળી સરળતાથી બોળી શકો (નવશેકું દૂધ).
-
હવે એક સાફ માટીનું વાસણ કે હાંડલી લો.
-
આ વાસણની અંદરની ચારેય બાજુએ થોડું દહીં (મેળવણ) લગાવીને બરાબર ગ્રીસ કરી લો.
-
ત્યારબાદ તેમાં નવશેકું દૂધ ઉમેરો અને ઉપરથી ફરી થોડું મેળવણ નાખીને બરાબર હલાવી લો. હવે માટીના વાસણને ઢાંકણથી ઢાંકી દો.
સ્ટેપ 3: કૂકર અને મીઠાનો કમાલ
હવે આવે છે સૌથી મહત્વનો ભાગ, જે તમારા દહીંને માત્ર ૧ કલાકમાં જમાવી દેશે:
-
એક મોટું પ્રેશર કૂકર લો અને તેના તળિયે અડધી વાટકી મીઠું નાખીને બરાબર ફેલાવી દો.
-
કૂકરને મધ્યમ આંચ પર ૫ થી ૭ મિનિટ માટે ઢાંકણ ઢાંકીને પ્રી-હીટ (ગરમ) કરો.
-
કૂકર બરાબર ગરમ થઈ જાય એટલે ગેસ બંધ કરી દો. હવે દૂધ ભરેલી માટીની હાંડલીને બહુ સાવધાનીપૂર્વક કૂકરની અંદર મીઠાની ઉપર મૂકી દો.
-
ત્યારબાદ કૂકરનું ઢાંકણ બંધ કરી દો, પરંતુ ધ્યાનમાં રાખો કે કૂકરની સીટી (Whistle) કાઢી લેવી.
માત્ર ૧ કલાકમાં દહીં તૈયાર!
કૂકરની અંદર બનેલી ગરમી અને મીઠાના તાપમાનને કારણે દહીં જામવાની પ્રક્રિયા ખૂબ જ ઝડપી બની જાય છે. બરાબર એક કલાક પછી કૂકર ખોલશો એટલે તમને એકદમ ઘટ્ટ, ચક્કા જેવું અને મલાઈદાર દહીં તૈયાર મળશે. ઉનાળામાં મહેમાનો આવવાના હોય અને તાત્કાલિક દહીં જોઇતું હોય, ત્યારે આ સ્માર્ટ ટ્રીક ખૂબ જ ઉપયોગી સાબિત થાય છે.
< /p>
