પતિએ ગૂગલ પર સર્ચ કર્યું— ‘પત્ની આપઘાત કરે તો શું પતિ જવાબદાર?’: પછી સગર્ભા પત્નીને નેનો યુરિયા પીવડાવી પતાવી દીધી; હત્યાને સુસાઈડમાં ખપાવવાનો ખૌફનાક પ્લાન નિષ્ફળ!

ગુજરાતના ખેડા જિલ્લામાંથી પતિ-પત્નીના પવિત્ર સંબંધને લજવતો અને કમકમાટી ઉપજાવે તેવો હત્યાકાંડ સામે આવ્યો છે. મહુધા તાલુકાના કપરાપુર ગામે ૧૩ અઠવાડિયાની ગર્ભવતી પત્નીની હત્યા કરીને તેને આત્મહત્યાનું રૂપ આપવાનો પ્રયાસ કરવામાં આવ્યો હતો. જોકે, પેનલ પોસ્ટમોર્ટમ રિપોર્ટ અને ટેકનિકલ સર્વેલન્સે આ સમગ્ર કાવતરાનો પર્દાફાશ કરી દીધો છે. આ આપઘાત નહીં, પરંતુ એક સગર્ભા સ્ત્રી અને તેના ગર્ભમાં ઉછરી રહેલા અણજન્મેલા બાળકની અત્યંત ક્રૂરતાપૂર્વક કરવામાં આવેલી બેવડી હત્યા હોવાનું સાબિત થયું છે.

પોલીસે ગણતરીના કલાકોમાં આરોપી પતિ અને તેના ભાઈ (દિયર) ની ધરપકડ કરી લીધી છે, જ્યારે હત્યામાં સાથ આપનાર સાસુ અને જેઠાણી હજુ ફરાર છે.

પેટમાં દુખાવાની ફરિયાદ છતાં હોસ્પિટલ ન લઈ ગયો: ઝઘડા બાદ રચી હત્યાની સાજીશ

પોલીસ તપાસમાં સામે આવેલી ચોંકાવનારી વિગતો:

• સારવાર ન કરાવી: ૧૭ ઑક્ટોબરની રાત્રે ૧૩ અઠવાડિયાના ગર્ભવતી અરુણાબેન સોઢાને પેટમાં અસહ્ય દુખાવો ઉપડ્યો હતો. તેમણે પતિ મિતુલને ડૉક્ટર પાસે લઈ જવા આજીજી કરી હતી, પરંતુ મિતુલ હોસ્પિટલ લઈ જવાને બદલે મોબાઈલમાં વ્યસ્ત રહ્યો હતો.

• અણબનાવ અને વહેમ: મિતુલ થોડા દિવસ પહેલાં પોતાની ભાભીને બેંકના કામે લઈ ગયો હતો, પરંતુ ગર્ભવતી પત્નીને સારવાર માટે લઈ જવામાં આનાકાની કરતાં તકરાર વધી હતી. બંને વચ્ચે ચારિત્ર્ય અને આડા સંબંધોની શંકાને લઈને અગાઉથી જ મનદુઃખ ચાલતું હતું.

• ‘હું મરી જઈશ’ કહેતાં જ પતિના મગજમાં આવ્યો રાક્ષસી વિચાર: બોલાચાલી દરમિયાન કંટાળીને અરુણાબેને જ્યારે કહ્યું કે ‘હું મરી જઈશ’, ત્યારે શાતિર પતિના મગજમાં કાવતરું રચાયું.

હત્યા પૂર્વે ગૂગલ સર્ચ: ‘પત્ની સુસાઈડ કરે તો પતિ ફસાય?’

પોલીસની સાયબર તપાસમાં મિતુલના મોબાઈલમાંથી ચોંકાવનારી હિસ્ટ્રી મળી આવી:

• તેણે ગૂગલ પર સર્ચ કર્યું હતું કે— “જો પત્ની આત્મહત્યા કરી લે તો શું પતિ કાયદાકીય રીતે જવાબદાર ગણાય?”

• કાનૂની સકંજામાંથી બચવાનો રસ્તો શોધ્યા બાદ તેણે સમગ્ર પરિવારને સાથે રાખીને પત્નીને કાયમ માટે રસ્તામાંથી હટાવવાનો પ્લાન બનાવ્યો.

• ઘરમાં પડેલી ૫૦૦ મિલીલીટરની નેનો યુરિયા (ખાતર) ની બોટલ કાઢવામાં આવી હતી.

સાસુ-જેઠાણીએ હાથ-પગ પકડ્યા, પતિએ બળજબરીથી ઝેરી યુરિયા ગળે ઉતાર્યું

• અરેરાટીભરી ક્રૂરતા: સાસુ અને જેઠાણીએ લાચાર ગર્ભવતી અરુણાબેનના હાથ-પગ જકડી રાખ્યા હતા. મિતુલે તેમને સોફા પર પટકીને બળજબરીથી આખું નેનો યુરિયા તેમના ગળામાં રેડી દીધું હતું.

• મોંમાં કપડું ઠૂંસી દીધું: અરુણાબેન બૂમો ન પાડી શકે તે માટે મોંમાં ડૂચો મારી દેવાયો હતો. માત્ર ૧૫ થી ૨૦ મિનિટના ગાળામાં જ અરુણાબેન અને તેમના ગર્ભમાં રહેલા માસૂમ બાળકે તરફડીને દમ તોડી દીધો હતો.

• બારી સાથે લટકાવી સુસાઈડનું નાટક: હત્યા બાદ મિતુલે પોતાના ભાઈ વિપુલ સાથે મળીને નાયલોનની દોરી વડે લાશને રૂમની બારી સાથે લટકાવી દીધી હતી, જેથી પોલીસ અને સમાજ તેને સીધો આપઘાત માની લે.

પેનલ પોસ્ટમોર્ટમ રિપોર્ટે ખોલ્યો ભેદ: ગળે ફાંસો મરણોત્તર હતો

ઘટનાની જાણ થતાં જ પિયરપક્ષે હત્યાની આશંકા વ્યક્ત કરી હતી, જેના પગલે પોલીસે પેનલ ડૉક્ટરો પાસે પોસ્ટમોર્ટમ કરાવ્યું હતું:

• તબીબી ખુલાસો: પીએમ રિપોર્ટમાં સ્પષ્ટ થયું કે ગળા પર ફાંસાના નિશાન મૃત્યુ પછીના હતા. શરીરમાંથી અત્યંત ઘાતક કેમિકલ (યુરિયા) મળી આવ્યું હતું.

• પેટમાં ગયેલા યુરિયાએ એમોનિયા ગેસ પેદા કર્યો હતો, જેના કારણે શ્વાસનળી અને આંતરિક અંગો ફેલ થઈ જતાં ગૂંગળામણથી મોત નીપજ્યું હતું.

મહુધા પોલીસે હત્યામાં વપરાયેલી નાયલોનની દોરી, બ્લેડ અને મોબાઈલ ફોન જપ્ત કરીને પતિ મિતુલ સોઢા અને દિયર વિપુલની ધરપકડ કરી લીધી છે. જ્યારે ફરાર સાસુ અને જેઠાણીને ઝડપી પાડવા અલગ-અલગ ટીમો બનાવી દરોડા પાડવામાં આવી રહ્યા છે.