AMC માં ફરી નિયમો નેવે મૂકાયા: ૧૮૦ પ્યૂન પૂરા પાડવા ₹૫ કરોડનું કામ ટેન્ડર વિના જ આપવાનો ખેલ; કરારપત્ર અને ડિપોઝિટમાંથી પણ મુક્તિ!

૧૫ હજાર કર્મચારીઓ છતાં પટ્ટાવાળાની ઘટનું બહાનું

• કર્મચારીઓની મોટી ફોજ: અમદાવાદ મ્યુનિસિપલ કોર્પોરેશનમાં હાલ ૧૫ હજારથી વધુ કાયમી અને અન્ય કર્મચારીઓ ફરજ બજાવી રહ્યા છે, છતાં વિવિધ ખાતાઓમાં પટ્ટાવાળાની તીવ્ર અછત હોવાનું કારણ આગળ ધરીને આઉટસોર્સિંગનો સહારો લેવાઈ રહ્યો છે.
• ૬૦-૬૦ પટ્ટાવાળાની વહેંચણી: નવી દરખાસ્ત અનુસાર, આગામી એક વર્ષ માટે ૧૮૦ પટ્ટાવાળાની સેવા ત્રણ એજન્સીઓ પાસેથી લેવાશે, જેમાં પ્રત્યેક એજન્સી પાસેથી ૬૦-૬૦ પટ્ટાવાળા મેળવવાનું આયોજન છે. તેમાંથી દરેક એજન્સીના ૯ કર્મચારીઓ સેક્રેટરી ઓફિસમાં અને બાકીના ૫૧ કર્મચારીઓ અન્ય ખાતાઓમાં ફાળવવામાં આવશે.

ઓગસ્ટ ૨૦૨૫ ના જૂના ઠરાવના આધારે લ્હાણી

• ૨૨ ઓગસ્ટ, ૨૦૨૫ ના રોજ હેલ્થ એન્ડ સોલિડ વેસ્ટ મેનેજમેન્ટ કમિટીમાં થયેલા ઠરાવ મુજબ રૂ. ૬.૧૩ કરોડના ખર્ચે ૧૬૪ અને રૂ. ૧૬ કરોડના ખર્ચે ૨૮૮ પટ્ટાવાળા બે વર્ષ માટે મેળવવાની અગાઉની બે દરખાસ્તો મંજૂર કરાઈ હતી.
• તે ગણતરી મુજબ પ્રત્યેક પટ્ટાવાળા પાછળ વાર્ષિક રૂ. ૨.૭૭ લાખ એટલે કે માસિક આશરે રૂ. ૨૩,૧૫૦ નો ખર્ચ મ્યુનિસિપલ તિજોરીમાંથી ચૂકવવામાં આવે છે.
• પગારમાં કટકીના આક્ષેપો: તંત્ર દ્વારા માસિક રૂ. ૨૩,૧૫૦ ચૂકવાતા હોવા છતાં ખરેખર પટ્ટાવાળાઓના હાથમાં માત્ર રૂ. ૧૨,૦૦૦ થી રૂ. ૧૫,૦૦૦ જેટલો નજીવો પગાર જ આવતો હોવાની ચર્ચા છે, જ્યારે બાકીની મોટી રકમ એજન્સીઓના ખિસ્સામાં જતી હોવાના ગંભીર આક્ષેપો થઈ રહ્યા છે.

કઈ ત્રણ એજન્સીઓને કામ સોંપાશે?

1. અલ્ટ્રામોર્ડન એજન્સી
2. ક્લીન ઇન્ડિયા
3. શાશ્વત સાફ્લ્ય પ્રા. લિ.