પાર્ટી પ્લોટ, ક્લબ કે સોસાયટી અને શેરી ગરબા માટે અમદાવાદ પોલીસના ૪૪ નિયમો: રાત્રે ૧૨ વાગ્યા સુધી જ માઇક ચાલુ રાખી શકાશે!

Navratri :  અમદાવાદ શહેરમાં ૧૧ થી ૨૦ ઓક્ટોબર દરમિયાન ઉજવાનારા નવરાત્રિ અને વિજયાદશમી (દશેરા) ના પર્વને ધ્યાનમાં રાખીને પોલીસ કમિશનરે સત્તાવાર જાહેરનામું બહાર પાડ્યું છે. ખેલૈયાઓની સલામતી, મહિલા સુરક્ષા, અડચણમુક્ત ટ્રાફિક વ્યવસ્થા અને શાંતિપૂર્ણ વાતાવરણ જળવાઈ રહે તે હેતુથી તમામ પાર્ટી પ્લોટ, ક્લબ, હાઉસિંગ સોસાયટીઓ અને શેરી ગરબાના આયોજકો માટે કુલ ૪૪ કડક નિયમો ની યાદી જાહેર કરવામાં આવી છે.

આ જાહેરનામામાં પરવાનગી મેળવવા સંબંધિત ૧૨ નિયમો અને કાર્યક્રમ સ્થળની સુરક્ષા તેમજ સુવ્યવસ્થા જાળવવા માટેના ૩૨ નિયમોનો સમાવેશ થાય છે.

સમય મર્યાદા અને લાઉડસ્પીકરની પરવાનગીના મુખ્ય નિયમો

• રાત્રે ૧૨ વાગ્યા સુધીની જ ડેડલાઇન: તમામ પ્રકારના ગરબા આયોજનોમાં રાત્રે ૧૨ વાગ્યા સુધી જ લાઉડસ્પીકર, માઇક સિસ્ટમ કે પબ્લિક એડ્રેસ સિસ્ટમ વગાડવાની મંજૂરી રહેશે. ૧૨ વાગ્યા પછી માઇક સંપૂર્ણપણે બંધ કરવાના રહેશે અને ધ્વનિ પ્રદૂષણના નિયમોનું ચુસ્ત પાલન કરવું પડશે.

• સાયલન્ટ ઝોન પર પ્રતિબંધ: હોસ્પિટલો, શૈક્ષણિક સંસ્થાઓ અને અદાલતોની આસપાસ આવેલા સાયલન્ટ ઝોનમાં કોઈપણ પ્રકારના લાઉડસ્પીકર વગાડવા પર સંપૂર્ણ પ્રતિબંધ રહેશે.

• શેરી ગરબા માટે સરળ મંજૂરી: સોસાયટી અને શેરી ગરબા જેવા બિન-વ્યાવસાયિક આયોજનો માટે સ્થાનિક પોલીસ સ્ટેશનના પી.આઈ. (પોલીસ ઇન્સ્પેક્ટર) દ્વારા જ મંજૂરી આપવામાં આવશે.

• કોમર્શિયલ ગરબા માટે ACP ની મંજૂરી: ટિકિટ કે પાસ આધારિત પાર્ટી પ્લોટ અને ક્લબના વ્યાવસાયિક આયોજનો માટે સ્થાનિક પોલીસ સ્ટેશનના અભિપ્રાય બાદ એસીપી (ટ્રાફિક) દ્વારા અંતિમ મંજૂરી આપવામાં આવશે.

• પોલીસ અને પબ્લિક મેન્ટર્સ: શેરી ગરબાઓમાં પોલીસ સાથે સંકલન માટે આયોજકોએ બે સ્થાનિક મેન્ટર્સ નીમવાના રહેશે, જેમના સંપર્કમાં પોલીસ સ્ટેશન તરફથી નિયુક્ત એક પોલીસ મેન્ટર રહેશે. આ ટીમ નશાખોરી, છેડતી અને ટ્રાફિક નિયંત્રણ પર સીધી નજર રાખશે.

મહિલા સુરક્ષા અને AI કેમેરાથી મોનિટરિંગ

• ‘શી ટીમ’ સાથે સંકલન: મહિલાઓની સુરક્ષા અને છેડતીના બનાવો રોકવા માટે આયોજકોએ સ્થાનિક પોલીસની સ્પેશિયલ ‘શી ટીમ’ (She Team) સાથે સંકલન સાધવાનું રહેશે.

• AI બેઝ્ડ સીસીટીવી કેમેરા: ગરબા મેદાન અને પાર્કિંગ એરિયામાં પૂરતા સીસીટીવી કેમેરા ઉપરાંત અસામાજિક તત્વો પર નજર રાખવા માટે એડવાન્સ AI (આર્ટિફિશિયલ ઇન્ટેલિજન્સ) સજ્જ કેમેરા ફરજિયાત લગાવવાના રહેશે.

• વોચ ટાવર અને વિડીયો રેકોર્ડિંગ: ગરબા ગ્રાઉન્ડમાં ૪ વોચ ટાવર ઊભા કરી સમગ્ર ઇવેન્ટનું સતત વિડીયો રેકોર્ડિંગ કરવાનું રહેશે.

• ઓળખ કાર્ડ અને પાસ વિતરણ: ગરબાની મંજૂર ક્ષમતા કરતાં વધુ પાસનું વિતરણ કરી શકાશે નહીં. પાસધારકોના માન્ય ઓળખ પુરાવા રાખવા પડશે અને ફરજ બજાવતા તમામ સિક્યુરિટી ગાર્ડ્સ તથા વોલેન્ટિયર્સને ઓળખપત્ર આપવાના રહેશે.

ટ્રાફિક, ડ્રગ્સ વિરોધી પગલાં અને અન્ય સુરક્ષા વ્યવસ્થાઓ

• ૨૦૦ મીટર સુધી નો-ટ્રાફિક જામ: ગરબા સ્થળની બંને બાજુએ ૨૦૦ મીટરના વિસ્તારમાં કોઈ ટ્રાફિક જામ કે અવરોધરૂપ પાર્કિંગ ન થાય તે સુનિશ્ચિત કરવાની સંપૂર્ણ જવાબદારી આયોજકોની રહેશે.

• બ્રેથ એનેલાઈઝર અને મેટલ ડિટેક્ટર: કેફી દ્રવ્યો કે દારૂ પીધેલી હાલતમાં કોઈ પ્રવેશ ન કરે તે માટે એન્ટ્રી ગેટ પર બ્રેથ એનેલાઈઝર, ડોરફ્રેમ મેટલ ડિટેક્ટર (DFMD) અને હેન્ડ મેટલ ડિટેક્ટર (HHMD) રાખવા પડશે. નશાખોરોને પકડી પોલીસને સોંપવા માટે બે ખાસ વ્યક્તિઓ નિયુક્ત કરવાના રહેશે.

• અલગ એન્ટ્રી-એક્ઝિટ અને બેરીકેડિંગ: ખેલૈયાઓ અને દર્શકો વચ્ચે યોગ્ય અંતર માટે મજબૂત બેરીકેડિંગ, એન્ટ્રી અને એક્ઝિટ માટે અલગ-અલગ ગેટ તથા ઈમરજન્સી એમ્બ્યુલન્સ ગેટની અલાયદી વ્યવસ્થા કરવી પડશે.

• અશ્લીલ ગીતો પર પ્રતિબંધ: ધાર્મિક લાગણી દુભાય તેવા કે અશ્લીલ ગીતો વગાડવા પર કડક મનાઈ રહેશે. ઉપરાંત, સાઉન્ડ સિસ્ટમ ભાડે આપનાર તમામ વેન્ડર્સની વિગતો પણ પોલીસને આપવાની રહેશે.

• સેલિબ્રિટી વિઝિટની આગોતરી જાણ: કોઈપણ વીઆઈપી, સેલિબ્રિટી કે લોકપ્રિય કલાકાર ઉપસ્થિત રહેવાના હોય તો તેની જાણ અગાઉથી પોલીસ તંત્રને કરવી ફરજિયાત રહેશે.