જનરલ એનએસ રાજા સુબ્રમણિ: દેશના નવા અને ત્રીજા ચીફ ઓફ ડિફેન્સ સ્ટાફ

જનરલ એન.એસ. રાજા સુબ્રમણિ એ રવિવાર, 31 મે 2026 ના રોજ દેશના ત્રીજા ચીફ ઓફ ડિફેન્સ સ્ટાફ (CDS) તરીકે કાર્યભાર સંભાળી લીધો છે. પદભાર ગ્રહણ કર્યા પછી તેમને સાઉથ બ્લોકમાં ઔપચારિક ‘ગાર્ડ ઓફ ઓનર’ આપવામાં આવ્યું હતું. તે ગઢવાલ રેજિમેન્ટના વરિષ્ઠ અધિકારી છે. તેમણે જનરલ અનિલ ચૌહાનનું સ્થાન લીધું છે, જેઓ 30 મેના રોજ નિવૃત્ત થયા હતા.

નવું લક્ષ્ય: ‘જય’ (JAI) પર ફોકસ

કાર્યભાર સંભાળ્યા પછી જનરલ સુબ્રમણિ એ તેમનું વિઝન સ્પષ્ટ કર્યું હતું. તેમના નેતૃત્વમાં ભારતીય સશસ્ત્ર દળોનું મુખ્ય ફોકસ ‘જય’ (JAI) પર રહેશે:

• J – Jointness (સંયુક્તતા)

• A – Aatmanirbharta (આત્મનિર્ભરતા)

• I – Innovation (નવાચાર/નવીનતા)

40 વર્ષનું શાનદાર અને ગૌરવપૂર્ણ કરિયર

જનરલ સુબ્રમણિ પાસે 40 વર્ષથી વધુનો બહોળો અનુભવ છે. તેમણે દેશના વિવિધ મુશ્કેલ વિસ્તારોમાં સેનાની કમાન સંભાળી છે.

• જન્મ અને કમિશન: તેઓ રાષ્ટ્રીય સંરક્ષણ એકેડેમી (NDA) અને ભારતીય સૈન્ય એકેડેમી (IMA) ના સ્નાતક છે. 14 ડિસેમ્બર 1985ના રોજ તેઓ ગઢવાલ રાઇફલ્સની 8મી બટાલિયનમાં સામેલ થયા હતા.

• મુખ્ય ઓપરેશન્સ: તેમણે આસામમાં ઉગ્રવાદ વિરોધી ‘ઓપરેશન રાઈનો’ દરમિયાન 16 ગઢવાલ રાઈફલ્સનું નેતૃત્વ કર્યું હતું.

• મહત્વના કમાન્ડ: તેમણે જમ્મુ-કાશ્મીરમાં 168 ઇન્ફન્ટ્રી બ્રિગેડ અને મધ્ય સેક્ટરમાં 17 માઉન્ટેન ડિવિઝનની કમાન સંભાળી છે. આ સિવાય પશ્ચિમી મોરચે સેનાની મુખ્ય સ્ટ્રાઈક કોર ‘II કોર’ ના પણ તેઓ વડા રહી ચૂક્યા છે.

મહત્વના હોદ્દાઓ અને શૈક્ષણિક લાયકાત

જનરલ એન.એસ. રાજા સુબ્રમણિ સેનાના અત્યંત તેજસ્વી અધિકારીઓમાં ગણાય છે. દેશ અને વિદેશમાં તેઓ સિંહફાળો આપી ચૂક્યા છે.

પ્રતિષ્ઠિત સૈન્ય સન્માન

જનરલ સુબ્રમણિ ને પશ્ચિમી અને ઉત્તરીય બંને સરહદોની ઓપરેશનલ સ્થિતિની ઊંડી સમજ છે. તેમની આ ઉત્કૃષ્ટ સેવાઓ બદલ તેમને દેશના સર્વોચ્ચ સૈન્ય મેડલોથી નવાજવામાં આવ્યા છે:

• પરમ વિશિષ્ટ સેવા મેડલ (PVSM)

• અતિ વિશિષ્ટ સેવા મેડલ (AVSM)

• સેના મેડલ (SM)

• વિશિષ્ટ સેવા મેડલ (VSM)