ઉનાળાની ઋતુમાં સૂર્યનો પારો 45 ડિગ્રીને પાર પહોંચી રહ્યો છે. આવી સ્થિતિમાં જો તમારી કાર ખુલ્લામાં કે તડકામાં પાર્ક કરેલી હોય, તો તે અંદરથી ઓવન જેવી ગરમ થઈ જાય છે. નિષ્ણાતોના મતે, બહારનું તાપમાન 40 ડિગ્રી હોય ત્યારે કારની અંદરનું તાપમાન 60 થી 70 ડિગ્રી સુધી પહોંચી શકે છે. આટલી ગરમીમાં કારમાં રાખેલી કેટલીક સામાન્ય વસ્તુઓ પણ વિસ્ફોટનું કારણ બની શકે છે.
કારમાં કઈ 3 વસ્તુઓ રાખવી જોખમી છે?
1. પાવર બેંક અને ઇલેક્ટ્રોનિક ગેજેટ્સ ઘણા લોકો મોબાઈલ, લેપટોપ કે પાવર બેંક ગાડીમાં જ છોડી દેતા હોય છે. આ ઉપકરણોમાં લિથિયમ-આયન બેટરી હોય છે. અતિશય ગરમીને કારણે બેટરી ઓવરહીટ થઈ શકે છે અને તેમાં બ્લાસ્ટ થવાનું જોખમ રહે છે. આનાથી આખી કારમાં આગ લાગી શકે છે.
2. પરફ્યુમ અને ડિઓ સ્પ્રે પરફ્યુમ કે ડિઓડ્રન્ટની બોટલમાં જ્વલનશીલ ગેસ હોય છે. જ્યારે કાર તડકામાં ઉભી હોય ત્યારે બોટલની અંદર દબાણ (Pressure) વધી જાય છે, જેના કારણે સ્પ્રે કેન ફાટી શકે છે. આ ગરમીમાં આગ પકડવા માટે પૂરતું છે.
3. પાણીની બોટલ અને લાઈટર પ્લાસ્ટિકની પારદર્શક પાણીની બોટલ તડકામાં ‘મેગ્નિફાઈંગ ગ્લાસ’ જેવું કામ કરી શકે છે. સૂર્યના કિરણો બોટલમાંથી પસાર થઈ સીટ પર કે કપડા પર કેન્દ્રિત થાય તો આગ લાગી શકે છે. આ ઉપરાંત, ગેસ લાઈટર પણ વધુ ગરમીમાં ફાટી શકે છે.
કારને સુરક્ષિત રાખવા માટેની ટિપ્સ
-
કારને હંમેશા છાંયડામાં પાર્ક કરવાનો આગ્રહ રાખો.
-
જો તડકામાં પાર્ક કરવી પડે, તો બારીના કાચ સહેજ ખુલ્લા રાખો જેથી ગરમ હવા બહાર નીકળી શકે.
-
કારમાં ક્યારેય પણ જ્વલનશીલ પદાર્થો કે ગેજેટ્સ ન છોડો.
-
વિન્ડશિલ્ડ પર સનશેડનો ઉપયોગ કરો.
-
સુરક્ષા માટે કારમાં નાનું ફાયર એક્સટિંગ્વિશર રાખવું ફાયદાકારક છે.
