બોલિવૂડના દિગ્ગજ સિંગર અલકા યાગ્નિક છેલ્લા બે વર્ષથી લાઈમલાઈટ અને પબ્લિક ઈવેન્ટ્સથી દૂર હતા. જોકે, તાજેતરમાં જ તેઓ પદ્મ પુરસ્કાર સમારોહમાં સામેલ થયા હતા, જ્યાં તેમને પ્રતિષ્ઠિત ‘પદ્મ ભૂષણ’ એવોર્ડથી સન્માનિત કરવામાં આવ્યા. આ સમારોહમાંથી તેમનો એક વીડિયો સોશિયલ મીડિયા પર વાયરલ થયો હતો, જેમાં તેઓ વ્હીલચેર પર જોવા મળ્યા હતા. આ જોઈને ચાહકો તેમની તબિયતને લઈને ચિંતિત થઈ ગયા હતા. હવે સિંગરે પોતે જ સોશિયલ મીડિયા પર પોસ્ટ શેર કરીને સત્ય જણાવ્યું છે.
શા માટે લેવો પડ્યો વ્હીલચેરનો સહારો?
અલકા યાગ્નિકે ઈન્સ્ટાગ્રામ પર રાષ્ટ્રપતિ દ્રૌપદી મુર્મુ સાથેની તસવીર શેર કરીને ચાહકોની ચિંતા દૂર કરી છે. તેમણે લખ્યું:
“તમારા પ્રેમ, ચિંતા અને અગણિત શુભેચ્છાઓ માટે આભાર. મેં સમારોહના એક વીડિયોને લઈને લોકોની ચિંતા જોઈ છે. હું દરેકને ખાતરી આપવા માંગુ છું કે હું એકદમ ઠીક છું અને મારી રિકવરી પણ સારી થઈ રહી છે. પદ્મ સન્માન સમારોહના લાંબા દિવસ બાદ હું માત્ર થાકી ગઈ હતી, તેથી બહાર નીકળતી વખતે મેં વ્હીલચેર માંગી હતી.”
તેમણે આગળ ઉમેર્યું કે, “કૃપા કરીને ચિંતા ન કરો. હું હવે ઘણું સારું અનુભવી રહી છું અને આ અદભૂત સન્માન માટે ભારત સરકારનો દિલથી આભાર માનું છું.”
કઈ બીમારીનો સામનો કરી રહ્યા છે અલકા યાગ્નિક?
વર્ષ 2024માં અલકા યાગ્નિકે એક પબ્લિક પોસ્ટ દ્વારા ખુલાસો કર્યો હતો કે તેઓ એક વિરલ બીમારી ‘રેર સેન્સરી ન્યુરલ નર્વ હિયરિંગ લોસ’ (Rare Sensory Neural Nerve Hearing Loss) થી પીડાઈ રહ્યા છે, જેના કારણે તેમને સાંભળવામાં તકલીફ થઈ રહી હતી. આ જ કારણે તેઓ છેલ્લા બે વર્ષથી લાઈમલાઈટ અને શૂટિંગથી દૂર હતા.
પદ્મ ભૂષણ મળવા પર વ્યક્ત કર્યો આભાર
દેશનો સર્વોચ્ચ નાગરિક પુરસ્કાર મળવા પર અલકા યાગ્નિક ભાવુક દેખાયા હતા. તેમણે જણાવ્યું કે, ભલે આ એવોર્ડ પર તેમનું નામ છે, પરંતુ આ સન્માન એ દરેક શ્રોતાઓનું છે જેમણે પેઢીઓ સુધી તેમના ગીતોને પ્રેમ આપ્યો છે અને મુશ્કેલ સમયમાં પણ તેમની સાથે ઉભા રહ્યા છે.
