fake doctor : દિલ્હી પોલીસની ક્રાઈમ બ્રાન્ચે કેન્સર અને અન્ય જીવલેણ બીમારીઓ સામે લડી રહેલા દર્દીઓના જીવન સાથે ચેડાં કરતા એક મોટા આંતરરાજ્ય ડ્રગ સિન્ડિકેટનો પર્દાફાશ કર્યો છે. ક્રાઈમ બ્રાન્ચની એન્ટી ગેંગ સ્ક્વોડ (AGS) યુનિટે ભારતમાં બિન-મંજૂર, ભેળસેળયુક્ત અને ગેરકાયદે તસ્કરી કરીને લાવવામાં આવતી કેન્સરની દવાઓ વેચવા બદલ ડૉ. મનીષ શર્મા નામના શખ્સની ધરપકડ કરી છે.
મૂળ મધ્ય પ્રદેશના ભીંડ/ગ્વાલિયરનો વતની અને હાલ ફરીદાબાદમાં રહેતો 39 વર્ષીય આરોપી લાખો રૂપિયાની કિંમતની પ્રતિબંધિત વિદેશી દવાઓ ભારતીય દર્દીઓને ઊંચા ભાવે વેચતો હતો.
મુખ્ય મુદ્દા (Highlights):
-
રશિયાથી MBBS થયા બાદ ભારતમાં ફોરેન મેડિકલ ગ્રેજ્યુએટ લાયસન્સ પરીક્ષા પાસ ન કરી શક્યો.
-
તુર્કીયે, જાપાન અને અમેરિકાની નકલી તથા સ્મગલિંગ કરાયેલી કેન્સર દવાઓનો મોટો જથ્થો જપ્ત.
-
IndiaMART પ્લેટફોર્મ અને પોતાની નકલી ફાર્મા કંપની દ્વારા દર્દીઓ અને ગ્રાહકો સુધી પહોંચતો હતો.
-
દિલ્હીના સુખદેવ વિહાર ખાતેથી હોન્ડા સિટી કાર સાથે ક્રાઈમ બ્રાન્ચે રંગેહાથ ઝડપી પાડ્યો.
જપ્ત કરવામાં આવેલી પ્રતિબંધિત દવાઓ:
-
ICLUSIG (Ponatinib): 4 પેકેટ (ભારતમાં વેચાણ માટે મંજૂર નથી)
-
Human Albumin Solution 20%: 4 વાયલ (ઇન્જેક્શન)
-
DARZALEX (Janssen Biotech): 2 બોક્સ (તુર્કીયે મૂળની ગેરકાયદે તસ્કરી કરેલી દવા)
કેવી રીતે ચલાવતો હતો આ કાળો કારોબાર?
પોલીસ તપાસમાં સામે આવ્યું કે મનીષ શર્માએ રશિયાથી તબીબી અભ્યાસ પૂર્ણ કર્યો હતો, પરંતુ ભારતમાં પ્રેક્ટિસ કરવા માટે જરૂરી લાયસન્સ મેળવી શક્યો નહોતો. તેણે ફરીદાબાદમાં ‘HK Polyclinic’ અને ‘HK Pharmaceuticals’ નામની પેઢી શરૂ કરી હતી. ક્લિનિકમાં ખોટ ગયા બાદ તેણે કેન્સરની મોંઘી દવાઓમાં જંગી નફો કમાવવા માટે આ શોર્ટકટ અપનાવ્યો. તે IndiaMART જેવા ઓનલાઇન બિઝનેસ પ્લેટફોર્મ પર કેન્સરની દુર્લભ દવાઓની જરૂરિયાતવાળા પરિવારોનો સંપર્ક કરી તેમને તસ્કરી કરેલી અને બિન-ગુણવત્તાયુક્ત દવાઓ વેચતો હતો.
પોલીસે કેવી રીતે છટકું ગોઠવ્યું?
ગુપ્ત માહિતીના આધારે ક્રાઈમ બ્રાન્ચની ટીમે દિલ્હીના સુખદેવ વિહાર સ્થિત મધર ડેરી બૂથ પાસે વોચ ગોઠવી હતી. આરોપી તેની હોન્ડા સિટી કારમાંથી દવાઓની ડિલિવરી કરવા નીચે ઉતર્યો કે તરત જ પોલીસે તેને દબોચી લીધો હતો. આ મામલે ભારતીય ન્યાય સંહિતા (BNS) અને ડ્રગ્સ એન્ડ કોસ્મેટિક્સ એક્ટ હેઠળ ગુનો નોંધીને વધુ તપાસ હાથ ધરવામાં આવી છે
