ભારતમાં ડેન્ગ્યુના વધતા કેસો વચ્ચે એક રાહતના સમાચાર આવ્યા છે. ડ્રગ્સ કંટ્રોલર જનરલ ઓફ ઇન્ડિયા (DCGI) એ દેશની પહેલી એન્ટી-ડેન્ગ્યુ વેક્સિન ‘Qdenga’ ના વેચાણને મંજૂરી આપી દીધી છે. જાપાનની દવા કંપની ટાકેડા ફાર્માસ્યુટિકલ્સ (Takeda Biopharma) દ્વારા આ વેક્સિન બનાવવામાં આવી છે.
ભારતમાં ડેન્ગ્યુ સામે લડવા માટે આ એક ઐતિહાસિક પગલું માનવામાં આવે છે.
વેક્સિન કોણ લઈ શકે છે?
-
આ વેક્સિન 4 થી 60 વર્ષની ઉંમરના લોકો માટે છે.
-
આ વેક્સિનની ખાસિયત એ છે કે વ્યક્તિને પહેલા ડેન્ગ્યુ થયો હોય કે ના થયો હોય, બંને સ્થિતિમાં તે આપી શકાય છે.
-
વેક્સિન લેતા પહેલા કોઈ બ્લડ ટેસ્ટ કરવાની જરૂર નથી.
ગ્લોબલ લેવલ પર સફળ ટ્રાયલ
કંપનીના જણાવ્યા અનુસાર, આ વેક્સિન ખૂબ જ સુરક્ષિત છે. તેના રિસર્ચ માટે વિશ્વભરમાં 28,000 થી વધુ લોકો પર 19 ક્લિનિકલ ટ્રાયલ કરવામાં આવ્યા હતા. ભારતીય લોકો પર પણ તેના ફેઝ-3 ના ટ્રાયલ સફળ રહ્યા છે.
7 વર્ષના ડેટા દર્શાવે છે કે આ વેક્સિન ડેન્ગ્યુના સંક્રમણ અને હોસ્પિટલમાં દાખલ થવાના જોખમને સતત ઘટાડે છે. તે ડેન્ગ્યુ વાયરસના તમામ ચાર સીરોટાઈપ (Serotypes) સામે રક્ષણ આપે છે.
43 દેશોમાં મળી ચૂકી છે મંજૂરી
વર્ષ 2022 માં લોન્ચ થયા પછી, ‘Qdenga’ ને અત્યાર સુધીમાં 43 દેશોમાં મંજૂરી મળી ગઈ છે. દુનિયાભરમાં આ વેક્સિનના 32 મિલિયનથી (3.2 કરોડ) વધુ ડોઝ આપવામાં આવ્યા છે.
વર્લ્ડ હેલ્થ ઓર્ગેનાઈઝેશન (WHO) એ પણ વધુ ડેન્ગ્યુ ધરાવતા વિસ્તારોમાં આ વેક્સિનનો ઉપયોગ કરવાની ભલામણ કરી છે.
ભારતમાં ચોમાસા અને તે પછી ડેન્ગ્યુનો આતંક ઘણો વધી જાય છે. તેવામાં આ વેક્સિન આવનારા દિવસોમાં લોકો માટે જીવરક્ષક સાબિત થઈ શકે છે.
