અમદાવાદ જિલ્લાના ધોળકા શહેરમાંથી ગુરુ-શિષ્યના સંબંધને કલંકિત કરતી એક અત્યંત શરમનાક ઘટના સામે આવી છે. ધોળકાની એક સરકારી શાળામાં 13 વર્ષીય સગીર વિદ્યાર્થીની છેડતી કરવાના આરોપમાં પોલીસે 49 વર્ષીય સરકારી શિક્ષકની ધરપકડ કરી છે. કામાંધ બનેલા શિક્ષકે આ બાબતે કોઈને જાણ કરવા પર સગીર વિદ્યાર્થીને જાનથી મારી નાખવાની ધમકી પણ આપી હતી.
ચાવી લાવવાના બહાને કમ્પ્યુટર રૂમમાં બોલાવ્યો
મળતી માહિતી અનુસાર, ધોળકા શહેરની સરકારી શાળામાં વિજયકુમાર સોલંકી (ઉંમર 49 વર્ષ) શિક્ષક તરીકે ફરજ બજાવે છે. ગત 17મી જૂના રોજ આ નરાધમ શિક્ષકે 13 વર્ષના એક વિદ્યાર્થીને ચાવી લાવવાના બહાને શાળાના કમ્પ્યુટર રૂમમાં બોલાવ્યો હતો. રૂમની અંદર જતાની સાથે જ શિક્ષક વિજયકુમારે વિદ્યાર્થી સાથે અડપલાં શરૂ કર્યા હતા અને તેનું જાતીય શોષણ કરવાનો પ્રયાસ કર્યો હતો. જો કે, ભયભીત થયેલો સગીર ગમે તેમ કરીને શિક્ષકની પકડમાંથી છૂટીને ભાગી નીકળ્યો હતો.
સગીર વિદ્યાર્થીને આપી જાનથી મારી નાખવાની ધમકી
વિદ્યાર્થી પોતાની પકડમાંથી ભાગી જતાં શિક્ષક વિજયકુમાર ગભરાઈ ગયો હતો. પકડાઈ જવાના ડરથી તેણે ગુસ્સામાં આવીને સગીરને ધમકાવ્યો હતો. શિક્ષકે ધમકી આપી હતી કે, જો આ ઘટના વિશે તે શાળામાં કે ઘરે કોઈને પણ વાત કરશે તો તેને જાનથી મારી નાખવામાં આવશે. આ ધમકીને કારણે સગીર વિદ્યાર્થી ખૂબ જ ડરી ગયો હતો.
પરિવારે હિંમત દાખવી પોલીસ ફરિયાદ નોંધાવી
આ ભયાનક ઘટના બાદ સગીર વિદ્યાર્થીએ હિંમત ભેગી કરીને પોતાના પરિવારને આપવીતી જણાવી હતી. આ સાંભળીને પરિવાર ચોંકી ગયો હતો. પરિવારે હિંમત દાખવીને 19મી જૂના રોજ ધોળકા ટાઉન પોલીસ સ્ટેશનમાં નરાધમ શિક્ષક વિરુદ્ધ સત્તાવાર ફરિયાદ નોંધાવી હતી.
પોલીસે ગુનો નોંધી તાત્કાલિક તપાસ હાથ ધરી હતી અને પુરાવા એકત્રિત કરીને આરોપી શિક્ષક વિજયકુમાર સોલંકીની ધરપકડ કરી લીધી છે. હાલ પોલીસે આરોપીને જેલના સળિયા પાછળ ધકેલીને આગળની કાયદેસરની કાર્યવાહી શરૂ કરી છે.
