ના એડ્રેસ પ્રૂફ, ના બુકિંગની માથાકૂટ: LPG સિલિન્ડર પર ગ્રાહકો માટે ‘મુન્ના’ અને ‘છોટુ’ ના બે શ્રેષ્ઠ વિકલ્પો

દેશભરમાં એલપીજી (LPG) રાંધણગેસ પર નિર્ભરતા ઘટાડવા અને ગ્રાહકોને અગવડ વિના ગેસ ઉપલબ્ધ કરાવવા માટે ઈન્ડિયન ઓઈલ કોર્પોરેશન લિમિટેડ (IOCL) દ્વારા વિશેષ વિકલ્પો પૂરા પાડવામાં આવી રહ્યા છે. ખાસ કરીને વિદ્યાર્થીઓ, સ્થળાંતરિત મજૂરો (માઇગ્રન્ટ્સ) અને નાનો વ્યવસાય કરતા લોકો માટે ઇન્ડિયન ઓઇલે ‘મુન્ના’ (૨ કિલોગ્રામ) અને ‘છોટુ’ (૫ કિલોગ્રામ) નામથી બે નાના અને પોર્ટેબલ સિલિન્ડર ઉપલબ્ધ કરાવ્યા છે.

આ બંને સિલિન્ડરો મેળવવા માટે કોઈ સ્થાનિક સરનામાના પુરાવા (Address Proof) ની જરૂર નથી અને ન તો અગાઉથી ગેસ બુકિંગ કરાવવાની કોઈ ઝંઝટ રહે છે. ગ્રાહક માત્ર માન્ય ઓળખપત્ર (ID Proof) દર્શાવીને તાત્કાલિક આ સિલિન્ડર મેળવી શકે છે.

‘મુન્ના’ અને ‘છોટુ’ સિલિન્ડરની સરખામણી એક નજરે

૨ કિલોગ્રામનો ‘મુન્ના’ સિલિન્ડર: કોના માટે ઉત્તમ?

ઇન્ડિયન ઓઇલનો ૨ કિલોગ્રામનો આ સિલિન્ડર ખાસ કરીને એવા ગ્રાહકોને ધ્યાનમાં રાખીને ડિઝાઇન કરવામાં આવ્યો છે જેમના વપરાશ મર્યાદિત છે:

• લક્ષિત ગ્રાહકો: શહેરી અને અર્ધ-શહેરી વિસ્તારોમાં રહેતા બહારના વિદ્યાર્થીઓ, નોકરી કરતી એકલી મહિલાઓ, ફૂટપાથ કે લારી-ગલ્લાના નાના વેપારીઓ અને ઓછી ગેસ ખપત ધરાવતા લોકો માટે આ ઉત્તમ વિકલ્પ છે.

• ક્યાંથી મળશે: ગ્રાહકો ઇન્ડેન ગેસ વિતરકો ઉપરાંત ઇન્ડિયન ઓઇલના પેટ્રોલ પંપ (રીટેલ આઉટલેટ્સ), નિયુક્ત સ્થાનિક કરિયાણા સ્ટોર અને સુપરમાર્કેટ જેવા વેચાણ કેન્દ્રો પરથી સીધો આ સિલિન્ડર ખરીદી શકે છે.

• રિફિલિંગની સરળતા: સિલિન્ડર ખાલી થતાં દેશભરમાં કોઈપણ માન્ય સેલ્સ પોઈન્ટ કે ડિસ્ટ્રિબ્યુટર પાસે જઈને તેને તાત્કાલિક બદલી (રિફિલ કરાવી) શકાય છે.

૫ કિલોગ્રામનો ‘છોટુ’ સિલિન્ડર: વધુ ક્ષમતા અને ઘરબેઠા ડિલિવરી

૫ કિલોગ્રામ વજન ધરાવતો ‘છોટુ’ સિલિન્ડર સમગ્ર દેશના લગભગ દરેક જિલ્લામાં સરળતાથી ઉપલબ્ધ છે:

• કોઈ એડ્રેસ પ્રૂફ નહીં: સરનામાના પુરાવા (Proof of Address) વગર કોઈપણ વ્યક્તિ માત્ર સરકાર માન્ય ઓળખપત્ર આપીને આ કનેક્શન મેળવી શકે છે.

• હોમ ડિલિવરી: ગ્રાહકો પોતાના નજીકના વેચાણ કેન્દ્ર મારફતે ‘છોટુ’ સિલિન્ડર રિફિલની હોમ ડિલિવરી પણ કરાવી શકે છે, જેના માટે પ્રતિ રિફિલ માત્ર ₹૨૫ વધારાનો ડિલિવરી ચાર્જ ચૂકવવાનો રહે છે.

• ₹૫૦૦ બાયબેક ગેરંટી: આ સિલિન્ડરની સૌથી મોટી વિશેષતા એ છે કે જો ગ્રાહકે સેલ્સ સેન્ટર પરથી સિલિન્ડર લીધો હોય અને ભવિષ્યમાં શહેર છોડતી વખતે કે જરૂર ન હોવા પર તેને પરત કરવો હોય, તો સિલિન્ડર પરત આપતાં ₹૫૦૦ ની નિશ્ચિત રકમ પાછી મળી જાય છે, ભલે સિલિન્ડર ગમે તેટલા સમય માટે વાપર્યો હોય.