ઇઝરાયેલના વડાપ્રધાન બેન્જામિન નેતન્યાહૂએ એક મોટું અને ચોંકાવનારું નિવેદન આપ્યું છે. તેમણે કહ્યું છે કે ઇઝરાયેલે હવે હથિયારો માટે અમેરિકા પરની સૈન્ય નિર્ભરતામાંથી મુક્ત થવું પડશે. ઇઝરાયેલે પોતાની હથિયાર બનાવવાની ક્ષમતા જાતે જ વિકસાવવી પડશે.
નેતન્યાહૂના મતે, ઈરાન અને તેના સહયોગી દેશો સાથે ચાલી રહેલા સંઘર્ષને જોતા આ ફેરફાર ખૂબ જ જરૂરી છે. વેસ્ટ બેંકના ગુશ એત્ઝિયન ખાતે લશ્કરી અધિકારીઓ સાથેની બેઠકમાં તેમણે આ વાત કહી હતી.
‘આપણને આપણા પોતાના સ્વતંત્ર હથિયારોની જરૂર છે’
પીએમ નેતન્યાહૂએ બેઠકમાં જણાવ્યું, “અત્યાર સુધી અમેરિકા તરફથી આપણને જે સહયોગ મળ્યો છે, તેની હું ખૂબ પ્રશંસા કરું છું. પરંતુ આજે હું સ્પષ્ટ કહું છું કે, આપણને આપણા પોતાના સ્વતંત્ર હથિયાર ઉત્પાદન તંત્રની જરૂર છે. આપણે આપણા હથિયારો જાતે જ બનાવવા પડશે.”
અમેરિકી સૈન્ય સહાય ધીમે ધીમે ખતમ કરવાની નીતિ
સુરક્ષાની સ્થિતિ અંગે વાત કરતા નેતન્યાહૂએ ઉમેર્યું કે, “આપણે અત્યારે ઈરાન અને તેના પ્રોક્સીસ (પ્રતિનિધિ સંગઠનો) નો સામનો કરી રહ્યા છીએ. અમે તેમના પર જોરદાર પ્રહારો કર્યા છે. આ યુદ્ધ હજુ પૂરું થયું નથી. 30 વર્ષ પછી આપણે ક્યાં હોઈશું, તે આપણી આજની તાકાત પર નિર્ભર કરે છે. તેથી જ આપણે આપણી શક્તિ વધારી રહ્યા છીએ.”
નેતન્યાહૂ આગામી દાયકામાં અમેરિકા પાસેથી મળતી સૈન્ય સહાયને ધીમે ધીમે સમાપ્ત કરવાની નીતિ પર કામ કરી રહ્યા છે. પરંતુ તેમનું આ તાજેતરનું નિવેદન અત્યંત તણાવપૂર્ણ માહોલ વચ્ચે આવ્યું છે.
યુએસ-ઈરાન સમજૂતીથી ઇઝરાયેલ નારાજ
ઇઝરાયેલને ચિંતા છે કે વોશિંગ્ટન (અમેરિકા) તેની સૈન્ય સ્વતંત્રતા પર પ્રતિબંધો લગાવી શકે છે. ખાસ કરીને એટલા માટે કારણ કે અમેરિકા અત્યારે તેહરાન (ઈરાન) સાથે સમજૂતી કરવાના પ્રયાસો કરી રહ્યું છે, જેને ઇઝરાયેલ સંપૂર્ણપણે નકારી રહ્યું છે. નેતન્યાહૂએ ભારપૂર્વક કહ્યું કે, “આપણે નિર્ભરતામાંથી મુક્ત થવાની, ટેકનોલોજી અપગ્રેડ કરવાની અને નવી પેઢીના કમાન્ડર્સ તૈયાર કરવાની જરૂર છે.”
જેડી વેન્સના નિવેદન પછી નેતન્યાહૂની પ્રતિક્રિયા
આ નિવેદન ગયા અઠવાડિયે અમેરિકાના ઉપરાષ્ટ્રપતિ જેડી વેન્સની ટિપ્પણી બાદ આવ્યું છે. વેન્સે એક પ્રેસ કોન્ફરન્સમાં કહ્યું હતું કે, “છેલ્લા કેટલાક મહિનામાં ઇઝરાયેલની સુરક્ષા કરનારા બે તૃતીયાંશ સંરક્ષણ હથિયારો અમેરિકા દ્વારા સપ્લાય અને ફાઇનાન્સ કરવામાં આવ્યા હતા.”
‘ધ ટાઇમ્સ ઓફ ઇઝરાયેલ’ ના અહેવાલ મુજબ, અમેરિકા અને ઇઝરાયેલના પ્રતિનિધિઓએ તાજેતરમાં 10 વર્ષના નવા સુરક્ષા સહયોગ માળખા પર વાતચીત શરૂ કરી છે. આ નવી વ્યવસ્થા હેઠળ બંને દેશો મદદ મેળવનાર સંબંધોમાંથી બદલાઈને સંપૂર્ણ પરસ્પર ભાગીદારી તરફ આગળ વધશે.
