આઈપીએલ 2026 માં ચેન્નાઈ સુપર કિંગ્સ (CSK) નું સફર સમાપ્ત થઈ ચૂક્યું છે. આ સીઝનમાં ટીમનું પ્રદર્શન ખૂબ જ નિરાશાજનક રહ્યું હતું. દર વખતની જેમ આ વર્ષે પણ ફેન્ચાઈઝીને કેટલાક સ્ટાર ખેલાડીઓ પાસેથી શાનદાર પ્રદર્શનની આશા હતી, પરંતુ તેઓ ખરા ઉતરી શક્યા નહીં. હવે અહેવાલો મળી રહ્યા છે કે આગામી સીઝન પહેલા ચેન્નાઈ સુપર કિંગ્સ પોતાના આ પાંચ ફ્લોપ ખેલાડીઓને ટીમમાંથી બહાર નો રસ્તો બતાવી શકે છે.
1. પ્રશાંત વીર (₹14.20 કરોડ)
ઉત્તર પ્રદેશના અમેઠીના યુવા ઓલરાઉન્ડર પ્રશાંત વીર પાસેથી સીએસકેને ઘણી આશાઓ હતી. આ વર્ષના ઓક્શનમાં ફ્રેન્ચાઈઝીએ ભારે કિંમત ચૂકવીને તેમને ₹14.20 કરોડમાં ખરીદ્યા હતા. પરંતુ મેદાન પર તેઓ પૂરી રીતે ફ્લોપ સાબિત થયા છે. પ્રશાંતે આ સીઝનમાં કુલ 6 મેચ રમી હતી, જેમાં 5 ઇનિંગ્સમાં તેઓ માત્ર 91 રન જ બનાવી શક્યા હતા. એટલું જ નહીં, બોલિંગમાં પણ તેમને એકપણ વિકેટ મળી નથી. આટલી મોટી રકમ ખર્ચ્યા બાદ પણ આવું પ્રદર્શન હોવાથી આગામી સીઝનમાં તેમનું પત્તું કપાઈ શકે છે.
2. ખલીલ અહમદ (₹4.8 કરોડ)
ડાબોડી ઝડપી બોલર ખલીલ અહમદ પણ આ સીઝનમાં સીએસકેની આશાઓ પર પાણી ફેરવતા નજરે પડ્યા છે. ટીમે તેમના પર ₹4.8 કરોડનો દાવ લગાવ્યો હતો. ખલીલે આ વર્ષે ચેન્નાઈ માટે કુલ 5 મેચ રમી હતી. આ દરમિયાન 5 ઇનિંગ્સમાં તેઓ માત્ર 2 વિકેટ જ ઝડપી શક્યા હતા, જે સીએસકે જેવી ચેમ્પિયન ટીમ માટે ચિંતાનો વિષય છે.
3. મુકેશ ચૌધરી (₹30 લાખ)
પોતાની પ્રથમ આઈપીએલ સીઝનમાં શાનદાર બોલિંગથી દરેકના દિલ જીતનાર મુકેશ ચૌધરી પણ આ વર્ષે લય ગુમાવતા જોવા મળ્યા હતા. મુકેશે આ સીઝનમાં કુલ 8 મેચ રમી હતી અને 8 ઇનિંગ્સમાં તેઓ માત્ર 8 વિકેટ જ લઈ શક્યા હતા. આ આખી સીઝનમાં બેટ્સમેનોએ તેમની ઓવરોમાં ખૂબ રન લૂંટ્યા હતા, જેના કારણે આગામી સીઝન પહેલા ટીમ તેમનાથી અંતર બનાવી શકે છે.
4. ડેવાલ્ડ બ્રેવિસ (₹2.2 કરોડ)
‘બેબી એબી’ તરીકે ઓળખાતા ડેવાલ્ડ બ્રેવિસનું બેટ પણ આ વર્ષે સંપૂર્ણપણે શાંત રહ્યું હતું. સીએસકે તરફથી રમતા બ્રેવિસે 11 મેચોમાં ભાગ લીધો હતો. પરંતુ 8 ઇનિંગ્સમાં તેઓ માત્ર 151 રન જ બનાવી શક્યા હતા. આખી સીઝનમાં તેમના બેટથી એક પણ અર્ધશતક જોવા મળ્યું નથી, જેના કારણે હવે તેમના પ્રદર્શન પર સવાલો ઉઠી રહ્યા છે.
5. શિવમ દુબે (₹12 કરોડ)
ચેન્નાઈ સુપર કિંગ્સના સ્ટાર ઓલરાઉન્ડર શિવમ દુબે પણ આ વર્ષે ફ્લોપ સાબિત થયા છે. આ સીઝનમાં તેમના સ્ટ્રાઈક રેટ અને મેચ ફિનિશ કરવાની ક્ષમતામાં મોટો ઘટાડો જોવા મળ્યો હતો. દુબેએ આ વર્ષે સીએસકે માટે કુલ 13 મેચ રમી હતી, જેમાં 12 ઇનિંગ્સમાં તેઓ માત્ર 270 રન જ બનાવી શક્યા હતા. તેમના કદ અને ક્ષમતા પ્રમાણે આ પ્રદર્શન ખૂબ જ નબળું કહી શકાય.
