ગ્લોબલ સ્ટાર પ્રિયંકા ચોપરા ભલે વર્ષોથી અમેરિકામાં સ્થાયી થઈ ગઈ હોય, પરંતુ તે આજે પણ ભારતીય સંસ્કૃતિ, પરંપરાઓ અને સંસ્કારો સાથે અતૂટ રીતે જોડાયેલી છે. હોળી-દિવાળી હોય કે કોઈપણ ભારતીય તહેવાર, પ્રિયંકા પોતાની પુત્રી માલતી મેરી ચોપરા જોનાસને ભારતીય મૂળ અને મૂલ્યો સાથે જોડવાની એક પણ તક ચૂકતી નથી. હાલમાં જ રક્ષાબંધનના પવિત્ર તહેવાર પર પ્રિયંકાએ વિદેશમાં બેઠા બેઠા પણ ભાઈ-બહેનના આ સંબંધને ખાસ બનાવ્યો છે. માલતી મેરીએ પોતાની માસી પરિણીતી ચોપરાના દીકરા નીર માટે પ્રેમપૂર્વક રાખડી મોકલી છે.
પરિણીતી ચોપરાએ શેર કરી રાખડીની તસવીર બોલિવૂડ અભિનેત્રી પરિણીતી ચોપરાએ પોતાના ઇન્સ્ટાગ્રામ એકાઉન્ટ પર માલતી દ્વારા મોકલેલી રાખડીની સુંદર ઝલક શેર કરી છે. તસવીરમાં નાનકડા નીરના હાથમાં રાખડી બંધાયેલી જોવા મળી રહી છે. આ પોસ્ટ શેર કરતાં પરિણીતીએ ભાવુક કેપ્શન લખ્યું: “મારી પહેલી રાખડી માટે થેન્ક યુ માલતી દીદી, ખૂબ બધો પ્રેમ – નીર.” પ્રિયંકા ચોપરાએ પણ આ સ્ટોરીને રી-પોસ્ટ કરતાં લખ્યું હતું: “દીદી તને ખૂબ પ્રેમ કરે છે બેબી નીર.” બંને બહેનો વચ્ચેનો આ સ્નેહ અને બાળકો વચ્ચેનું પહેલું રક્ષાબંધન સોશિયલ મીડિયા પર ચાહકોનું દિલ જીતી રહ્યું છે.
માલતી અને નીરનું પ્રથમ રક્ષાબંધન ઉલ્લેખનીય છે કે પ્રિયંકા ચોપરા અને નિક જોનાસે જાન્યુઆરી ૨૦૨૨માં સરોગસી દ્વારા દીકરી માલતી મેરીનું સ્વાગત કર્યું હતું. બીજી તરફ, પરિણીતી ચોપરાએ ઓક્ટોબર ૨૦૨૫માં પુત્ર નીરને જન્મ આપ્યો હતો. આ કારણે માલતી અને નીર માટે આ પહેલો રક્ષાબંધન પર્વ હતો, જેને હજારો માઇલ દૂર હોવા છતાં બંને પરિવારોએ યાદગાર બનાવી દીધો.
પ્રિયંકા અને પરિણીતીનો વર્કફ્રન્ટ કામની વાત કરીએ તો પ્રિયંકા ચોપરા લાંબા સમય બાદ ભારતીય સિનેમામાં વાપસી કરવા જઈ રહી છે. તે એસ.એસ. રાજામૌલીની આગામી બહુભાષી ફિલ્મ ‘વારાણસી’માં સુપરસ્ટાર મહેશ બાબુ સાથે જોવા મળશે, જેનું મોટાભાગનું શૂટિંગ પૂર્ણ થઈ ચૂક્યું છે અને તે એપ્રિલ ૨૦૨૭માં રિલીઝ થવાની શક્યતા છે. જ્યારે પરિણીતી ચોપરા છેલ્લે ૨૦૨૪માં રિલીઝ થયેલી ફિલ્મ ‘અમર સિંહ ચમકીલા’માં દિલજીત દોસાંજ સાથે મહત્વની ભૂમિકામાં જોવા મળી હતી.
