ઇન્ડિયન નેવી રેસ્ક્યુ ઓપરેશન 2026: ઓમાન નજીક અરબી સમુદ્રમાંથી એક ચિંતાજનક સમાચાર સામે આવ્યા છે. અહીં 14 ભારતીય ક્રૂ મેમ્બર્સ સાથેનું એક ભારતીય વહાણ ‘MSV વિરાટ 1’ (MSV Virat 1) સમુદ્રમાં ડૂબી ગયું છે. આ ઘટના બાદ આંતરરાષ્ટ્રીય સ્તરે એક મોટું સર્ચ અને રેસ્ક્યુ ઓપરેશન શરૂ કરવામાં આવ્યું છે.
ઓમાનના તટથી 148 કિમી દૂર સર્જાઈ દુર્ઘટના
આ ઘટના ઓમાનના રાસ અલ હદ (Ras Al Hadd) થી આશરે 80 નોટિકલ માઈલ એટલે કે 148 કિલોમીટર દૂર અરબી સમુદ્રમાં બની છે. ભારતીય નાગરિકો સવાર હતા તે વહાણ અચાનક મુશ્કેલીમાં મુકાઈ ગયું હતું અને તે ડૂબવા લાગ્યું હતું.
ઘટનાની જાણ થતાં જ ભારતીય સત્તાધીશો એક્શનમાં આવ્યા હતા. તે વિસ્તારમાં હાજર ભારતીય નૌસેનાના (Indian Navy) યુદ્ધજહાજોને તાત્કાલિક ઘટનાસ્થળ તરફ રવાના કરવામાં આવ્યા હતા.
અમેરિકન નેવીએ (US Navy) કરી મોટી મદદ
આ મુશ્કેલ સમયમાં અમેરિકન નેવીના P-8 દરિયાઈ પેટ્રોલિંગ વિમાને મહત્વની ભૂમિકા ભજવી છે. વિમાને ઘટનાસ્થળે પહોંચીને સમુદ્રમાં ફસાયેલા 14 ભારતીય ક્રૂ મેમ્બર્સ માટે એક ‘લાઈફ રાફ્ટ’ (બચાવ હોડી) નીચે પાડી હતી.
વહાણ ડૂબતાં જ તમામ 14 ભારતીય ક્રૂ મેમ્બર્સ સફળતાપૂર્વક વહાણ છોડીને આ લાઈફ રાફ્ટ પર સવાર થઈ ગયા છે. અમેરિકન વિમાન સતત તેમની સ્થિતિ પર નજર રાખી રહ્યું છે.
કમર્શિયલ જહાજે પણ બદલ્યો પોતાનો રૂટ
આ બચાવ કામગીરીમાં ‘MV જબલપુર અલી 9’ નામના એક કોમર્શિયલ જહાજે પણ મોટી મદદ કરી છે. સેન્ટ કિટ્સ અને નેવિસનો ધ્વજ ધરાવતા આ જહાજે સિગ્નલ મળતા જ પોતાનો રસ્તો બદલી નાખ્યો હતો અને તે ફસાયેલા ભારતીયો તરફ આગળ વધ્યું હતું.
મળતી માહિતી મુજબ, ભારતીય ક્રૂ મેમ્બર્સનું આ વહાણ ઓમાનના સોહરથી મુંબઈ તરફ આવી રહ્યું હતું.
તમામ ભારતીય ક્રૂ મેમ્બર્સ સુરક્ષિત
હાલ રાહતના સમાચાર એ છે કે લાઈફ રાફ્ટ પર સવાર તમામ 14 ભારતીય ક્રૂ મેમ્બર્સ સુરક્ષિત છે. તેમની તબિયત ગંભીર નથી. ભારતીય નૌસેનાના જહાજો અને આંતરરાષ્ટ્રીય દરિયાઈ એજન્સીઓ પરસ્પર તાલમેલ સાથે કામ કરી રહી છે. અધિકારીઓ આ સમગ્ર સ્થિતિ પર બારીકાઈથી નજર રાખી રહ્યા છે જેથી તમામ યુવાનોને વહેલી તકે સલામત સ્થળે લાવી શકાય.
