લૂંટ અને હત્યાનો પ્રયાસ… ૪૦ વર્ષ સુધી પોલીસને ચકમો આપ્યો: બરેલીમાં ‘પાગલદાસ’ સાધુ બનીને રહેતો આરોપી આખરે ઝડપાયો!

Kanpur : ઉત્તર પ્રદેશના કાનપુરમાં લગભગ ચાર દાયકા (૪૦ વર્ષ) પહેલાં નોંધાયેલા લૂંટ અને હત્યાના પ્રયાસના ચકચારી કેસમાં ૧૦ વર્ષની કેદની સજા ભોગવ્યા વગર ફરાર થઈ ગયેલો કુખ્યાત આરોપી રામપ્રકાશ આખરે કાનપુર પોલીસના સકંજામાં આવી ગયો છે. વર્ષ ૧૯૮૬માં સેશન્સ કોર્ટ દ્વારા સજા સંભળાવ્યા બાદ તે હાઈકોર્ટમાંથી જામીન મેળવીને છૂટ્યો હતો અને ત્યારથી ભૂગર્ભમાં ઉતરી ગયો હતો.

પોલીસ અને કાયદાથી બચવા માટે તેણે પોતાનું અસલી નામ-સરનામું બદલી નાખ્યું હતું અને બરેલીના એક ગામમાં જંગલ નજીક કુટિયા બનાવીને ‘પાગલદાસ’ ના નામે સાધુ જેવું જીવન વિતાવી રહ્યો હતો.

શું હતો ૪૦ વર્ષ જૂનો સમગ્ર મામલો?

• ૧૯૮૪માં ગુનો નોંધાયો: કાનપુરના ફઝલગંજ પોલીસ સ્ટેશન વિસ્તારમાં વર્ષ ૧૯૮૪માં લૂંટ અને હત્યાના પ્રયાસનો ગંભીર ગુનો નોંધાયો હતો. પોલીસે તે સમયે કાકાદેવ વિસ્તારના સરનામે રહેતા રામપ્રકાશની ધરપકડ કરી હતી. તેના પર અગાઉ પણ અન્ય ગુના નોંધાયેલા હતા.

• ૧૦ વર્ષની કેદ અને ફરાર: વર્ષ ૧૯૮૬માં સ્થાનિક સેશન્સ કોર્ટે તમામ પુરાવાઓને આધારે રામપ્રકાશને ૧૦ વર્ષની સખત કેદની સજા ફટકારી હતી.

• બોગસ જામીનદારો: સજા જાહેર થયા બાદ તેણે હાઈકોર્ટમાંથી વચગાળાના જામીન મેળવી લીધા હતા. જેલમાંથી બહાર આવ્યા પછી તે ક્યારેય કોર્ટ સમક્ષ હાજર થયો નહીં. તપાસમાં સામે આવ્યું હતું કે જામીન મેળવતી વખતે તેણે કોર્ટમાં રજૂ કરેલા સરનામા અને જામીનદારોની તમામ વિગતો સંપૂર્ણપણે બોગસ હતી.

પોલીસે કેવી રીતે મેળવ્યો સગડ?

કાનપુર પોલીસે જૂના પેન્ડિંગ વોરંટ અને ફરાર આરોપીઓની યાદી તૈયાર કરી રામપ્રકાશની નવેસરથી શોધખોળ શરૂ કરી હતી:

• કન્નૌજ કનેક્શન: ઊંડાણપૂર્વકની તપાસમાં સામે આવ્યું કે રામપ્રકાશ મૂળ કન્નૌજના ગુરસહાયગંજનો વતની હતો. પોલીસે ત્યાં પહોંચીને લગભગ બે મહિના સુધી ગુપ્ત રીતે માહિતી એકત્ર કરી.

• ગામના સરપંચ પાસેથી લીડ: કન્નૌજના એક ગ્રામ પ્રધાન (સરપંચ) સાથે રામપ્રકાશનો જૂનો વિવાદ ચાલતો હતો. આ સરપંચ પાસેથી પોલીસને મહત્વની બાતમી મળી કે તે પશ્ચિમ ઉત્તર પ્રદેશના બરેલી જિલ્લામાં ક્યાંક છુપાયેલો છે.

• મોબાઇલ ટ્રેકિંગથી ધરપકડ: પોલીસે તેના પરિવારજનો અને સંબંધીઓના મોબાઈલ કોલ ડિટેલ્સ રેકોર્ડ્સ (CDR) અને લોકેશન ટ્રેસ કરવાનું શરૂ કર્યું, જેના આધારે આખરે બરેલીના ગજનેરા ગામ પાસે તેનું ચોક્કસ લોકેશન મળી આવ્યું હતું.

કુટિયા બનાવી ‘પાગલદાસ’ બન્યો, કેન્સરની બીમારીમાં સપડાયો

પોલીસ ટીમ જ્યારે બરેલીના ગજનેરા ગામ પહોંચી ત્યારે તેને ઓળખવો અત્યંત મુશ્કેલ હતો:

• તેણે પોતાનો પહેરવેશ, દેખાવ અને બોલી સંપૂર્ણ બદલી નાખી હતી.

• તેણે પોતાનું નામ બદલીને ‘પાગલદાસ’ રાખી લીધું હતું અને જંગલ પાસે એક નાની ઝૂંપડી (કુટિયા) બનાવીને એકાંતમાં રહેતો હતો. ગામના લોકોમાં પણ તે એક સાધુ તરીકે જાણીતો બની ગયો હતો.

• ૪૦ વર્ષ સુધી પોલીસને હાથતાળી આપનાર રામપ્રકાશ હાલ કેન્સરની ગંભીર બીમારીથી પીડાઈ રહ્યો છે. કાનપુર પોલીસે રવિવારે ઘેરાબંધી કરીને તેની ધરપકડ કરી લીધી હતી અને હવે તેને કાયદાકીય પ્રક્રિયા પૂર્ણ કરી જેલના સળિયા પાછળ મોકલવાની તજવીજ હાથ ધરાઈ છે.