ફિફા વર્લ્ડ કપ 2026નો ફાઇનલ મુકાબલો માત્ર આર્જેન્ટિના અને સ્પેન વચ્ચેની મેચ નથી. આ મેચ ફૂટબોલ ઇતિહાસની બે અલગ-અલગ પેઢીઓના મિલનની એક અદ્ભુત વાર્તા છે. રવિવારે ન્યૂજર્સીના મેટલાઇફ સ્ટેડિયમમાં વર્લ્ડ કપ ફાઇનલ રમાશે. આ મેચમાં એક તરફ 39 વર્ષના મહાન ખેલાડી લિયોનેલ મેસી હશે. જ્યારે બીજી તરફ 19 વર્ષનો યુવા સ્ટાર લામિન યમાલ હશે.
આ બંને ખેલાડીઓ વચ્ચે 19 વર્ષ જૂનો એક એવો રસપ્રદ કિસ્સો જોડાયેલો છે, જેના પર વિશ્વાસ કરવો મુશ્કેલ છે.
જ્યારે 20 વર્ષના મેસીએ 5 મહિનાના યમાલને ટબમાં નવડાવ્યો હતો
આ કહાની ડિસેમ્બર 2007માં શરૂ થઈ હતી. તે સમયે લિયોનેલ મેસી માત્ર 20 વર્ષના હતા. તેઓ બાર્સિલોના ક્લબ તરફથી રમીને એક ઉભરતા સિતારા તરીકે નામના મેળવી રહ્યા હતા. સ્પેનિશ અખબાર ‘ડિયારિયો સ્પોર્ટ’ અને યુનિસેફ (UNICEF) ના એક ચેરિટી કેલેન્ડર ફોટોશૂટ યોજાયું હતું. આ શૂટિંગમાં મેસીએ એક સ્થાનિક પરિવારના 5 મહિનાના બાળક સાથે તસવીરો ખેંચાવવાની હતી.
આ માસૂમ બાળક બીજું કોઈ નહીં પણ આજના સમયનો ફૂટબોલ સ્ટાર લામિન યમાલ હતો.
મેસી ખૂબ જ શરમાળ સ્વભાવના હતા
આ ફોટોશૂટ કરનાર ફોટોગ્રાફર જોઆન મોનફોર્ટના જણાવ્યા મુજબ, તે સમયે મેસી ખૂબ જ શરમાળ હતા. તેમને સમજાતું નહોતું કે આટલા નાના બાળકને કેવી રીતે સંભાળવો. એક વાદળી પ્લાસ્ટિકના ટબમાં બેઠેલા બાળ યમાલને મેસીએ પોતાની ગોદમાં લીધો હતો.
તે સમયે કોઈએ સપનામાં પણ વિચાર્યું નહોતું કે આ બાળક એક દિવસ વર્લ્ડ કપ ફાઇનલમાં મેસીની સામે જ પ્રતિદ્વંદ્વી બનીને મેદાન પર ઉતરશે. વર્ષ 2024માં યમાલના પિતાએ આ તસવીરો સોશિયલ મીડિયા પર શેર કરી ત્યારે તે ભારે વાયરલ થઈ હતી.
‘લા માસિયા એકેડેમી’નું કનેક્શન
મેસી અને યમાલ વચ્ચે માત્ર આ વાયરલ ફોટોનો જ સંબંધ નથી. બંનેની ફૂટબોલ સફર પણ બાર્સિલોનાની વિશ્વપ્રસિદ્ધ ‘લા માસિયા એકેડેમી’માંથી શરૂ થઈ છે. આ એકેડેમીમાં જ મેસીએ પોતાના ખેલને નિખાર્યો હતો. વર્ષો પછી યમાલ પણ આ જ એકેડેમીમાંથી તૈયાર થઈને ફૂટબોલની દુનિયાનો નવો સિતારો બન્યો છે.
આ મેચને બાર્સિલોનાની ફૂટબોલ વિરાસતની બે પેઢીઓ વચ્ચેની અનોખી લડાઈ પણ માનવામાં આવી રહી છે.
ગોલ્ડન બૂટની રેસમાં મેસી સૌથી આગળ
39 વર્ષની ઉંમરે પણ મેસીએ સાબિત કર્યું છે કે તેમની રમતમાં હજુ પણ એ જ જાદુ અકબંધ છે. સેમિ ફાઇનલમાં આર્જેન્ટિનાને જીત અપાવીને તેમણે ટીમને ફાઇનલમાં પહોંચાડી છે. આ વર્લ્ડ કપમાં મેસી 7 મેચોમાં 8 ગોલ અને 4 આસિસ્ટ સાથે ગોલ્ડન બૂટની રેસમાં સૌથી આગળ છે.
હવે જોવાનું એ રહેશે કે મેસી વધુ એક વર્લ્ડ કપ ટ્રોફી પોતાના નામે કરે છે કે પછી લામિન યમાલ નવી પેઢીનો સુપરસ્ટાર બને છે.
