પાકિસ્તાન ના અશાંત સરહદી પ્રાંત ખૈબર પખ્તૂનખ્વાના કોહાટ (Kohat) જિલ્લામાં તાજેતરમાં થયેલા ભીષણ આત્મઘાતી હુમલાને લઈને તપાસ એજન્સીઓના રિપોર્ટમાં હચમચાવી દેનારા તથ્યો સામે આવ્યા છે. બોમ્બ ડિસ્પોઝલ સ્ક્વોડ (BDS) ના સત્તાવાર તપાસ અહેવાલ મુજબ, આતંકવાદીઓ સામાન્ય હુમલો કરવા નહીં પરંતુ જાણે કોઈ મોટું યુદ્ધ લડવા આવ્યા હોય તેવી ઘાતક સામગ્રી સાથે ઘૂસ્યા હતા.
આ ભયાનક બ્લાસ્ટમાં 869 કિલોગ્રામ (આશરે 870 KG) અત્યંત શક્તિશાળી વિસ્ફોટક સામગ્રી નો ઉપયોગ કરવામાં આવ્યો હતો. આ હુમલામાં 16 પોલીસકર્મીઓ સહિત કુલ 21 લોકોના મોત થયા હતા, જ્યારે સુરક્ષા દળોના જવાબી ઓપરેશનમાં 8 આતંકવાદીઓ પણ ઠાર મરાયા હતા.
મસ્જિદ પાસે કાર બ્લાસ્ટ અને પોલીસ લાઈન્સમાં ઘૂસણખોરી
18 સપ્ટેમ્બરના રોજ શુક્રવારની જુમ્મા નમાઝ દરમિયાન આ કાળમુખો હુમલો અંજામ આપવામાં આવ્યો હતો:
-
વિશાળ ખાડો પડ્યો: વિસ્ફોટકોથી ભરેલી કાર દ્વારા મસ્જિદ નજીક એટલો પ્રચંડ ધડાકો કરવામાં આવ્યો હતો કે જમીનમાં આશરે 11 ફૂટ લાંબો, 6.6 ફૂટ પહોળો અને 4.6 ફૂટ ઊંડો મોટો ખાડો પડી ગયો હતો.
-
સ્પેશિયલ બ્રાન્ચ બ્લોક પર કબજો: ધડાકા બાદ ભારે હથિયારોથી સજ્જ આતંકવાદીઓ જૂની પોલીસ લાઈન્સ પરિસરમાં ઘૂસી ગયા હતા અને સ્પેશિયલ બ્રાન્ચની ઇમારતમાં મોરચો સંભાળી લીધો હતો.
ક્લિયરન્સ ઓપરેશનમાં સુસાઇડ જેકેટ અને 4 IED મળ્યા
હુમલા બાદ પાકિસ્તાની સુરક્ષા દળોએ ચલાવેલા સંયુક્ત ક્લિયરન્સ ઓપરેશનમાં તમામ 8 આતંકીઓને ઠાર કરવામાં આવ્યા હતા. ત્યારબાદ જ્યારે બિલ્ડિંગની તલાશી લેવાઈ ત્યારે સુરક્ષાકર્મીઓ પણ સ્તબ્ધ થઈ ગયા હતા:
-
ગ્રાઉન્ડ ફ્લોર: બિલ્ડિંગના નીચેના માળેથી બે જીવતા ઇમ્પ્રુવાઇઝ્ડ એક્સપ્લોઝિવ ડિવાઇસ (IED) અને ન ફૂટેલો વિસ્ફોટક જથ્થો મળી આવ્યો હતો.
-
પ્રથમ માળ: ઉપરના માળેથી આતંકવાદીઓનું એક સુસાઇડ વેસ્ટ (આત્મઘાતી જેકેટ) જપ્ત કરવામાં આવ્યું હતું, જેની અંદર 4 શક્તિશાળી IED બોમ્બ ફીટ કરેલા હતા. બોમ્બ સ્ક્વોડે સમયસૂચકતા વાપરીને તેને સફળતાપૂર્વક ડિફ્યુઝ કર્યા હતા.
કોણે લીધી હુમલાની જવાબદારી?
આ લોહિયાળ હુમલાની જવાબદારી ‘ઇત્તેહાદ-ઉલ-મુજાહિદ્દીન પાકિસ્તાન’ નામના આતંકી સંગઠને સ્વીકારી છે:
-
આ સંગઠન હાફિઝ ગુલ બહાદુર ગ્રુપ, હરકત ઇન્કલાબ-એ-ઇસ્લામી પાકિસ્તાન અને લશ્કર-એ-ઇસ્લામ નામના ત્રણ કુખ્યાત આતંકી જૂથોનું સંયુક્ત ગઠબંધન છે, જેની રચના એપ્રિલ 2025માં કરવામાં આવી હતી.
-
સ્થાનિક પોલીસ અને ગુપ્તચર એજન્સીઓ હાલ હુમલામાં વપરાયેલી કારના માલિક અને આતંકીઓને સ્થાનિક સ્તરે લોજિસ્ટિક ટેકો પૂરો પાડનારા નેટવર્કની ઊંડાણપૂર્વક તપાસ કરી રહી છે.
