દિલ્હીના લોધી કોલોની વિસ્તારમાંથી એક અત્યંત ચોંકાવનારો કિસ્સો સામે આવ્યો છે. અહીં એક પાલિકા કુંજ NDMC સોસાયટીમાંથી ૨૮ વર્ષની નવવધૂની લાશ શંકાસ્પદ હાલતમાં મળી આવી છે. મૃતક યુવતીની ઓળખ આકૃતિ તરીકે થઈ છે. તેના લગ્ન હજુ અઢી મહિના પહેલા જ થયા હતા.
સૌથી મોટી આશ્ચર્યની વાત એ છે કે, જે સોસાયટીમાંથી આકૃતિની લાશ મળી છે, ત્યાં તેનું કોઈ ઓળખીતું રહેતું નહોતું.
મિત્રોને પાર્ટી આપીને પરત ફરી રહી હતી આકૃતિ
આ ઘટના શનિવારે રાત્રે આશરે ૯.૦૦ વાગ્યાની છે. સોસાયટીના લોકોએ લોહીલુહાણ હાલતમાં છોકરીની લાશ જોઈ હતી. ત્યારબાદ તરત જ પોલીસને જાણ કરવામાં આવી હતી.
પરિવારના જણાવ્યા મુજબ, આકૃતિ છતરપુરમાં સેલ્સ એક્ઝિક્યુટિવ તરીકે નોકરી કરતી હતી. તેના લગ્ન ૨૪ એપ્રિલ ૨૦૨૬ના રોજ થયા હતા. શનિવારે તેણે પોતાના મિત્રોને લગ્નની પાર્ટી આપી હતી.
મેટ્રો સ્ટેશન પહોંચ્યા બાદ ફોન સ્વિચ ઓફ થયો
સાંજે આકૃતિએ તેની માતાને ફોન કરીને જણાવ્યું હતું કે તે ઘરની નજીકના મેટ્રો સ્ટેશન પર પહોંચી ગઈ છે. પરંતુ આ ફોન કોલના થોડી જ વાર પછી તેનો ફોન સ્વિચ ઓફ થઈ ગયો હતો. પરિવારજનો તેની રાહ જોતા રહ્યા અને રાત્રે ૯.૦૦ વાગ્યે લોધી કોલોનીમાંથી તેની લાશ મળવાના સમાચાર આવ્યા.
સોસાયટી સાથે કોઈ કનેક્શન નહોતું
આકૃતિના પરિવારવાળા ભારે આઘાતમાં છે. તેમનું કહેવું છે કે આ સોસાયટી સાથે આકૃતિને કોઈ લેવાદેવા નહોતી. ત્યાં તેમનો કોઈ સંબંધી પણ રહેતો નથી. હવે મોટો સવાલ એ છે કે આકૃતિ લોધી કોલોનીની આ સોસાયટીમાં કેવી રીતે અને કેમ પહોંચી?
પોલીસ કરી રહી છે તપાસ
પોલીસે મૃતદેહને કબજામાં લઈને તપાસ શરૂ કરી દીધી છે. કાયદા મુજબ, લગ્નના ૭ વર્ષની અંદર જો પત્નીનું શંકાસ્પદ મોત થાય તો SDM તપાસ થાય છે, તેથી SDMને પણ જાણ કરી દેવામાં આવી છે.
પોલીસ હાલમાં સોસાયટીના અને આસપાસના સીસીટીવી (CCTV) ફૂટેજ તપાસી રહી છે. આકૃતિ ત્યાં કોની સાથે આવી હતી અને તેની સાથે શું બન્યું, તે અંગેની તપાસ ચાલુ છે.
