gujarat tourism : ગુજરાત સરકારે રાજ્યમાં પર્યટન અને યાત્રાધામોના ઈન્ફ્રાસ્ટ્રક્ચરને નવી ઊંચાઈએ પહોંચાડવા માટે મોટો નિર્ણય લીધો છે. શહેરી વિકાસ અને શહેરી ગૃહ નિર્માણ વિભાગ દ્વારા રાજ્યના પ્રવાસન અને ધાર્મિક સ્થળોના ભવ્ય વિકાસ અર્થે ₹133 કરોડના ખર્ચે 10 મહત્વપૂર્ણ પ્રોજેક્ટ્સને સૈદ્ધાંતિક મંજૂરી આપવામાં આવી છે.
આ યોજનાઓમાં વિશ્વપ્રસિદ્ધ ગિર વિસ્તારના આઈકોનિક વિકાસ ઉપરાંત ગાંધીનગરના રૂપાલ સ્થિત પલ્લી માટે જાણીતા વરદાયિની માતાજી મંદિર, ગોંડલનો ઐતિહાસિક અનળગઢ કિલ્લો, નવસારીનું ઉનાઈ માતાજી મંદિર અને વડોદરાના ભાદરવા ખાતે મહિસાગર નદી પર પાકો ઘાટ બનાવવાની કામગીરીને અગ્રતા આપવામાં આવી છે.
મુખ્ય મુદ્દા (Highlights):
-
ગુજરાત સરકારે પ્રવાસન અને ધાર્મિક સ્થળો માટે ₹133 કરોડના 10 પ્રોજેક્ટ્સને મંજૂરી આપી.
-
સૌથી વધુ ₹43.91 કરોડ ગિર વિસ્તારના આઈકોનિક ટુરિઝમ ડેવલપમેન્ટ પાછળ ખર્ચાશે.
-
રૂપાલ (ગાંધીનગર) વરદાયિની માતાજી મંદિરના સર્વગ્રાહી વિકાસ માટે ₹35 કરોડ ફાળવાયા.
-
વડોદરાના સાવલી તાલુકાના ભાદરવા ગામે મહિસાગર નદી પર સુરક્ષા રેલિંગ, પેવર બ્લોક અને વોકવે સાથે આધુનિક ઘાટ બનશે.
-
વાંસદાના ઉનાઈ માતાજી સંકુલમાં ભવ્ય પ્રવેશદ્વાર, પ્રદક્ષિણા પથ, કલ્ચરલ હોલ, ભોજનાલય અને લાઈબ્રેરીનું નિર્માણ થશે.
પ્રોજેક્ટવાર ફાળવવામાં આવેલી ગ્રાન્ટની વિગતો:
યાત્રાળુઓ અને પર્યટકો માટે આધુનિક સુવિધાઓ ઊભી થશે
મંજૂર થયેલા પ્રોજેક્ટ્સ અંતર્ગત યાત્રાળુઓની સુવિધા માટે પ્રદક્ષિણા પથ, આધુનિક ભોજનાલય, કલ્ચરલ હોલ, વોકવે, લેન્ડસ્કેપિંગ તેમજ ગ્રીન એનર્જીને પ્રોત્સાહન આપવા તરભ વાળીનાથ ધામ ખાતે સોલાર પ્રોજેક્ટ સ્થાપવામાં આવશે. આ કામગીરી પૂર્ણ થવાથી સ્થાનિક કક્ષાએ રોજગારીની નવી તકો સર્જાશે અને રાજ્યમાં ધાર્મિક પ્રવાસનને મોટો વેગ મળશે.
