દેશના રેલવે મુસાફરોને ઝડપી ગતિ, અત્યાધુનિક સુવિધાઓ અને પ્રીમિયમ પ્રવાસનો અનુભવ પૂરો પાડવાના દાવા સાથે શરૂ કરાયેલી વંદે ભારત એક્સપ્રેસ (Vande Bharat Express) ની વાસ્તવિક સ્થિતિ સામે આવતાં રેલવે પ્રશાસનની જાળવણી વ્યવસ્થા સામે ગંભીર સવાલો ઊભા થયા છે. સાબરમતીથી વેરાવળ (સોમનાથ) વચ્ચે દોડતી ટ્રેન નંબર ૨૬૮૦૧ ની અત્યંત દયનીય હાલત સામે આવી છે, જેમાં બહારની ગંદકી, તૂટેલા કાચ અને કાટ ખાઈ ગયેલાં શૌચાલયોએ પ્રીમિયમ સેવાના દાવાઓની પોલ ખોલી નાખી છે.
ગત ૨ ઓક્ટોબરના રોજ બોટાદ-ઢસા રૂટ પરથી પસાર થઈ રહેલી આ ટ્રેનની ખરાબ હાલતના ફોટો અને વીડિયો એક જાગૃત નાગરિક દ્વારા સોશિયલ મીડિયા પર વાયરલ કરવામાં આવતાં મુસાફરોમાં ભારે નારાજગી ફેલાઈ છે.
પ્રીમિયમ ટ્રેનનો કંગાળ રખરખાવ: શું છે વાસ્તવિકતા?
-
તૂટેલા કાચ અને બહાર ગંદકી: ટ્રેનની બહારની બોડી પર ધૂળ અને ગંદકીના થર જામેલા જોવા મળ્યા હતા. આ ઉપરાંત કોચના કેટલાક કાચ તૂટેલી અને ક્ષતિગ્રસ્ત હાલતમાં હતા, જે પ્રવાસ દરમિયાન સુરક્ષા સામે પણ જોખમ ઊભું કરે છે.
-
શૌચાલયમાં કાટનું સામ્રાજ્ય: ટ્રેનના અંદરના ભાગમાં ખાસ કરીને ટૉઇલેટમાં ફિટિંગ્સ પર કાટ લાગેલા નિશાનો સ્પષ્ટ નજરે પડતા હતા, જે રેલવેના સ્વચ્છતા અને સેનિટાઈઝેશનના દાવાઓને પોકળ સાબિત કરે છે.
-
નવા રૂટ પર થોડા જ મહિનામાં બદહાલ સ્થિતિ: સૌરાષ્ટ્ર અને સોમનાથ દર્શનાર્થે જતાં શ્રદ્ધાળુઓ તેમજ અમદાવાદ આવતા-જતા મુસાફરોને અદ્યતન ટ્રેનનો લાભ મળે તે માટે આ ટ્રેનને કાયમી ધોરણે બોટાદ-ઢસા રૂટ પર ટ્રાન્સફર કરવામાં આવી છે. આ સેવા શરૂ થયાને હજુ ગણતરીના મહિનાઓ જ વીત્યા છે, ત્યાં ટ્રેનની આવી ખરાબ સ્થિતિએ પ્રશાસનની બેદરકારી છતી કરી દીધી છે.
પ્રીમિયમ ભાડું ચૂકવતા મુસાફરોની અપેક્ષા પર પાણી ફર્યું
વંદે ભારત એક્સપ્રેસનું ભાડું સામાન્ય એક્સપ્રેસ ટ્રેનો કરતાં ઘણું વધારે હોય છે. મુસાફરો ઉચ્ચ સ્તરની સ્વચ્છતા, હાઈ-ક્લાસ સર્વિસ અને સુવિધાજનક પ્રવાસની અપેક્ષા સાથે ટિકિટ બુક કરાવતા હોય છે.
જ્યારે ભારતીય રેલવે વંદે ભારતને પોતાની સૌથી મોટી ઉપલબ્ધિ અને રાષ્ટ્રીય શાન તરીકે પ્રોજેક્ટ કરી રહી છે, ત્યારે લાખો રૂપિયાના પ્રીમિયમ ભાડા સામે આવી બેદરકારીભરી જાળવણી સામે મુસાફરો કડક તપાસ અને જવાબદાર વિભાગ સામે પગલાં લેવાની માંગ કરી રહ્યા છે.
