શાળામાં ઘૂસીને યુવકે મહિલા શિક્ષિકાને ગોળી મારી, પછી પોતે પણ આત્મહત્યા કરી; બંનેના મોત

ઉત્તર પ્રદેશના લખીમપુર ખેરી જિલ્લામાંથી એક હૃદયદ્રાવક અને કાળજું કંપાવી દેતી ઘટના સામે આવી છે. સોમવારે અહીંની એક ખાનગી શાળામાં ઘૂસીને એક યુવકે મહિલા શિક્ષિકા પર ગોળીબાર કર્યો હતો અને ત્યારબાદ તે જ હથિયારથી પોતે પણ આત્મહત્યા કરી લીધી હતી.

આ સરેઆમ ગોળીબારની ઘટનાથી શાળા પરિસરમાં ભારે અફરાતફરી અને ભયનો માહોલ સર્જાયો હતો. ઘટનાની જાણ થતાં જ જિલ્લા મેજિસ્ટ્રેટ (DM) અને એસએસપી (SSP) સહિતના ઉચ્ચ પોલીસ અધિકારીઓ કાફલા સાથે ઘટનાસ્થળે દોડી આવ્યા હતા. પોલીસે બંને મૃતદેહોને કબજે કરી પોસ્ટમોર્ટમ માટે મોકલી આપ્યા છે અને આગળની કાનૂની કાર્યવાહી હાથ ધરી છે.

શાળાના બીજા માળે બોલાચાલી બાદ ફાયરિંગ

આ સમગ્ર ઘટના લખીમપુર ખેરીના સદર કોટવાલી વિસ્તાર હેઠળના શાહપુરા કોઠી સ્થિત ચિલ્ડ્રન્સ એકેડમી સ્કૂલ (Children’s Academy School) માં બની હતી. મળતી વિગતો અનુસાર:

• હત્યારો યુવક: સોમવારે બપોરે શાળા છૂટવાના સમય પહેલાં, 30 વર્ષીય સઉદ નામનો યુવક ગેરકાયદેસર હથિયાર સાથે શાળામાં પ્રવેશ્યો હતો.

• મહિલા શિક્ષિકા: તે શાળામાં ફરજ બજાવતી 28 વર્ષીય મહિલા શિક્ષિકા નિશાત ફાતિમાને મળ્યો હતો.

• ઘટનાક્રમ: યુવક શિક્ષિકાને વાતોમાં ભળાવીને શાળાના બીજા માળે લઈ ગયો હતો. ત્યાં બંને વચ્ચે કોઈ બાબતે જોરદાર બોલાચાલી થઈ હતી. ઉશ્કેરાયેલા સઉદે નિશાત ફાતિમા પર એકપછી એક બે ગોળીઓ ચલાવી દીધી હતી.

• આત્મહત્યા: શિક્ષિકા લોહીલુહાણ હાલતમાં જમીન પર ઢળી પડી કે તરત જ આરોપી સઉદે તે જ હથિયારથી પોતાની કનપટી પર ગોળી મારીને જીવન ટૂંકાવી લીધું હતું.

બાળકો અને સ્ટાફમાં ભયનો માહોલ

ગોળીબારના અવાજથી આખી શાળા ધ્રુજી ઉઠી હતી અને કોલાહલ મચી ગયો હતો. ગોળીબારનો અવાજ સાંભળીને અન્ય શિક્ષકો અને બાળકો વર્ગખંડમાંથી બહાર દોડી આવ્યા હતા. શાળાના કોરિડોરમાં બંનેના લોહીલુહાણ મૃતદેહો પડેલા જોઈને નાનાં બાળકો ડરના માર્યા ફફડી ઉઠ્યાં હતાં.

ઘટનાની તીવ્રતા જોઈને ઉચ્ચ પોલીસ અધિકારીઓ પણ સ્તબ્ધ થઈ ગયા હતા. ડીએમ અંજની કુમાર સિંઘ અને કોટવાલી પ્રભારી રાજેશ સિંઘ સહિતના અધિકારીઓએ ઘટનાસ્થળની મુલાકાત લીધી હતી. ફોરેન્સિક ટીમે પણ સ્થળ પરથી જરૂરી નમૂના અને પુરાવા એકત્ર કર્યા છે.

એક વર્ષથી શિક્ષિકા તરીકે ફરજ બજાવતા હતા નિશાત: એસપી

આ મામલે એસપી ડૉ. ખ્યાતિ ગર્ગે મીડિયાને જણાવ્યું કે, આ ઘટના સોમવારે સવારે સાડા અગિયાર વાગ્યાની આસપાસ બની હતી. નિશાત ફાતિમા ચિલ્ડ્રન્સ એકેડમી સ્કૂલમાં છેલ્લા આશરે એક વર્ષથી શિક્ષિકા તરીકે ભણાવતા હતા. મોહમ્મદ સઉદ નામનો યુવક તેમને મળવા શાળાએ પહોંચ્યો હતો. બંને સીડીઓ વાટે ઉપર કોરિડોરમાં ગયા અને ત્યાં વાતચીત કરી રહ્યા હતા. આ દરમિયાન યુવકે અચાનક પોતાના બેગમાંથી તમંચો કાઢી નિશાત ફાતિમા પર ગોળી ચલાવી દીધી હતી અને ત્યારબાદ પોતે પણ ગોળી મારી આત્મહત્યા કરી લીધી હતી.

એસપીએ વધુમાં જણાવ્યું કે પોલીસ આ હત્યા-આત્મહત્યા પાછળના ચોક્કસ કારણની તપાસ કરી રહી છે. બંને મૃતકોના પરિવારજનોનો સંપર્ક કરીને પૂછપરછ કરવામાં આવી રહી છે. આ ઉપરાંત, શાળા પરિસરમાં કઈ કઈ જગ્યાએ સીસીટીવી કેમેરા લાગેલા છે તેની પણ ચકાસણી કરવામાં આવી રહી છે, જેથી ઘટનાના ચોક્કસ ફૂટેજ મળી શકે અને સત્ય સામે આવી શકે.