બનાસકાંઠાના ચર્ચિત અજમલ ચૌધરી લાફાકાંડ મામલે ચૌધરી સમાજના સતત વિરોધ અને આક્રોશ બાદ ડીસા રૂરલ પોલીસે મહંત બળદેવગિરીની અટકાયત કરી છે. દેવદરબાર જાગીરમઠ ખાતે ચૌધરી સમાજના આગેવાન અજમલ ચૌધરીને માર મારવાના બનાવના ૨૦ દિવસ બાદ પણ ન્યાય મેળવવા માટે સમાજ અડગ રહ્યો છે. એફ.આઈ.આર. (FIR) માં સીધું નામ ન હોવા છતાં, પોલીસે મહંત બળદેવગિરીની અટકાયત કરીને આ કેસ સંબંધિત સઘન પૂછપરછ હાથ ધરી છે.
ધાનેરામાં ‘ચિંતન બેઠક’ અને આગામી આંદોલનની રણનીતિ
ગત ૬ ઓગસ્ટે ધાનેરાની આંજણા કોલેજ ખાતે ચૌધરી સમાજ અને અર્બુદા સેનાના હોદ્દેદારો તેમજ આગેવાનોની એક મહત્વપૂર્ણ ‘ચિંતન બેઠક’ યોજાઈ હતી. આ બેઠકમાં પીડિતને ન્યાય અપાવવા અને આગામી દિવસોમાં ગાંધીનગર ખાતે યોજનારી મહા ‘ન્યાય રેલી’માં મોટી સંખ્યામાં જોડાવા માટે આહ્વાન કરવામાં આવ્યું હતું. બનાવને ૨૦ દિવસ વિત્યા બાદ પણ મુખ્ય સૂત્રધારો સામે યોગ્ય કાર્યવાહી ના થતાં સમગ્ર ઉત્તર ગુજરાતના ચૌધરી સમાજમાં ભારે રોષ જોવા મળી રહ્યો છે.
ન્યાય માટે સમાજની ૧૦ આગેવાનોની વિશેષ કમિટી
રાધનપુર ખાતે યોજાયેલી સભા બાદ વિધાનસભા અધ્યક્ષ શંકર ચૌધરીએ પણ સરકાર દ્વારા કરાયેલી કાયદાકીય કાર્યવાહી, પાસા અને ધરપકડ અંગે સમાજને માહિતગાર કર્યા હતા. પીડિત પરિવારને ઝડપી ન્યાય અપાવવા માટે સમાજના ૧૦ પ્રમુખ આગેવાનોની એક વિશેષ કમિટી બનાવવામાં આવી છે. આ કમિટી સમગ્ર કેસની કાયદાકીય પ્રક્રિયા પર નજર રાખશે અને સરકાર તથા વહીવટી તંત્ર સાથે સંકલન સાધશે.
શું હતો સમગ્ર બનાવ?
બનાસકાંઠાના દેવદરબાર જાગીરમઠ ખાતે અજમલ ચૌધરીને ઢોર માર મારવાનો વીડિયો સોશિયલ મીડિયા પર વાયરલ થયો હતો. આ ઘટના બાદ પોલીસે તાત્કાલિક ૪ આરોપીઓની ધરપકડ કરી જેલહવાલે કર્યા હતા. પરંતુ, ફરિયાદમાં મહંત બળદેવગિરીનું નામ ઉમેરવાની માંગ સાથે પાલનપુર, રાધનપુર અને ધાનેરા સહિતના વિસ્તારોમાં ચૌધરી સમાજે ઉગ્ર વિરોધ પ્રદર્શનો કર્યા હતા, જેના પરિણામે આખરે પોલીસે મહંતની અટકાયત કરવી પડી છે.
