વુમન્સ T20 વર્લ્ડ કપ 2026 ની શરૂઆત 12 જૂનથી થવા જઈ રહી છે. આ વખતે આ મોટી ટૂર્નામેન્ટ ઈંગ્લેન્ડની યજમાનીમાં રમાશે. આ ટૂર્નામેન્ટમાં ભારતીય મહિલા ટીમને ગ્રુપ-એ માં રાખવામાં આવી છે.
આ ગ્રુપને ‘ગ્રુપ ઓફ ડેથ’ (Group of Death) કહેવામાં આવી રહ્યું છે. કારણ કે આ ગ્રુપમાં ભારત સિવાય ઓસ્ટ્રેલિયા, સાઉથ આફ્રિકા અને પાકિસ્તાન જેવી મજબૂત ટીમો સામેલ છે.
ઓસ્ટ્રેલિયા સામે ભારતનો રેકોર્ડ ચિંતાજનક
T20 વર્લ્ડ કપના ઈતિહાસમાં ઓસ્ટ્રેલિયાની ટીમનો દબદબો રહ્યો છે. અત્યાર સુધી રમાયેલા 9 વર્લ્ડ કપમાંથી 6 વાર ઓસ્ટ્રેલિયા ચેમ્પિયન બન્યું છે.
T20 ફોર્મેટમાં ઓસ્ટ્રેલિયા સામે ભારતનો રેકોર્ડ ઘણો નબળો છે:
-
બંને ટીમો વચ્ચે અત્યાર સુધી 38 T20 મેચ રમાઈ છે.
-
ઓસ્ટ્રેલિયાએ 27 મેચમાં જીત મેળવી છે.
-
ભારતીય ટીમ માત્ર 9 મેચ જીતવામાં સફળ રહી છે.
આ આંકડા દર્શાવે છે કે ઓસ્ટ્રેલિયા સામે જીતવું ભારત માટે મોટો પડકાર હશે.
સાઉથ આફ્રિકા પણ આપશે કડક ટક્કર
સાઉથ આફ્રિકાની ટીમનું પ્રદર્શન પણ છેલ્લા બે વર્લ્ડ કપમાં શાનદાર રહ્યું છે. તેઓ બંને વખતે ફાઈનલમાં પહોંચવામાં સફળ રહ્યા હતા.
ભારત અને સાઉથ આફ્રિકા વચ્ચે અત્યાર સુધી 24 T20 મેચ રમાઈ છે. જેમાં બંને વચ્ચે બરાબરીની ટક્કર જોવા મળી છે. સાઉથ આફ્રિકાએ 10 મેચ જીતી છે, જ્યારે ટીમ ઈન્ડિયાએ 11 મેચમાં બાજી મારી છે. 3 મેચનું પરિણામ આવ્યું નથી.
આ ટીમો સામે પણ રમાશે મેચ
ગ્રુપ સ્ટેજની અન્ય મેચોમાં ભારતીય ટીમનો સામનો પાકિસ્તાન, નેધરલેન્ડ અને બાંગ્લાદેશ સામે થશે. ઓસ્ટ્રેલિયા અને સાઉથ આફ્રિકાની સરખામણીએ આ ટીમોને હરાવવી ભારત માટે સરળ મનાય છે.
જોકે, T20 ક્રિકેટમાં ગમે ત્યારે પાસું પલટી શકે છે. તેથી હરમનપ્રીત કૌરની આગેવાની હેઠળની ભારતીય ટીમે સેમીફાઈનલમાં પહોંચવા માટે શરૂઆતથી જ શાનદાર પ્રદર્શન કરવું પડશે.
<
