‘રામાયણ’ના સીન લીક કરવા પડશે ભારે: મેકર્સે જારી કરી કડક લીગલ નોટિસ, સોશિયલ મીડિયા પર ક્લિપ્સ શેર કરનારા સામે જેલ અને દંડની ચેતવણી

Ramayana : રણબીર કપૂર, યશ અને સાઈ પલ્લવી અભિનીત મેગા બજેટ પૌરાણિક ફિલ્મ ‘રામાયણ: પાર્ટ ૧’ સિનેમાઘરોમાં રિલીઝ થતાંની સાથે જ બોક્સ ઓફિસ પર રેકોર્ડ્સનો ઢગલો કરી રહી છે. માત્ર ત્રણ જ દિવસમાં આ ફિલ્મે વૈશ્વિક સ્તરે ₹૩૭૫ કરોડથી વધુનું ગ્રોસ કલેક્શન નોંધાવીને ભારતીય સિનેમામાં નવો ઈતિહાસ રચ્યો છે.

જોકે, ફિલ્મ રિલીઝ થતાંની સાથે જ તે પાઇરેસી અને અનધિકૃત લીકનો ભોગ બની છે. સિનેમા હોલમાંથી ફિલ્મના મહત્વના દ્રશ્યો મોબાઈલ વડે રેકોર્ડ કરી સોશિયલ મીડિયા તેમજ મેસેજિંગ એપ્સ પર વાયરલ કરવામાં આવી રહ્યા છે. આ ગંભીર બાબતને ધ્યાને લઈ બોમ્બે હાઈકોર્ટના સ્પષ્ટ આદેશ બાદ નિર્માતાઓએ સત્તાવાર સોશિયલ મીડિયા હેન્ડલ્સ પર કડક લીગલ નોટિસ જારી કરી કાનૂની કાર્યવાહીની સ્પષ્ટ ચેતવણી આપી છે.

પાઇરેસી સામે મેકર્સની લીગલ નોટિસ અને કાર્યવાહી એક નજરે

લીગલ નોટિસમાં મેકર્સે શું ચેતવણી આપી?

નિર્માતા નમિત મલ્હોત્રા અને પ્રોડક્શન ટીમે જારી કરેલી કાનૂની નોટિસમાં સ્પષ્ટ શબ્દોમાં જણાવવામાં આવ્યું છે:

• અમારા ધ્યાને આવ્યું છે કે થિયેટરોની અંદરથી ‘નમિત મલ્હોત્રાની રામાયણ’નું અનધિકૃત ફૂટેજ રેકોર્ડ કરીને સોશિયલ મીડિયા પ્લેટફોર્મ્સ અને મેસેજિંગ એપ્સ પર ગેરકાયદેસર રીતે વહેતું કરવામાં આવી રહ્યું છે.

• બોમ્બે હાઈકોર્ટે પોતાના આદેશમાં તમામ જાણીતા અને અજાણ્યા ઈસમોને ફિલ્મના કોઈપણ ભાગને પરવાનગી વિના રેકોર્ડ કરવા, શેર કરવા કે બ્રોડકાસ્ટ કરવા પર સંપૂર્ણ મનાઈહુકમ ફરમાવ્યો છે.

• જો કોઈ વ્યક્તિ આ આદેશનો અનાદર કરશે તો તે માત્ર કોપીરાઈટનું ઉલ્લંઘન જ નહીં ગણાય, પરંતુ ભારતીય કાયદાઓ હેઠળ ગંભીર ફોજદારી ગુનો અને હાઈકોર્ટની સીધી અવમાનના ગણાશે.

• તમામ યુઝર્સને તાકીદ કરવામાં આવે છે કે તેઓ આવી ક્લિપ્સ તાત્કાલિક હટાવી લે. અન્યથા કોઈપણ પૂર્વ સૂચના વિના સંબધિત પ્લેટફોર્મ્સ તેમજ પોલીસ સત્તાવાળાઓ મારફતે ફોજદારી (ક્રિમિનલ) અને દીવાની (સિવિલ) કેસ દાખલ કરવામાં આવશે.

પ્રથમ ૩ દિવસનું તોફાની બોક્સ ઓફિસ કલેક્શન (Sacnilk રિપોર્ટ)

પાઇરેસીના પ્રયાસો છતાં ફિલ્મ થિયેટરોમાં પ્રચંડ કમાણી કરી રહી છે:

• પ્રથમ દિવસ (ગુરુવાર): ભારતમાં ₹૬૪.૮૫ કરોડ નેટ સાથે ભવ્ય ઓપનિંગ

• બીજો દિવસ (શુક્રવાર): ₹૪૮.૦૫ કરોડ નેટ

• ત્રીજો દિવસ (શનિવાર): શનિવારે ભારે ઉછાળા સાથે ₹૬૯.૮૦ કરોડ નેટ

• ભારતમાં કુલ નેટ કલેક્શન: ₹૧૮૨.૭૦ કરોડ (કુલ ગ્રોસ ₹૨૧૮.૨૫ કરોડ)

• ઓવરસીઝ (વિદેશમાં કમાણી): આશરે ₹૧૫૭.૨૫ કરોડ ગ્રોસ

• વર્લ્ડવાઇડ ટોટલ કલેક્શન: માત્ર ૭૨ કલાકમાં વૈશ્વિક સ્તરે ₹૩૭૫ કરોડથી વધુ

નિતેશ તિવારી દિગ્દર્શિત આ મહાકથામાં રણબીર કપૂર (ભગવાન રામ), સાઈ પલ્લવી (માતા સીતા), યશ (રાવણ) અને રવિ દુબે (લક્ષ્મણ) ની મુખ્ય ભૂમિકાઓને દેશ-વિદેશના દર્શકો તરફથી અભૂતપૂર્વ આવકાર મળી રહ્યો છે.