The Broomway: જ્યાં માટી પકડી લે છે પગ અને લાશ પણ મળતી નથી! જાણો પૃથ્વી પરના સૌથી ઘાતક દરિયાઈ રસ્તાઓનું રહસ્ય

The Broomway : કલ્પના કરો કે તમે સમુદ્ર કિનારે શાંત અને સુંદર રેતી પર લટાર મારી રહ્યા છો. ચારે તરફ દૂર-દૂર સુધી ફેલાયેલી કુદરતી સુંદરતા મનને મોહી લે તેવી છે. પરંતુ અચાનક તમારા પગ એવી કાદવવાળી રેતીમાં ખૂંપવા લાગે જ્યાંથી બહાર નીકળવું અસંભવ બની જાય, અને એ જ ક્ષણે સમુદ્રનું તોફાની પાણી માણસની દોડવાની ઝડપ કરતાં પણ વધુ વેગે તમારી તરફ ધસી આવે તો?

યુકે (બ્રિટન) માં આવેલા બે એવા કુદરતી સ્થળો છે જ્યાં થોડીક સેકન્ડોની બેદરકારી સીધી મોતને આમંત્રણ આપે છે. આ જીવલેણ સ્થળોમાં ‘ધ બ્રૂમવે’ (The Broomway) અને ‘મોરેકેમ્બે બે’ (Morecambe Bay) નો સમાવેશ થાય છે, જે પોતાના અણધાર્યા હાઈ ટાઈડ (ભરતી) અને ક્વિકસેન્ડ (ચોર રેતી) માટે વિશ્વભરમાં કુખ્યાત છે.

1. ‘ધ બ્રૂમવે’: 100 થી વધુ લોકોનો ભોગ લેનારો ‘ડૂમવે’

બ્રિટનના એસેક્સ દરિયાકાંઠે રિવર ક્રાઉચ અને રિવર થેમ્સ વચ્ચે આવેલો આ માર્ગ પ્રથમ નજરે કોઈ સામાન્ય પગપાળા રસ્તો લાગતો જ નથી:

• દરિયાની વચ્ચેથી નીકળતો રસ્તો: આ માર્ગ વેકેરિંગ સ્ટેયર્સથી શરૂ થઈ સીધો સમુદ્રમાં જાય છે. ભરતી ઓસરે ત્યારે આશરે 3 માઇલ સુધી દરિયાની વચ્ચે ખુલ્લી થયેલી રેતી પર ચાલીને ફાઉલનેસ (Foulness) નામના કળણવાળા ટાપુ સુધી પહોંચાય છે.

• 100 થી વધુ લોકોનાં મોત: ઈતિહાસ ગવાહ છે કે આ માર્ગે સદીઓ દરમિયાન 100 થી વધુ લોકોનો જીવ લીધો છે. તેમાંથી 66 મૃતકોને ફાઉલનેસ ચર્ચયાર્ડમાં દફનાવાયા હતા, જ્યારે અનેક લોકોના મૃતદેહો તો ક્યારેય સમુદ્રમાંથી પાછા મળ્યા જ નહોતા. આ ભયાનક ઈતિહાસના કારણે અખબારો તેને ‘ડૂમવે’ (Doomway – મોતના માર્ગ) તરીકે પણ ઓળખે છે.

• દોડવાની ગતિ કરતાં વધુ ઝડપી ભરતી: ઓટ વખતે અહીંની રેતી સખત અને ચાલવા યોગ્ય લાગે છે, પરંતુ જેવી ભરતી શરૂ થાય કે સમુદ્રનું પાણી માણસના દોડવા કરતાં પણ વધુ ઝડપે ઘસી આવે છે. ધુમ્મસ કે વરસાદમાં દિશાભાન ભૂલી જવાય તો બચવું અશક્ય બને છે.

• 400 સાવરણીઓ પરથી નામ પડ્યું: પ્રાચીન સમયમાં મુસાફરોને સુરક્ષિત રસ્તો બતાવવા માટે દર 30 થી 60 ગજના અંતરે લાકડીઓ પર આશરે 400 સાવરણીઓ (Brooms) બાંધીને સીમાચિહ્ન બનાવાયા હતા, જેના પરથી તેનું નામ ‘ધ બ્રૂમવે’ પડ્યું.

2. મોરેકેમ્બે બે: 310 ચોરસ કિલોમીટરમાં ફેલાયેલી મોતની ખાડી

બ્રિટનની બીજી સૌથી મોટી ખાડી ‘મોરેકેમ્બે બે’ આશરે 310 ચોરસ કિલોમીટર વિસ્તારમાં ફેલાયેલી વિશાળ રેતાળ ખાડી છે:

• છેતરામણી સુંદરતા: અહીં દૂર-દૂર સુધી માત્ર ખુલ્લી રેતી અને કાદવ દેખાય છે, જ્યાં જમીન અને દરિયા વચ્ચેનો ભેદ પારખવો મુશ્કેલ બને છે.

• ક્વિકસેન્ડ (દલદલી રેતી) નો ખતરો: ઉપરથી જે જમીન સાવ કોરી અને સખત દેખાય છે, તેની નીચે પોચી રેતી અને કાદવ હોય છે. પગ મૂકતાં જ માણસ અંદર ફસાઈ જાય છે અને ગમે તેટલા હવાતિયાં મારે છતાં બહાર નીકળી શકતો નથી.

• 9 માઇલની અતિ જોખમી ક્રોસ-બે વૉક: અહીં આર્નસાઇડથી કેન્ટ્સ બેન્ક સુધીનો 9 માઇલનો વૉક રૂટ પ્રખ્યાત છે, જેને કાપતાં 3 કલાકથી વધુ સમય લાગે છે. અહીં સ્થાનિક જાણકાર ગાઈડ વિના પગ મૂકવો સીધો મોતના મુખમાં જવા સમાન છે, કારણ કે ટાઈમિંગમાં એક મિનિટની પણ ભૂલ થાય તો આખો રેતાળ પટ અચાનક ઊંડા દરિયામાં ફેરવાઈ જાય છે.

કુદરતનું એવું રહસ્ય જ્યાં ચેતવણી વિના કાળ ત્રાટકે છે

બ્રૂમવે હોય કે મોરેકેમ્બે બે—આ બંને સ્થળોની સમાનતા એ છે કે અહીં ખતરો ક્યારેય નરી આંખે અગાઉથી દેખાતો નથી. સખત લાગતી જમીન ક્યારે દલદલમાં ફેરવાઈ જાય અને શાંત લાગતો દરિયો ક્યારે રાક્ષસી મોજાંઓમાં ફેરવાઈ જાય તે કહેવું અશક્ય છે. આ જ કારણ છે કે સ્થાનિક તંત્ર આજે પણ અહીં યોગ્ય માર્ગદર્શક અને સુરક્ષા ઉપકરણો વિના મુસાફરી ન કરવાની કડક ચેતવણી આપે છે.