મશહૂર બોલિવૂડ સિંગર સોનુ નિગમે ફરી એકવાર સાબિત કરી દીધું છે કે સંગીત તેમના જીવનમાં કેટલું ઊંડે સુધી વણાયેલું છે. હાલમાં જ સોનુ નિગમનો એક વિડીયો સોશિયલ મીડિયા પર ખૂબ વાયરલ થઈ રહ્યો છે, જેમાં તેઓ સર્જરી દરમિયાન ઓપરેશન થિયેટરમાં ડૉક્ટરો અને મેડિકલ ટીમ માટે ગીત ગાતા જોવા મળી રહ્યા છે.
મુશ્કેલ પરિસ્થિતિ અને દર્દ હોવા છતાં સોનુ નિગમે હિંમત ન હારી અને આ અનુભવને ‘જોય ઓફ મ્યુઝિક’ (Joy of Music) ગણાવ્યો હતો.
ઓપરેશન થિયેટરમાં ગાયું ‘સુહાની રાત ઢલ ચૂકી’
સોનુ નિગમે સોશિયલ મીડિયા પર વિડીયો શેર કરીને જણાવ્યું કે તેમની સર્જરી દરમિયાન તેમણે ડૉ. નીલેશ સતભાઈ અને તેમની નિષ્ણાત ટીમ માટે ગીત ગાયું હતું.
વિડીયોમાં સોનુ નિગમ વર્ષ 1949ની પ્રખ્યાત ફિલ્મ ‘દુલારી’નું મોહમ્મદ રફી સાહેબનું સદાબહાર ગીત ‘સુહાની રાત ઢલ ચૂકી’ ગાતા સંભળાય છે. વિડીયો શેર કરતા તેમણે લખ્યું:
“મારી સર્જરી દરમિયાન પ્યારા ડૉ. નીલેશ સતભાઈ અને તેમની શ્રેષ્ઠ ટીમ માટે એક અચાનક કરેલું પરફોર્મન્સ. દર્દમાં પણ ગાવું… જોય ઓફ મ્યુઝિક!”
આ અનોખી ક્ષણ સોનુ નિગમના સંગીત પ્રત્યેના ઊંડા લાગણીશીલ જોડાણને દર્શાવે છે.
ચાહકોએ કરી વહેલી તકે સાજા થવાની પ્રાથના
સર્જરીના દર્દ વચ્ચે પણ સોનુ નિગમનો આ અંદાજ જોઈને ચાહકો અચરજમાં પડી ગયા છે. વિડીયો વાયરલ થતાં જ ફેન્સે કમેન્ટ સેક્શનમાં તેમના જલ્દી સાજા થવા (Get Well Soon) માટેની પ્રાર્થનાઓ અને શુભેચ્છાઓનો વરસાદ કરી દીધો છે.
ઘણા ફેન્સે તેમની તબિયતને લઈને ચિંતા પણ વ્યક્ત કરી હતી. જોકે, સોનુ નિગમે પોતાની સર્જરી કે કઈ બીમારી માટે આ પ્રોસીજર થઈ છે તે અંગે વધુ માહિતી આપી નથી, પરંતુ તેઓ શ્રેષ્ઠ ડૉક્ટરોની દેખરેખ હેઠળ છે.
સોનુ નિગમની શાનદાર મ્યુઝિકલ કરિયર
છેલ્લા કેટલાક દાયકાઓથી હિન્દી મ્યુઝિક ઈન્ડસ્ટ્રી પર રાજ કરનાર સોનુ નિગમ ભારતના સૌથી વર્સટાઈલ પ્લેબેક સિંગર્સમાંના એક છે. તેમના લોકપ્રિય ગીતોમાં ‘અભી મુજ મેં કહાઁ’, ‘કલ હો ના હો’, ‘સૂરજ હુઆ મદ્ધમ’, ‘મૈં અગર કહૂઁ’ અને ‘સાથિયા’ જેવા ક્યારેય ના ભુલાય તેવા હિટ નગ્માઓ શામેલ છે.
